O le Autū ma A’u

Ua faasoa mai e le autalavou auala o loo latou ola ai i upu o Autū a Tamaitai Talavou ma le Korama a le Perisitua Arona

Ua Ou Iloa o le a Ou Toe Vaai ia te Ia

“O le a ou agavaa e maua faamanuiaga o le malumalu ma le olioli tumau o le talalelei.”

Saunia e Joshua Llamas

Ou te talitonu na tuuina mai e le Alii ia i tatou ni aiga ina ia mafai ona tatou fesoasoani e faamalolosia ma lagolago e le tasi le isi. Na tuuina mai foi e le Alii ia i tatou ni aiga ina ia le tuua na o i tatou. Ae ina ua maliu lo‘u tama, sa ou lagonaina le tuuatoatasi. Sa ma vavalalata ma lo‘u tama, ma ua lilo atu lana faataitaiga masani. Sa pei na pau le mea na mafai ona ou faia o le tagi.

Ae i se tasi po, sa ou filifili ai e fai se tatalo. I lo‘u loto sa ou lagonaina le Agaga o ta’u mai ia te a‘u e le o tuua na o a’u. Ou te iloa le fuafuaga o le faaolataga. Ona o le Togiola a Iesu Keriso, o le a ou toe vaai i lo’u tama. O le malamalama e mafai ona faatasia aiga e faavavau e taua tele ia te au. Ma ou te iloa e mafai ona avea i matou o se aiga e faavavau ona sa faamauina o‘u matua i le malumalu.

Ina ua atoa lo‘u 12 tausaga, sa ou fuafua e auai i le malumalu e faia papatisoga mo e ua maliliu mo le uluai taimi. Ae na tapunia malumalu ona o le faama‘i oti. Ou te tulimatai atu lava i le i ai i totonu o le malumalu mo le taimi muamua e lagona ai le olioli iina.

Ina ua faamauina lo‘u uso i lona toalua, sa ou nofo i fafo o le malumalu. Ae e oo lava mai fafo, sa ou lagonaina se lagona matagofie i lo‘u loto. Sa mafai ai ona ou vaai faalemafaufau i lagona o loo maua i totonu. Sa ta‘u mai e lo’u aiga ia te a‘u o le malumalu o se nofoaga e mafai ona matou fiafia ai i le fuafuaga atoatoa ua saunia e le Atua mo i matou.

Ua ou aoaoina foi mai aoaoga a perofeta e mafai ona ou osia feagaiga paia i le malumalu. O feagaiga uma tatou te osia i totonu o le malumalu e matua taua lava. Sa ou mauaina la‘u pepa faataga o le malumalu, ma ua le mafai ona ou faatali e faaaoga. Ma ou te iloa i se aso pe a faamauina a‘u i lo’u toalua i le lumanai, o le a mafai ona ou maua lo‘u lava aiga e faavavau.

E alala le tusitala i Culiacan, Mekisiko.