“O Le Malumalu ma Lau Malaga e Faavavau,” Mo Le Malosi o le Autalavou, Iulai. 2022.
O Le Malumalu ma Lau Malaga e Faavavau
E maeu le faamanuiaina o i tatou i le taialaina i le maota o le Alii.
Ata na pueina e Noel Maglaque
O loo e i ai i se faigamalaga. Ua leva ona amata ao e nofo faatasi ma le Tama Faalelagi o Lona atalii po o le afafine agaga. O lenei ua e i ai iinei i le lalolagi ma lou agaga o loo i totonu o se tino faaletino e aoao mea uma e manaomia ina ia toe foi atu i le Tama Faalelagi i se aso ma ia agavaa mo faamanuiaga uma ua ia te Ia mo Ana fanau. O nisi o mea silisili o le a e aoaoina i lenei malaga e faavavau o loo i totonu o malumalu o Le Ekalesia a Iesu Keriso o le Au Paia o Aso e Gata Ai.
Malumalu i le Lalolagi Atoa
Ina ua ou fanau i le 1928, sa na o le fitu malumalu. Ua i ai nei a tatou malumalu matagofie ua salalau solo i le lalolagi. Ma o le a tele atu isi! E aumaia e malumalu le olioli ma le mana tatou te manaomia mo la tatou malaga e faavavau.
E leai nisi fale i luga o le fogaeleele—e oo lava i fale e sili ona matagofie—e i ai mea o i ai i malumalu. Na ta‘u atu e le Faaola ia Peteru o le a tuuina atu ia te ia le mana ma le pule ma “o se mea foi e te fusifusia i le lalolagi, e fusifusia foi lea i le lagi” (Mataio 16:19). O se faamatalaga tele lena! O malumalu e faapaiaina ma vaetofia e le mana o le perisitua o se nofoaga e faatino ai sauniga paia. O nei sauniga e aoga i itu uma e lua o le veli.
O Le Olioli o Aiga Faavavau
O lo‘u toalua, o Barbara, na maliu i le toeitiiti fa tausaga talu ai. Ae ona sa ma ulu atu i le maota o le Alii ma faamauina o se tane ma se ava e ala i le mana o le perisitua, ua fusia faatasi ai i ma‘ua ma le ma fanau e toafitu, fanau a fanau e 43, ma le silia ma le 100 fanau a fanau a fanau, mo le faavavau atoa. Oka se matagofie o le malumalu! E faatumulia lo‘u loto i le olioli aua o le a faatasia lo’u aiga e faavavau. Ma e mafai foi e lou aiga.
A oo ina e matua e pei o au, o le a e le fiafia tele i le maua o tupe e tele po o le aveina o se taavale manaia. O le mea aupito sili ona taua i lou olaga o lou aiga—e le gata o lou aiga o loo i ai iinei ae faapea foi lou aiga i le faavavau.
O Le Mana o le Upumoni Toefuataiina
Ua e iloa oe lava—o se atalii po o se afafine o le Atua ma se gafatia e le faatapulaaina. Ua e iloa le mea na e sau ai, le pogai o lou i ai iinei, ma mea o loo taoto mai i luma i le lalolagi a sau.
Ou te maofa ona o nei upumoni na oo mai o se taunuuga ofoofogia o se tama talavou sa tootuli ma tatalo i se togavao. Na faaali mai le Tama ma le Alo ia Iosefa Samita ma, na auaua’i ona toefuatai mai faamanuiaga o le talalelei.
E i ai so‘u lagona malosi o le agaga faafetai mo Iosefa Samita. O lo tatou malamalama toefuataiina i le fuafuaga a le Atua, o le matafaioi tutotonu o le Togiola a Iesu Keriso, ma le taua e faavavau o aiga ma malumalu na amata uma ia te ia. O le a faaauau pea ona tatou fausia malumalu ma faasilasila atu ni malumalu fou ao faatumulia e se savali sili, faifai pea o le Toefuataiga ia le lalolagi.
O upumoni toefuataiina, aemaise lava upumoni tatou te aoaoina e ala i sauniga o le malumalu, e tuuina le olaga i se vaaiga mamao ma aumaia ia i tatou le mana e fesoasoani ai ia i tatou i la tatou malaga e faavavau.
Avea le Malumalu ma se Vaega o Lou Olaga
Atonu e faigata mo oe le mafaufau faapea o se mea e mafai ona e faia i le asō o le a faia ai se eseesega tele i tausaga o lumanai po o le mavae ai foi o lenei olaga. Ae ia manatua le malaga e faavavau o loo e faia. Pe a papatisoina oe ma faamauina, ua e faia laasaga taua i lenei malaga.
E mafai ona e fesoasoani ia i latou ua maliliu e agai i luma i la latou malaga e ala i le faatinoina o papatisoga ma faamauga mo i latou i totonu o le malumalu. Sa ou faia lenei mea i le tele o taimi a o ou pei o outou. Ou te manatua se tasi taimi na ou papatiso ai mo le silia ma le 60 tagata. Sa tau le mafai ona ou manava i le va o papatisoga!
Afai e te maua se avanoa e alu ai i le malumalu, fai loa! Alu soo pe a mafai. Faamolemole aua le popole i mea faatauvaa e alu ai le tele o lou taimi ma faalavelavea ai oe mai mea moni ma faavavau. E tusa lava pe e te nofo mamao mai se malumalu, ia taulai atu ma saunia oe lava i le taimi nei ia agavaa e ulu atu i le malumalu.
Saunia Nei mo Ou Faamanuiaga o le Malumalu
O se tasi o sauniga muamua o le malumalu e te mauaina mo oe lava o le faaeega paia. O se meaalofa lenei o le mana o le perisitua o loo avanoa mo fanau uma a le Atua. Tatou te maua lenei mana e ala i le mauaina o sauniga ma le tausia o feagaiga tatou te osia i le malumalu i aso taitasi o o tatou olaga.
E mafai ona e saunia mo lou faaeega paia ma isi sauniga o le malumalu e ala i le mafaufau loloto, tatalo, ma le aoao e uiga i le malumalu. Afai na o atu ou matua po o matua matutua i le malumalu, talanoa ia i latou e uiga i le mamalu o lena faamanuiaga. O le a fesoasoani foi lou epikopo ma isi taitai ia te oe. Ou te faamoemoe foi o le a e maua ni uo lelei o e lagolagoina oe. O le a e faafetai pe a oo mai le aso e te alu atu ai i le malumalu ma ua e saunia e maua uma folafolaga ofoofogia ma faamanuiaga e finagalo le Alii e tuuina atu ia te oe.
O Keriso o loo Aoao Ona Soo, saunia e Justin Kunz
E Faaauau Pea Le Malaga
O le faamoemoega o lenei olaga o le saunia lea o i tatou lava mo le isi olaga. O le fuafuaga sili a le Tama Faalelagi e le gata i le oti, aua e le oti lava lou agaga. E oo atu i le lalolagi o agaga e faaauau ai pea ona aoao, auauna atu, ma faatalitali mo le Toetutu. Ona, tootutuli lea o tulivae uma ma e tauto mai laulaufaiva uma lava o Iesu o le Keriso ( tagai Isaia 45:23). Ona o Lana Togiola ma le Toetu, o le a toe faatasia ai o tatou tino ma agaga, ma o le a faaaauau pea la tatou malaga i le faavavau. Oka se faamanuiaga ina a mamalu o le a i ai mo i tatou uma!
A uma ona tautalagia ma faia mea uma, o mea uma o taunuuga e faavavau ma le taua e taulai atu i le soifuaga ma le misiona a Iesu Keriso. O le a tuputupu atili lou malamalama ma le faatuatua ia te Ia a o e auauna ai i le malumalu. O le a e lagonaina Lona alofa e le aunoa mo oe ma maua le olioli ma le mana faaleagaga i lou olaga atoa.