“O Le Mana Ua Tatou Ta‘ua o le Alofa Tunoa,” Mo le Malosi o le Autalavou, Iulai 2022.
Fesoasoani o le Olaga
O Le Mana Ua Tatou Ta‘ua o le Alofa Tunoa
E mafai ona fesoasoani le alofa tunoa o le Atua ia i tatou, e tusa lava po o a luitau tatou te feagai.
Atapue mai le Getty Images
Sa ou auai i le falelauasiga o se tagata sa avea muamua ma tagata o le uarota na maliu i le pule i le ola ina ua mavae se tauiviga umi ma le lotopopole. Sa nutimomoia lo‘u loto a o ou faavauvau faatasi ma ana uo ma lona aiga i le toesea o ia.
O le lotopopole ma isi luitau o le soifua maloloina faalemafaufau e mafai ona lavelave ma faigata mo tagata o loo feagai ai ma na vaega ma i latou uma o e alolofa ia i latou. O le tala fiafia o le talalelei e faapea ua ofoina mai e Keriso le faamoemoe ma le fesoasoani e ala i Lana meaalofa o le alofa tunoa.
O se sailiiliga e aofia ai le 600 talavou matutua i le Iunivesite o Polika Iaga na faaalia ai o i latou o e malamalama i le alofa tunoa o Iesu Keriso sa maualalo tulaga o le lotopopole, atuatuvale, faafiaatoatoa, ma le maasiasi.1 O le a se mea na malamalama i ai nei tagata talavou e uiga i le alofa tunoa lea na faia ai se eseesega tele i o latou olaga?
E Le Uma le Alofa o le Atua ia i Tatou
I le suesuega, sa talitonu nisi tagata o le a alolofa le Atua ma Iesu Keriso ma fesoasoani ia i latou pe afai ua latou atoatoa. O na tagata sa sili atu ona tauivi nai lo isi na malamalama e le uma le alofa o le Atua ma Iesu Keriso ia i latou ma o loo i ai pea iina mo i latou.
I le faaPeretania, o le upu alofa tunoa e tele ona faauigaga. E mafai ona faauiga o le mataina, agalelei, po o le faaaloalo. I le faaEperu, o lea upu o lona uiga o le alofa po o le agalelei e tuuina mai ma le agaalofa. Atonu o le mafuaaga lea na faaaoga ai e Kerisiano i le tele o seneturi le upu alofa tunoa e faamatala ai le alofa mutimutivale o le Atua, agalelei, ma le alofa.
E Finagalo le Atua e Fesoasoani Mai ia i Tatou
Ua malamalama le Au Paia o Aso e Gata Ai o le alofa tunoa e sili atu nai lo na o se uiga o le Atua. O le alofa tunoa e faamatalaina ai foi le ala e fegalegaleai ai o Ia ma i tatou a o tatou taumafai e avea e faapei o Ia (tagai Moronae 10:32). Sa faamatala mai e Peresitene Dieter F. Uchtdorf, a o avea ma Fesoasoani Lua i le Au Peresitene Sili e faapea o le alofa tunoa o “le fesoasoani faalelagi ma le faaeeina mai o le malosi lea tatou te tuputupu ae ai mai tagata agasala ma tapulaa o loo tatou i ai nei, i tagata faaeaina.”2
I le sailiiliga na ta‘ua muamua, o tagata talavou o e na vaai i le Atua ma Keriso ua saunia, naunau, ma mafai ona fesoasoani ia i latou e faaitiitia ni luitau o le soifua maloloina faalemafaufau nai lo i latou o e na lagonaina le tuua na o i latou lava.
E Fesoasoani le Atua ia i Tatou i o Tatou Tulaga o i Ai
Ua toatele naua tagata e lagonaina ua le mafai ona latou ausia le fesoasoani a le Atua ona latou te lei galueaiina. O le mea moni, o le alofa tunoa o se meaalofa. E te le tau galueaiina se meaalofa. Tau lava o lou filifili e mauaina.
I le sailiiliga, sa itiiti ni tauiviga o le soifua maloloina faalemafaufau ia i latou o e sa malamalama e fesoasoani le Atua ia i tatou i soo se mea tatou te i ai ma e tusa lava po o a mea ua tatou faia. Na aoao mai Elder D. Todd Christofferson o le Korama a Aposetolo e Toasefululua, “Tatou te le manaomia ona ausia nisi o tulaga o tomai po o ni lelei ao lei fesoasoani mai le Atua—e mafai ona avea fesoasoaniga faalelagi ma a tatou itula uma o aso uma, e tusa lava po o fea o tatou i ai i le ala o le usiusitai.”3
I le falelauasiga o la‘u uo, sa ou faafetai mo molimau malolosi na tuuina mai e uiga i le faamoemoe ma le faamalologa o loo avanoa mo tagata uma e ala i le Togiola a Iesu Keriso. E moni lava, o Keriso o le vaifofo lea i faafitauli uma ma le puna o le olioli moni.