O Nisi Mea Sili

Saunia e David A. Edwards

Mekasini a le Ekalesia

E foliga mai o mea laiti ma faatauvaa o se mea tele lava.

Faapea la e i ai sou faafitauli faalesoifua maloloina o le a le te’a ese lava. Ua ta‘u atu e se tasi ia te oe e uiga i se tagata e mafai ona faamaloloina oe. E nofo mamao o ia, ae e te tusi atu ia te ia ona e malaga lea ina ia mafai ona e vaai ia te ia ma faalogo i mea e tatau ona ia fai atu.

Ina ua e taunuu atu i lona fale, ua sau i fafo lona fesoasoani ma fai mai ua fai mai lona pule e te alu e taele i se vaitafe lata ane.

Ona toe foi lea o le fesoasoani, ma ua tuua oe ma le lagona o le le fiafia. Ua e manatu, “Na ou sau mamao lava mo lena mea?”

Faamoemoega

O le mea tonu lava lea na tupu ia Naamanu. O ia o se kapeteni Suria—o se alii faaaloalogia lelei ma le tele o tiutetauave. Ae sa lepela o ia, o se faamai matautia o le pa‘u.

E ui lava e le o ia o se Isaraelu, ae sa faalogo o ia e uiga i le perofeta o Elisaia ona o se auauna teine talavou na sau mai Isaraelu. Sa talitonu Naamanu i lana molimau e uiga ia Elisaia ma le Atua o Isaraelu. O lea na alu ai o ia e vaai Elisaia. Ina ua taunuu atu Naamanu i le fale o Elisaia, sa auina atu e Elisaia se avefeau, o le sa fai atu ia Naamanu e taele faafitu i le vaitafe o Ioritana ina ia faamaloloina ai.

Ata

O loo faalogologo atu Naamanu i le auauna

Ata na tusia e Corey Egbert

Sa ita Naamanu. Sa mafaufau o ia o le a la feiloai ma Elisaia ma o le a tuu e Elisaia lona lima i luga o le vaega tonu o le pa’u o loo i ai le faama’i, valaau atu i le Atua, ma faamalolo faavavega ai. Sa ia mafaufau foi e tele atu vaitafe e sili atu i lona nuu e mafai ona ia taele ai.

Na ia Naamanu ni faamoemoega sili atu. Sa ia faamoemoe e sau i fafo Elisaia e vaai ia te ia. Atonu na mafua ona sa i ai se tulaga maualuga o Naamanu ma sa masani i lona mauaina o se faaaloalogia patino. Sa ia faamoemoe foi o se fofo e sili atu ona faavavega pe faagaeetia nai lo le mea na ta’uina atu ia te ia. Masalo ona o tala sa ia faalogo i ai e uiga ia Elisaia. O lea na oo ai o ia i se lagona ita tele.

Lotomaualalo

Ae e le muta ai iina le tala a Naamanu. Sa ofo atu e se tasi o ana auauna ia te ia se fautuaga atamai tele:

“Ana fai atu e le perofeta se mea tele ia te oe, e te le faia ea? a o lenei, e te le faia ea ina ua ia fai atu ia te oe, E te taele, , e te mama ai?” (2 Tupu 5:13).

Na iloa e Naamanu e sa‘o le auauna. Ana fai atu le perofeta ia te ia e fai se mea telē, semanu na te faia lava. Aisea la e le faia ai le mea faigofie? Sa ia faamaualaloina o ia lava. Sa fufui faafitu o ia i le vaitafe o Ioritana ma sa faamaloloina ai.

Ata

O Naamanu o loo taele i Ioritana

O Mea Laiti ma Faatauvaa

E i ai taimi e fetalai mai ai le Alii i se tagata e fai “se mea telē.” Ae e le masani ona faapena le ala e galue ai le Alii. O le tele o taimi Na te faaaogaina ai “mea laiti ma faatauvaa” e faataunuu ai “mea tetele” i o tatou olaga (Alema 37:6).

O nisi taimi o o tatou faamoemoega po o lo tatou faamaualuga e mafai ona tatou mafaufau ai faapea o le ala a le Alii e faigofie tele pe laitiiti tele e le aoga ai o tatou taimi (tagai 1 Nifae 17:40–41). Ae e mafai ona fesoasoani le Alii ia i tatou e faatoilalo nei lagona ma faalotomaualaloina i tatou lava. E alofa o Ia ia i tatou ma e finagalo e faamanuia i tatou ma fesoasoani ia i tatou ia avea atili e faapei o Ia (tagai Mose 1:39).

Ua na o ni nai faataitaiga nei o mea laiti ma faatauvaa ua poloaiina i tatou e le Alii e fai e faalatalata atili atu ai ia te Ia ma maua Ana faamanuiaga.

Tatalo ma faitau tusitusiga paia i aso taitasi (tagai 2 Nifae 32:3, 9).
Pe a e agasala, salamo (tagai Mataupu Faavae ma Feagaiga 1:31–32).
Auai i le lotu ma aai ma feinu i le faamanatuga i vaiaso taitasi (tagai Moronae 6:5–6).
Totogi le sefuluai (tagai Malaki 3:8–10).
Ola i le Upu o le Poto (tagai Mataupu Faavae ma Feagaiga 89).
Ia faamaoni (tagai Mataupu Faavae ma Feagaiga 51:9).
Ia agalelei (tagai Efeso 4:32).
Auauna atu i isi (tagai Mataio 25:34–40).

Atonu e mafai ona e mafaufau atili i ai.

O lea la, pe a e tau atu i se mea laitiiti ma faatauvaa, ia gauai atu i ai. Atonu o se taiala i le tamaitusi Mo Le Malosi o le Autalavou, nisi o fautuaga i se lauga o le konafesi, po o se mea na talosagaina oe e lou epikopo e fai. Po o le a lava, manatua Naamanu, ma fai loa. Atonu e itiiti, ae o le a maoae faamanuiaga.