“Saunia mo le Malumalu o Dubai,” Mo Le Malosi o le Autalavou, Iulai 2022.
Saunia mo le Malumalu o Dubai
Ua fefaasoaai e le autalavou i Dubai ma Qata lo latou fiafia i le malumalu ma lo latou sagisagi atu i le malumalu o loo fausia e lata ane ia i latou.
Ata pue o Saajan na pueina e Carla Nacario
Ua na o ni nai upu faigofie, ae latou te suia lou olaga pe a saunoa mai e se perofeta a le Atua. I le taimi o le konafesi aoao, e faalogologo ma le naunautai tagata o le Ekalesia i le lalolagi atoa mo faasilasilaga o malumalu fou. Ma mo Sajaan ma Gwen, o le taimi lava na saunoa ai Peresitene Russell M. Nelson i upu, “Dubai, United Arab Emirates,” i le konafesi aoao o Aperila 2020, sa iloa ai e nei talavou e toalua o le a le toe tutusa lava o laua olaga.1
Feiloai ia Saajan mai Dubai
E lei vaai lava Saajan e sefululua tausaga i se malumalu.
“E i ai lava i taimi uma se sini a lo‘u tina e alu i le malumalu,” o le tala lea a Saajan. “O lona fiafia mo le malumalu e pei o se faama’i pipisi. O la‘u sini la i le olaga o le asiasi atu lea i le malumalu.”
Sa fanau Saajan i Initia, ae ina ua tatala le faaipoipoga a ona matua, sa la siitia atu ma lona tina i le United Arab Emirates. “E galue malosi lo‘u tina. E pei o ia o se toa malosi ia te au. E oo lava i taimi faigata, na te le faavaivai lava.”
Sa auai le tina o Saajan ma lona tinamatua i le Ekalesia i Initia i ni nai tausaga a o lei fanau mai o ia. Sa la faitauina le Tusi a Mamona ma iloa ai o se tali lea i a la tatalo. Sa ola ae Saajan o o ma lona tina i le lotu, ma e lei leva ona papatisoina o ia ina ua uma ona faatalitali mo le faatagaga a lona tama.
“O le papatisoina o se tasi lea o filifiliga sili ua ou faia,” o lana tala lea. “Ma ina ua ou mauaina le meaalofa o le Agaga Paia, sa ou lagonaina le mafanafana ma le olioli tele i lou loto.”
O lea la ua tufaina e Saajan le faamanatuga mo lana uarota ma sauniuni e ulu atu i le malumalu. Sa ia mauaina lana pepa faataga o le malumalu, ma ua le mafai lona fia ulufale atu i le Malumalu o Dubai United Arab Emirates pe a maea.
“Ina ua ou faalogo ua latou fofogaina mai le malumalu, sa ou lagonaina patino lava e mo au,” o le tala lea a Saajan. “O se tali i a matou tatalo. Sa ou tei aua ua latou fausia i le mea tonu o loo matou nonofo ai! O le a mafai ona ou alu sa‘o lava i se nofoaafi i le malumalu ma alu soo pe a ou manao ai. Ua ou fiafia foi mo le Malumalu o Bengaluru Initia lea o le a mafai ona asiasi i ai ou matua matutua.”
Ua fiafia Sajaan i le latalata ane o le malumalu o Bengaluru Initia i ona matua matutua.
E manao foi Saajan e fai galuega faalemalumalu mo isi foi ona tuaa.
“O loo ou saunia au lava ina ia ou agavaa e ulu atu i le malumalu. Ou te fia faia le mea ou te mafaia e fesoasoani ai i o‘u tuaa uma. Ua ou maua se avanoa fiafia e auauna atu ai i le Alii ma faia mea tau i le malo o le Atua.”
Feiloai ia Gwen mai Qatar
Ata pue o Gwen na pueina e Christina Smith ma faaaloaloga a lona aiga
I ona uluai tausaga e 18 o le olaga, sa nofo ai Gwen i ni atunuu eseese se lima: Sikotilani, Angola, Egelani, Kazakhstan, ma Qatar. O le galuega a lona tama ua oo atu ai i latou i le lalolagi atoa, ae talu ai nei lava, i Sasae Tutotonu.
Ua siitia ese uma tei matutua o Gwen, o lea e nofo ai o ia i Qatar faatasi ma lona tina ma lona tama. O se tasi o ona aafiaga e sili ona fiafia i ai o le malaga faatasi ma le autalavou i lana uarota mo se malaga i le malumalu i le Malumalu o Kiev Iukureini. E leai se malumalu e lata ane, o lea e tatau ai i le Au Paia i Sasae Tutotonu ona felelei e asiasi i malumalu i isi atunuu.
“Sa matuai ou fiafia lava mo la matou malaga, ma sa ou manao e aumai igoa o le aiga,” o lana tala lea. “O aso uma lava ou te maua ai igoa o le aiga i la‘u telefoni a o alu atu ma toe foi mai le aoga. Sa ou maua pe tusa ma le 200 igoa. Sa ou lagona le saunia e alu!”
Ae sa i ai se faafitauli laitiiti e tasi sa le mafai ona ia saunia i ai.
O se faama‘i oti i le lalolagi atoa.
Sa tulaueleele le vaalele a Gwen i Iukureini ia Mati o le 2020—i le taimi tonu lava na amata ai ona latou faalogo atili e uiga i le salalau o le vairasi o le KOVITI-19. Faatasi ai ma le fesoasoani faalelagi, sa latou oo atu ai i le malumalu ma mafai ona faatino papatisoga mo igoa o le aiga na saunia e Gwen.
“Sa i ai se vavega ma lea vavega ma lea vavega,” o lana tala lea. “I le matou malaga atu i le malumalu, sa ou popole i le faama‘i oti. Ae i totonu o le malumalu sa ou lagonaina ai le tele o le filemu ma le mafanafana. Ma sa mafai ona matou toe felelei atu i Qatar i le taimi tonu lava a o lei tapunia faigamalaga.”
Ae o le tina o Gwen, o le sa alu e asiasi i se tasi o tei o Gwen i le Iunaite Setete o Amerika, sa le mafai ona toe foi ane i Qatar. Sa faanofoesea Gwen ma lona tama i le fale ina ua maua lona tama i le KOVITI. “Mo se taimi sa ma‘i tigaina ai o ia ma sa le mafai ona minoi tele ai,” o le tala lea a Gwen. “Sa ou lagona le tuuatoatasi. E lei sau lava lou tina, ma sa ou le iloa pe faapefea ona fai ni meaai se tele e ese mai se sanuisi sisi faapa’u.”
Ae sa i ai se aafiaga faapitoa a Gwen a o faia le lotu i le fale faatasi ma lona tama.
“Sa pei o tagata o o latou igoa na matou aveina i le malumalu sa faatasi ma a‘u ma lo’u tama,” o lana tala lea. “Ou te lei toe lagonaina le tuuatoatasi. Sa avea o se aafiaga lelei tele. O le asiasi atu i le malumalu a o lei oo i le faama‘i oti sa o se faamanuiaga tele.”
Na fofogaina mai le Malumalu o Dubai United Arab Emirates i le na o se masina talu ona maea lana malaga i le malumalu i Iukureini. Sa matua’i fiafia lava Gwen! Ma na te iloa le taua tele o lena mea i tagata i lana eria.
“Ou te iloa o loo i ai tagata i la‘u eria e le gafatia ona felelei atu i se isi malumalu i Europa. Ua leva ona latou faatalitali ina ia faamauina o ni aiga e faavavau. Ua faaali mai ai ia te au o loo tupu moni lava le faapotopotoina. O loo tatou saunia le ala mo le toe afio mai o Keriso.”
O Faamanuiaga o le Malumalu
O le mea e tasi e tutusa ai Gwen ma Saajan o le faamanuiaina lea o o laua olaga e le malumalu. Na saunoa Peresitene Nelson, “O malumalu o se vaega silisili o le Toefuataiga o le atoatoaga o le talalelei a Iesu Keriso. I le lelei ma le agaalofa o le Atua, o loo Ia aumaia ai faamanuiaga o le malumalu ia latalata atili mai i Ana fanau i soo se mea.”2