Tarokei na Kena iSau

Me’u na lewa beka vakacava na gauna vinaka duadua me’u kaulotu kina?

“Ena 40 na yabaki sa oti ni‘u vakasamataka tiko na bolebole ni kaulotu, au a vakila ni‘u a sega ni veiganiti ka sega ni vakarau. Au nanuma na noqu masu, ‘Tamaqu Vakalomalagi, e rawa vakacava me‘u veiqaravi vakaulotu ni se lailai sara na ka au kila?’ Au vakabauta na Lotu, ia au vakila ni sa yalani sara na noqu kila-ka vakayalo. Ni‘u masu tiko, a yaco mai na yalo: ‘O sega ni kila na veika kece, ia sa veirauti na veika o kila!’ Na veivakadeitaki o ya sa solia vei au na yaloqaqa me‘u kalawaca yani na ikalawa e tarava ki na buturara ni kaulotu.”

Elder Neil L. Andersen ena Kuoramu ni iApositolo Le Tinikarua, koniferedi raraba ni Okot. 2008 (Ensign se Liaona, Nove 2008, 13).

Sa Vakarautaka na Turaga e Dua na Sala

goneyalewa

“Sa vakarautaka tu na Tamada Vakalomalagi e dua na cakacaka me da vakayacora. Ni da wilika na Nona vosa, kei na nodra vosa na Nona italai digitaki, e rawa ni da kila ena yalodei na veika e vinakata o Koya me da cakava. Eda kila ni na vakarautaka na Turaga e dua na sala me da rawata kina na veika e kerea vei keda o Koya me da cakava (raica na 1 Nifai 3:7). Ena dau tu tikivi keda o Koya kevaka eda saga me da talairawarawa ki na Nona ivunau.”

Manuela O., 15, Ghana

O na Sega Beka ni Vakila ni sa 100% na Nomu Vakavakarau

cauravou

“O au e dua na kenadau ena vakasisisi e dela ni ua, ka‘u biuta tu yani oya vakawawa me‘u vakila na reki dina e yaco mai ni da veiqaravi vakadaukaulotu. Au a wawa me yacova ni‘u sa vakila ni‘u sa vakavakarau vinaka me‘u lako, ka‘u sa vakalougatataki kina. Oya e dua na vakatulewa ena kemudrau maliwa o iko kei na Tamamu mai Lomalagi. O na sega beka ni vakila ni sa 100% na nomu vakarau. Na vakauti ni nomu pepa ni kaulotu e sa dua na rika ni vakabauta, ia e sa bau veirauti vakavinaka saraga.”

Jordan C., 22, California, Amerika

Ena Vakavakarau ka Vakaukauwataki Iko na Turaga

“Sa rawa ni o kerea vua na Turaga ena masu. Na Turaga e vakaukauwataki ira e kaciva o Koya me ra daukaulotu. Ni mate o tamaqu, au a vakila na vakacegu mai na noqu ivakadinadina ni ituvatuva ni veivakabulai. Ia e vuqa na tamata ena vuravura oqo era sa sega tu ga ni kila na ituvatuva ni Tamada Vakalomalagi. Au kila ni sa vakarautaki ira tiko na tamata na Turaga me‘u vakavulici ira.”

Felipe F., 17, Brazil

Vola na Veika o Vakauqeti Kina

goneyalewa

“Ni‘u masulaka me‘u la‘i kaulotu, au a vola na veivakauqeti au ciqoma mai na vei vosa eso, sere kei na ivakatagi, se mai vei ira na itokani. Ni yaco mai vei au na yalolailai ena noqu vakavakarau tiko ki na kaulotu, au na lesu tale ka wilika na veika a tukuna vei au na Yalo. Au a vakauta na noqu pepa ka vakanuinui ki vua na Turaga. Ni o toso ki liu ena vakabauta, o na sega ni kila na ka ena yaco, ia o na raica na liga ni Kalou ena nomu vakatulewa!”

Bryanna M., yabaki 19, Oregon, Amerika

Ciqoma na Nomu Veivakalougatataki Vakapeteriaki.

goneyalewa

“Me tekivu mai na gauna au a ciqoma kina na noqu veivakalougatataki vakapeteriaki, au sa kila ni dodonu me‘u wasea na kosipeli. Au sa vakavakarau tiko ki na kaulotu ena gauna oqo ena noqu wasea na kosipeli vei ira na noqu itokani. Kevaka mada ga au vakila ni veiqaravi vakadaukaulotu tudei e sega ni ganiti au ena gauna au na qase cake kina, au sa kila tikoga ni‘u rawa ni wasea na kosipeli ena noqu bula taucoko.”

Elise D., 14, Florida, Amerika

Kerea Vua na Turaga kei Ira Tale Eso

“Au se qai yabaki 14 ga, ia au sa vakasamataka tiko na taro oqo. Ni sa yaco mai na gauna me‘u na navuca kina na noqu gauna ni veiqaravi, au na masu vua na Turaga me vukei au me‘u kunea na noqu isau ni taro. Au na veitalanoa talega vei ira na tamata era voleka duadua vei au, oka kina na noqu matavuvale, bisopi, kei ira na itokani.”

Jordan V., yabaki 14, e Nevada, Amerika

Ena Solia Vei Iko na Turaga e Dua na iSau ni Taro

“Au dau gadreva tu ga me‘u na la‘i kaulotu, ia au kila ni sega ni na vakatulewa rawarawa. Kevaka eda vakasaqara vakagumatua me da vulica na ivolanikalou ka dau masu tikoga vua na Tamada Vakalomalagi, au kila ni na tuberi keda o Koya. Vakabauta na Turaga. Ena tukuna vei iko o Koya na gauna donu mo la‘i kaulotu kina. Vakasaqara tikoga na isau ni taro, o na ciqoma ka vakila ni o sa vakarau tu.”

Nicolle R., 14, Brazil

Vakavakarau Vakayalo, Vaka-vakasama, kei na Yago

“Masulaka vakaidina ka vakasamataka vakatitobu na ivolanikalou me baleta na nomu vakatulewa. Vakarorogo ki na veika e rawa ni vakasolokakanataka se tukuna vei iko na Yalo. Ena gauna oqo, e rawa ni o tiko ena veisoqoni kece ni sakaramede, semineri, kalasi ni Matawilivola ni Sigatabu, kei na kalasi ni Goneyalewa se soqoni ni kuoramu ni Matabete i Eroni. E rawa talega ni o vakavakarau vaka-vakasama ka vaka-yago.”

Addison H., 14, Utah, Amerika

Na isau ni taro era nakiti me ra veivuke ka solia e dua na itovo ni rai, era sega ni kakaburaki vakaivola ni vunau ni Lotu.

Na Cava na Nomu Nanuma?

“Me‘u na ivakaraitaki vakacava vei ira na lewe ni noqu matavuvale kevaka era sasaga dredre tiko me ra bulataka na ivakavuvuli i Jisu Karisito?”

Vakauta mai na nomu isau ni taro kei na itaba ni bera na ika 15 ni Okosita, 2022.

Imeli mai ena [e-mail] Lako ki na ftsoy. ChurchofJesusChrist.org ka kilikitaka na “Submit Your Work.” Curu ena nomu Akaude ni Lotu ka digitaka na “For the Strength of the Youth” ena ruku ni “Choose Magazine.” Kiliki ena “Add File” mo digitaka na nomu faile kei na itaba, ka qai kilikitaka na “Submit” mo vakavodoka ka vakauta mai na nomu faile.

Ena rawa ni moici na nomuni itukutuku me baleta na kena balavu se kena matata.