E Leai Lava se Tasi e Pei o Oe

Saunia e David Dickson

Mekasini a le Ekalesia

Sa saunia e le Alii ia Eseta mo lana galuega taua, ma o loo Ia faia foi lea mea e tasi mo oe.

Fai soo se mea i le taimi nei. Soo se mea lava! Tuu ou lima i luga a’e o lou ulu, faataamilo, , pe valaau atu ni upu malie e pei o le, “Ou te fiafia i falaoa fa’i!”

Ua uma? Lelei. Ua e ausia nei se mea e lei faia muamua lava. E pei lava ona uiga ese, po o le a lava le mea na e faia—e tusa lava pe na o lou mafaufau i se mea ae e te lei faia—e lei faia lava faapena i le talafaasolopito atoa. E le o le mea o e i ai, e le o le taimi tonu lenei, ma e le o oe.

O lenei gaoioiga laitiiti ua faamamafaina ai se manatu taua: e leai lava se isi tagata e pei o oe, pe i ou tulaga tutusa. E oo lava i nai ou tei. I le lalolagi atoa, e leai se isi e tutusa ni lua tuufaatasiga patino o taleni, tomai, faauoga, aiga, meaalofa faaleagaga, ma vaaiga patino.

E pei o Eseta mai le Feagaiga Tuai, e tulaga ese lou agavaa i “se taimi faapenei” (Eseta 4:14) ina ia i ai se aafiaga tele mo le lelei i olaga o tagata uma e te iloa.

E i ai ni mea taua e tatau ona e faia!

Mai le Matuaoti i le Aiga Tautupu

A o e suesue i le Feagaiga Tuai i lenei masina o se vaega o le Sau, Mulimuli Mai ia te A‘u, o le a e aoao ai e uiga i se tamaitai talavou maoae i Iutaia e igoa ia Eseta. I se taimi i lona olaga talavou, sa matuaoti ai Eseta ma tausia e sona tauaiga, o Moretekai. Sa ola ae o ia i se taimi na ave faatagataotaua ai tagata Iutaia e se atunuu ese.

I le avea ai ma se teineitiiti matuaoti o loo nofo i se nuu ese, atonu na te lei mateia lava o le a i ai se aso e avea ai o ia ma se masiofo. Ae o le mea tonu lava lena na tupu (tagai Eseta 2). Sa filifilia o ia o se avā faaipoipo a le tupu, o Asueru.

Ae i se tasi aso sa feagai ai o ia ma se luitau matautia: O le nuu o Eseta, o tagata Iutaia, sa faafuasei ona i ai i se tulaga lamatia o le faaumatiaina. O lana tane, o le tupu, ina ua uma ona faalogo i le fautuaga a ana faufautua, na pasia se tulafono o le a fasiotia tagata Iutaia uma i le aai i se aso patino na te fofogaina.

O lenei, sa toatele tagata sa nonofo i le aai. Sa toatele foi Iutaia sa nonofo i le aai. Ae sa na o le tasi le Masiofo o Eseta. Ma sa na o ia le tagata e mafai ona faia soo se mea e taofia ai lenei faalavelave.

E pei lava o le Masiofo o Eseta, e na o le tasi lava oe. Ua na o oe e mafai ona faia mea e mafai ona e faia—o mea e manaomia oe e le Alii e fai. O mea e mafai ona taitai atu ai i le faaolataga o tagata e toatele.

Tali i Tatalo

Faafetai e le tele se avanoa o le a e taulimaina ai se mea e matautia ma taufaafefe e pei ona sa feagai ma Eseta. Ae e le faapea la e le taua tele lou faamoemoega i le olaga.

E pei lava o Eseta, ua taialaina ma saunia oe e avea ma tagata ua avea ai oe i le taimi nei. Ma o lena sauniuniga o le a faaauau pea a o e mulimuli ia Iesu Keriso. E mafai ona avea oe ma tali i tatalo o aso taitasi a le toatele o tagata.

Ioe, e oo lava i au taleni ma tomai uma, e sili lava i taimi uma le ole atu mo se fesoasoani faaleagaga i le ala e pei ona sa faia e Eseta.

Faatuatua, Talitonuga, ma Oe

Sa iloa e Eseta e tatau ona ia taumafai ma laveai lona nuu. Sa ia iloa foi sa ia manaomia le faatuatua faaopoopo ma le lagolago a lona nuu a o ia sailia le fesoasoani mai le Atua. “Alu ia oe, ia e faapotopoto i sa Iutaia uma o i ai i Susana, ma ia anapopogi outou ona o au, aua foi nei outou aai, aua foi le inu i aso e tolu i le po ma le ao; o au foi, ma lou galu teine matou te anapopogi faapena; e faapena foi ona ou alu atu ai i le tupu o le mea e le tusa ma le tulafono; afai ou te oti ai, oti ai pea ia.” (Eseta 4:16).

A oo ina faigata le olaga, e liliu atu ma le faatauanau atili e faamaoni i le Atua. Sa manaomia e Eseta le fesoasoani uma e mafai ona ia maua. E le gata ina sa ia manaomia le fesoasoani i le talanoa atu i lana tane i lana poloaiga, ae sa lamatia foi lona lava ola e ala i le alu atu i le tupu e aunoa ma le samania muamua (lea sa le tusa ai ma le tulafono, e oo lava i le masiofo).

Na e iloa lona talitonuga ma le faatuatua? E aoga le faitau faalua: “Afai ou te oti ai, oti ai pea ia,” o le tala lea a Eseta. O na upu mamana na toe faaleo mai e Sataraka, Mesako, ma Apeteniko i le Tupu o Nepukanesa ina ua latou mumusu e tapuai i le faatusa auro o le tupu.

E tusa lava pe na ia faamata‘uina e lafo i latou i totonu o le ogaumu ona o le le usitai, sa latou fai mai ma le lototoa, “Afai o lea, ua mafai lo matou Atua, matou te auauna i ai, ona laveai mai ia te i matou ai le ogaumu e mū ai le afi, na te laveaiina mai lava i matou ai lau pule le tupu.

“A le o lea, ia e silafia e oe le tupu e, matou te le auauna i ou atua; o le tupua auro foi ua e faatuina, matou te le ifo i ai” (Tanielu 3:17–18, ua faaopoopo le faamamafa).

“A le o lea” ma le “Afai ou te oti ai, oti ai pea ia” o ni faamatalaga ofoofogia o le faatuatua. O lenei ituaiga o faatuatua mamana e i ai e tusa lava po o a taunuuga. O le toa o Eseta na i’u ina faasaoina ai lona nuu! E ui lava i lea, sa ia iloa i le amataga, e pei foi o Sataraka, Mesako, ma Apeteniko, e ui o taunuuga o le filifilia o le faatuatua e le o taimi uma e mautinoa ai, ae o le faia o le mea sa‘o o le filifiliga sa’o lava lea.

Atonu o le a i ai ni taimi i lou lava olaga e faigata ai le filifili o se ala amiotonu. E leai se tasi o i tatou e saoloto mai tofotofoga faigata o le olaga nei. Ae o iinei foi e mafai ona e filifili ai ia pei o Eseta. Filifili le amiotonu; ia tuu atu i taunuuga e mulimuli mai.

O le mea moni, ua na o oe lava oe ma o le a leai lava—o lou “taimi faapena” e avea ai le lalolagi o se nofoaga sili atu ona lelei i le taimi nei.