“O Le Mana Ofoofogia o le Loto Faafetai,” Mo Le Malosi o le Autalavou, Iulai 2022.
O Le Mana Ofoofogia o le Loto Faafetai
E le na o le manaia o le faafetai—e mafai ona suia ai lou olaga.
E pei ona fautua mai Peresitene Russell M. Nelson, “O le faitauina o o tatou faamanuiaga e sili mamao atu nai lo le toe faamatalaina o o tatou faafitauli. … O le [loto faafetai] e aumaia ia i tatou se vaaiga sili atu e uiga i le faamoemoega tonu ma le olioli o le olaga.”1
E moni! O le loto faafetai e aumaia ai le tele o faamanuiaga. O le loto faafetai e mafai ona fesoasoani ia te oe ia fiafia atili ma maloloina atili, faaleleia atili ai le tulaga lelei o lau moe, faamalosia ai lou soifua maloloina faalemafaufau ma le faaletino, ma fesoasoani ai ia te oe ia sili atu ona lelei ma agaalofa i isi. O le tele o lou loto faafetai, o le lelei foi lena o le mafai ona e taulimaina luitau o le olaga. I le iuga, o le loto faafetai e mafai ona faalatalata atili atu ai oe i le Atua, o le e tuuina mai mea lelei uma (tagai Iakopo 1:17).
Mo Ester Carneiro Ponciano mai Pasila, o le tusia o se lisi o mea na te faafetai ai e faafiafiaina ai o ia ma fesoasoani ia te ia ia maua le malosi ma le lototele i taimi faigata.
Lisi o le Loto Faafetai a Ester
1 O Le Talalelei
Ata na tusia e Emily Davis
A o ou suesue i tusitusiga paia, tatalo i aso uma, auai i le seminare, ma auai i le lotu, ou te lagona le musuia e taumafai ia lelei atili. E aumaia e le talalelei le faamoemoe o le a oo mai aso sili atu. E aumaia moni ai le fiafia e faavavau.
2 O Lo‘u Aiga
E toaono tagata i lo’u aiga, o lea e tumu ai lava lo matou fale i taimi uma! Matou te faaaluina faatasi le taimi e taaalo ai i taaloga laupapa, savavali i fafo, kuka, ma suesue le Sau, Mulimuli Mai ia te A‘u. O lo‘u aiga o lo’u nofoaga saogalemu lea. E mafai ona ou avea ma lo’u tagata moni faatasi ma i latou. Matou te le atoatoa, ae matou te matua fiafia lava. Ou te faafetai i le i ai o tagata e mafai ona ou faatuatuaina i taimi uma.
3 Uo
E oo lava i se faama‘i oti sa le mafai ona motusia ai a’u faauoga moni. Ina ua le mafai ona matou faatasitasi patino, sa matou maua pea ni auala e mafuta ai ma le tasi ma le isi. Matou te fiafia e talie ma pepese faatasi. Ou te fiafia e fetufaai taimi ma au uo. Ou te faafetai mo i latou taitoatasi.
4 Faamalositino
I se taimi ua mavae, semanu e le i ai se faamalositino i la‘u lisi o le loto faafetai. Sa ou le fiafia e faamalositino. Ona ou taumafai lea e tietie i se uila ma iloa ai ou te fiafia i ai! Pe a ou tietie i la‘u uila, ou te lagona le fiafia. Ou te lagona e pei o le lalolagi o siomia a‘u o se nofoaga e sili atu ona lelei. Ou te maua ai le taimi e mafaufau ai, vaai i le natura, ma lagona ai le alofa o le Tama Faalelagi. Pe a ou popole pe faanoanoa, e fesoasoani ia te au e faatoafilemu ai. Pe a ou i ai i luga o la’u uila, e mafai ona ou iloa le faitau afe o mafuaaga e fiafia ai ma lotofaafetai.
5 Musika
O musika e aumaia ia te au le fiafia tele. O le a le tutusa lo‘u lalolagi e aunoa ma musika. Ou te fiafia e pese ma faalogologo i musika talu mai lo‘u laitiiti lava. O musika e i ai le mana e siitia ai i tatou, ma e mafai foi ona tatou lagona ai le toafilemu. Ou te fiafia lava e faalogologo i musika a le autalavou mai le Ekalesia.
O Le Loto Faafetai e Aumaia le Olioli Moni
A o ou tilotilo atu i lo‘u olaga i mata o le loto faafetai, ou te vaai i le ala o loo i ai le Alii i taimi uma i lo’u olaga, po o le a lava le faigata o mea. Ua ou iloaina o mea aupito faigofie e mafai ona aumaia ia i tatou le fiafia silisili. Pe a e tilotilo solo ma vaai po o le a tonu lava le mea e taua, e mafai foi ona e maua ai le olioli moni.
O Le A Se Mea E Te Faafetai Ai?
O le mea malie e uiga i le faia o se lisi o le loto faafetai, o le taimi lava e te amata ai, e faigata ona taofi. Faataitai i ai! Faaalu se taimi e tusi ai lau lisi o le loto faafetai. Mafaufau i ni auala e mafai ona e faailoa atu ai lou loto faafetai i le Tama Faalelagi ma isi mo nei meaalofa. Atonu e te iloaina o le tele o mea e te tusia i lalo, o le tele foi lea o mea o le a e mafaufau e faafetai ai!