“E faapefea ona ou filifilia se taimi sili e auauna atu ai i se misiona?,” Mo Le Malosi o le Autalavou, Iulai 2022.
Fesili ma Tali
“E faapefea ona ou filifilia se taimi sili e auauna atu ai i se misiona?”
E Saunia e le Alii se Ala
“E i ai se galuega a lo tatou Tama Faalelagi mo i tatou e fai. A tatou faitau i Ana afioga, ma upu a Ana auauna filifilia, e mafai ona tatou iloa ma le mautinoa le mea e finagalo o Ia tatou te faia. Ua tatou iloa o le a saunia e le Alii se ala mo i tatou e faataunuu ai mea ua Ia poloaiina i tatou e fai (tagai i le 1 Nifae 3:7). O le a i ai pea o Ia iina mo i tatou pe afai tatou te taumafai e usitai i Ana poloaiga.”
Manuela O., 15, Kana
Atonu E Te Le Lagonaina Lava le 100% o le Saunia
“O au o se tagata faase’egalu faapolofesa, ma na ou tuua lena mea ina ia maua le olioli moni lea e sau mai le auauna atu i se misiona. Sa ou faatalitali seia oo ina ou lagona ua ou saunia moni lava e alu, ma ua faamanuiaina au mo lena mea. O se filifiliga i le va o oe ma lou Tama o i le Lagi. Atonu e te le lagonaina lava le 100% o le saunia. O le auina atu o au pepa o le misiona o le a avea pea ma se oso o le faatuatua, ma e matuai aoga lava.”
Jordan C., 22, Kalefonia, ISA
O Le a Saunia ma Faamalosia Oe e le Alii
“E mafai ona e ole atu i taimi uma i le Alii i le tatalo. E faamamanaina e le Alii i latou ua Ia valaauina e avea ma faifeautalai. Ina ua maliu lo‘u tama, sa faamafanafanaina a’u i la‘u molimau i le fuafuaga o le faaolataga. Ae e toatele tagata i lenei lalolagi e le o iloa lava le fuafuaga a le Tama Faalelagi. Ou te iloa o loo saunia e le Alii tagata mo au e aoao.”
Felipe F., 17, Pasila
Tusi i Lalo Uunaiga
“Ina ua ou tatalo e uiga i le auauna atu i se misiona, sa ou tusia i lalo uunaiga na ou maua mai lauga, musika, po o uo. Ina ua ou lagona le lotovaivai a o sauniuni mo la‘u misiona, ou te toe foi ma faitau i mea na ta’u mai e le Agaga ia te a‘u. Sa ou auina atu a‘u pepa ma faalagolago i le Alii. Pe a e agai i luma ma le faatuatua, e te le iloa pe faapefea ona tupu, ae o le a e matauina le aao o le Atua i le faiga o au filifiliga!”
Bryanna M., 19, Oregon, ISA
Ia Maua Lou Faamanuiaga Faapeteriaka
“Talu ona ou maua lou faamanuiaga faapeteriaka, na ou iloa ai e tatau ona ou faasoa atu le talalelei. O loo ou sauniuni nei mo se misiona e ala i le faasoaina atu o le talalelei i au uo. E tusa lava pe ou te lagona o le auauna atu i se misiona talai e le sa’o mo au pe a ou matua, ae ou te iloa e mafai lava ona ou faasoa atu le talalelei i lou olaga atoa.”
Elise D., 14, Florida, ISA
Ole Atu i le Alii ma Isi
“Atonu e na o le 14 ou tausaga, ae sa ou mafaufau loloto lava i lenei fesili. A oo mai le taimi ou te filifili ai po o afea e tatau ona ou auauna atu ai, o le a ou tatalo i le Alii e fesoasoani mai ia te au ia maua la‘u tali. O le a ou talanoa foi i tagata e sili ona latalata mai ia te au, e aofia ai lo‘u aiga, epikopo, ma uo.”
Jordan V., 14, Nevada, ISA
O Le a Tuu Atu e le Alii ia te Oe se Tali
“Sa i ai pea ia te au se manao e auauna atu i se misiona, ae ou te iloa e le o se filifiliga faigofie. Afai tatou te saili ma le filiga e suesue i tusitusiga paia ma tatalo e le aunoa i le Tama Faalelagi, ou te iloa o le a Ia taialaina i tatou. Faalagolago i le Alii. O le a Ia ta‘u atu ia te oe le taimi sa’o mo oe e auauna atu ai i se misiona. Saili pea se tali, ma o le a e mauaina ma lagona le saunia.”
Nicolle R., 14, Pasila
Saunia Faaleagaga, Faalemafaufau, ma Faaletino
“Tatalo ma le faamaoni ma mafaufau loloto i tusitusiga paia e uiga i lau filifiliga. Ia faalogo lelei i mea e ono musumusu mai ai le Agaga pe ta‘u atu ia te oe. Ma i le taimi nei, e mafai ona e auai i sauniga faamanatuga uma, seminare, vasega o le aoga Sa, ma vasega a Tamaitai Talavou po o sauniga a korama a le Perisitua Arona. E mafai foi ona e saunia faalemafaufau ma faaletino.”
Addison H., 14, Iuta, ISA