“Aua Le Fefe, ua Faatasi le Alii ma Outou” Mo Le Malosi o le Autalavou, Iulai 2022.
Upu Faaiu
Aua Le Fefe—Ua Faatasi le Alii ma Outou
E le fou le fefe. Talu mai taimi anamua, ua faatapulaaina e le fefe le vaai a fanau a le Atua. I le 2 Tupu, na auina atu e le tupu o Suria se autau e pue ma fasioti le perofeta o Elisaia.
“Ua tulai le auauna a [Elisaia] i le taeao lava, ua alu i fafo, faauta, o ‘au ua sio le aai ma a latou solofanua ma kariota. Ona fai mai ai lea o le auauna [a Elisaia] ia te ia, Aue! le alii e, pe faapefea se mea tatou te fai a’i?” (2 Tupu 6:15).
O le fefe lena na tautala.
“Ona tali atu lea o [Elisaia], Aua e te fefe: aua e toatele ua ia te i tatou i e ua ia te i latou.
“Ona tatalo ai lea o Elisaia, ua faapea atu, Ieova e, ia e faapupula i ona mata, ina ia na iloa. Ona faapupulaina lea e Ieova o mata o le taulealea, ona iloa ai lea e ia, faauta foi, ua tumu le mauga i solofanua ma kariota afi ua latou vagavagai ia Elisaia.” (2 Tupu 6:16-17).
Atonu e i ai pe leai foi ni a tatou kariota o afi na auina mai e faate’a lo tatou fefe ma faatoilalo o tatou temoni, ae ua manino le lesona. E faatasi le Alii ma i tatou, silafia i tatou ma faamanuiaina i tatou i auala e na o Ia e mafaia.
Afai tatou te faalagolago atoatoa i le Alii ma Ona ala, afai tatou te punouai i Lana galuega, o le a tatou le fefefe i faiga a le lalolagi pe atuatuvale ai foi. O loo leoleoina i tatou e le Alii, tausia i tatou, ma tu i o tatou tafatafa.