“Vakavakarau ki na Valetabu e Dubai,” Me iSakisaki ni iTabagone, Jiulai 2022.
Vakavakarau ki na Valetabu e Dubai
Era wasea na itabagone mai Dubai kei Qatar na nodrau taleitaka na valetabu kei na nodra marautaka na kena tara volekati ira.
iTaba kei Saajan mai vei Carla Nacario
Era vica walega na vosa rawarawa, ia era veisautaka na nomu bula ena gauna e cavuta kina e dua na parofita ni Kalou. Ena gauna ni koniferedi raraba, era vakarorogo ena yalo nanamaki na lewe ni Lotu e vuravura raraba me baleta na kacivaki ni valetabu vou. Vei rau o Sajaan kei Gwen, ena gauna a cavuta kina na vosa o Peresitedi Russell M. Nelson, “Dubai, United Arab Emirates,” ena koniferedi raraba ni Epereli 2020, e rau kila na itabagone oqo ni sa na veisau na nodrau bula.1
Sotavi Saajan mai Dubai
Ena loma ni nona yabaki tinikarua o Saajan e sa bera vakadua ni bau raica o koya e dua na valetabu.
“Sa dau lalawataka tu ga o tinaqu me na gole ki na valetabu,” a kaya o Saajan. “Na nona taleitaka na valetabu e veitakavi. Na noqu lalawa ni bula ena gauna oqo sa ikoya me‘u na gole ki na valetabu.”
A sucu o Saajan mai Idia, ia ni rau sa sere na nona itubutubu, a toki vata kei tinana o koya ki na United Arab Emirates. “E dau cakacaka sara vakaukauwa o tinaqu. E vaka e dua na tamata qaqa vei au. Ena gauna mada ga ni dredre, a sega ni soro. ”
E rau a lewena na Lotu o tinai Saajan kei buna mai Idia ni vo toka e vica na yabaki me sucu o koya. E rau wilika na iVola i Momani ka kila ni sa isau ni nodrau masu. A dau lako ilotu vata kei tinana o Saajan ena gauna a tubucake voli mai kina, ka se qai papitaiso wale toka ga qo ni a waraka tiko na veivakadonui nei tamana.
“Na papitaiso sa dua vei ira na digidigi vinaka duadua au sa bau cakava,” a kaya o koya. “Ia ni‘u ciqoma na isolisoli ni Yalo Tabu, au vakila na raragi kei na reki e lomaqu.”
Ena gauna oqo e sa dau vota sakaramede tiko ena nona tabanalevu o Saajan ka sa vakavakarau tiko me curuma na valetabu. E sa ciqoma na nona ivolatara ni valetabu, ka sa sega ni rawa ni wawa me curu ki na Valetabu e Dubai United Arab Emirates ena gauna e sa na vakacavari kina.
“Ni‘u rogoca ni ratou sa kacivaka na valetabu, au vakila sara ga ni sa baleti au,” a kaya o Saajan. “E sa isau saraga ni neirau masu. Au kurabui baleta ni tara sara tikoga ena vanua keitou vakaitikotiko kina! Au na rawa ni vodo sitimanivanua vakadodonu sara ki na valetabu ka lako kina ena kena levu ga au vinakata. Au sa nanamaki tale tikoga ki na Valetabu e Bengaluru Idia ni rau na rawa ni sikova na tubuqu.”
Sa nanamaki tiko o Sajaan ena vukudrau na tubuna me tiko volekati rau na Valetabu e Bengaluru Idia.
E vinakata o Saajan me cakava talega na cakacaka ni valetabu me baleti ira na tubuna tale eso.
“Au sa vakarautaki au tiko me‘u kilikili kaya me‘u curuma na valetabu. Au vinakata me‘u cakava na veika au rawa ni cakava me‘u vukei ira kece kina na noqu qase e liu. Sa noqu na madigi taleitaki me‘u qarava na Turaga ka vakayacora na veika me baleta na matanitu ni Kalou.”
Sotavi Gwen mai Qatar
iTaba kei Gwen mai vei Christina Smith ka lolomataka na nona matavuvale
Ena imatai ni 18 na yabaki ni nona bula, a vakaitikotiko o Gwen ena lima na matanitu duidui: Sikoteladi, Aqola, Igiladi, Kazakhstan, kei Qatar. Na cakacaka nei tamana e sa kauti iratou wavoki e vuravura taucoko, ka wale tikoga oqo, ki na Tokalau e Loma.
E ratou sa toki taucoko na taci Gwen, ka sa vakaitikotiko oqo e Qatar vata kei tinana kei ta o koya. E dua na ka taleitaki a sotava oya na nona a lako vata kei ira na itabagone ena nona tabanalevu ena ilakolako ni valetabu ki na Valetabu e Kiev Ukraine. E sega ni dua na valetabu e tiko voleka, era sa dau vuka kina na Yalododonu ena Tokalau e Loma me ra la‘i sikova na valetabu ena veimatanitu tale eso.
“Au a nanamaki vakalevu sara ki na neitou ilakolako, ka‘u a vinakata me‘u kauta na yaca ni matavuvale,” a kaya o koya. “E veisiga au na kunea na yaca ni matavuvale ena noqu talevoni ena ilakolako ki vuli kei na suka mai na vuli. Au a kunea e rauta ni 200 na yaca. Au a vakila ni‘u sa vakarau tu me‘u lako!”
Ia e dua na leqa lailai a sega ni a vakavakarau tu kina.
E dua na matedewa e vuravura raraba.
A ro yani na waqavuka nei Gwen e Ukraine ena Maji ni 2020—ena gauna saraga era sa tekivu rogoca kina e levu tale na ka me baleta na kena tete na manumanu ni COVID-19. Ena veivuke mai lomalagi, e ratou a gole rawa kina ki na valetabu ka ratou a rawa ni la‘i papitaiso ena vuku ni yaca ni matavuvale a vakarautaka o Gwen.
“A yaco na cakamana vakaveitarataravi,” a kaya o koya. “Ni keirau draiva yani ki na valetabu, au a lomaleqataka na matedewa levu. Ia ena valetabu au a vakila e levu sara na sautu kei na vakacegu ni yalo. Ka keitou a rawa ni vuka lesu ki Qatar ni bera ni sogo na iyalayala ni vanua. ”
Ia na tinai Gwen, ka a lako me sikova e dua na taci Gwen e Amerika, a sega ni rawa ni lesu tale ki Qatar. E rau a kuoranitinitaki tu e vale o Gwen kei tamana ena gauna a tauvi COVID kina o tamana. “Ena dua na gauna a tauvimate bibi sara ka sega ni rawa me toso vakalevu,” a kaya o Gwen. “Au a vakila na galili. A sa yali tiko ga o tinaqu, ka‘u a sega ni kila na vakarautaki ni so tale na kakana, na seniwiji jisi tavu ga.”
Ia a sotava o Gwen e dua na gauna talei ni rau lotu tiko e vale vata kei tamana.
“E vaka ni ra a tiko vata kei au kei tamaqu o ira au a kauta na yacadra ki na valetabu,” a kaya o koya. “Au sa sega tale ni qai galili. A dua na gauna vinaka. Na sikovi ni valetabu ni bera na matetaka levu e a dua na veivakalougatataki levu.”
A kacivaki na Valetabu e Dubai United Arab Emirates ni oti ga e dua na vula mai na nona ilakolako ki na valetabu e Ukraine. A marau o koya! Ka kila o koya na kena bibi vei ira na tamata ena nona yasayasa.
“Au kila ni tiko eso na tamata ena noqu vanua ka ra na sega ni sauma na isau ni vuka ki na dua tale na valetabu e Iurope. Era sa wawa tu me ra vauci vakamatavuvale tawamudu. E vakaraitaka vei au ni sa yaco dina tiko na vakasoqoni vata. Eda sa vakavakarautaka tiko na sala ni Nona na lako tale mai na Karisito.”
Veivakalougatataki ni Valetabu
E dua na ka e rau tautauvata kina o Gwen kei Saajan oya ni sa vakalougatataka oti tiko na nodrau bula na valetabu. E kaya o President Nelson, “Na valetabu era sa tiki cecere ni Vakalesui Mai ni taucoko ni kosipeli i Jisu Karisito. Ena vinaka kei na yalololoma ni Kalou, sa kauta mai o Koya vakavoleka na veivakalougatataki ni valetabu vei ira na Luvena ena veivanua kecega..”2