“Au Kila Ni‘u na Raici Koya Tale Vakadua,” Me iSakisaki ni iTabagone, Jiulai 2022.
Na iToko kei Au
Era wasea na itabagone na sala era bulataka tiko kina na vosa ni iToko ni Goneyalewa kei na Kuoramu ni Matabete i Eroni
Au Kila Ni‘u na Raici Koya Tale
“Au na rawata me‘u ciqoma na veivakalougatataki ni valetabu kei na reki tawayalani ni kosipeli.”
Au vakabauta ni a solia vei keda na Turaga na matavuvale me rawa ni da veivukei ka veitokoni vakai keda kina. Sa solia talega vei keda na Turaga na matavuvale me da kakua kina ni tiko duadua. Ia ni sa takali o tamaqu, au a galili sara ga. Keirau a veivolekati sara kei tamaqu, ka sa yali na nona ivakaraitaki tudei. E vaka ni ka duadua ga au a rawa tu ni cakava sa ikoya na tagi.
Ia ena dua na bogi, au sa nanuma me‘u masu. E lomaqu au vakila ni tukuna vei au na Yalo ni‘u sega ni tiko duadua. Au kila na ituvatuva ni veivakabulai. Ena vuku ni Veisorovaki i Jisu Karisito, au na raici tamaqu tale. Sa ka bibi sara vei au ni‘u kila ni matavuvale e rawa ni tawamudu. Ka‘u kila ni rawa ni tawamudu na neitou matavuvale baleta ni rau a vauci na noqu itubutubu ena valetabu.
Ni‘u a yabaki 12, au a nakita tiko me‘u lako ki na valetabu me‘u la‘i papitaiso ena vukudra na mate ena imatai ni gauna. Ia a qai sogo na valetabu ena vuku ni matedewa levu. Au sa nanamaki tiko qo me‘u na noqu gole ki na loma ni valetabu ena imatai ni gauna me‘u vakila kina na reki e kea.
Ni vauci o tuakaqu vei watina, au a tiko ga e tautuba ni valetabu. Ia mai tautuba mada ga, au vakila na yalo totoka e lomaqu. Au sa rawa kina ni raitayalotaka se vakacava tu na kena irairai e loma. E tukuna vei au na noqu matavuvale ni valetabu sa dua na vanua eda rawa ni rekitaka kina na ituvatuva sa vakarautaka tu na Kalou me baleti keda.
Au sa vulica talega mai na nodra ivakavuvuli na parofita ni rawa ni‘u vakayaco veiyalayalati tabu ena valetabu. Na veiyalayalati kece eda cakava ena valetabu e sa ka bibi sara. Au sa ciqoma na noqu ivolatara ni valetabu, ka‘u sega ni rawa ni wawa me‘u vakayagataka. Ka‘u kila ni dua na siga ni‘u sa vauci vua na watiqu, sa na dua na noqu matavuvale tawamudu.
E vakaitikotiko mai Culiacan e Mexico o koya e vola.