“Jisas Kraes I Givim Hop long Yumi,” Blong Ol Yut Oli Kam Strong, Septemba 2022.
Jisas Kraes I Givim Hop long Yumi
Taem yumi givim seves long ol narafala man, Jisas Kraes i givim hop long yumi se, evri samting bae i oraet long wanwan laef blong yumi.
Ol yang man long CKusko, Peru, oli wok tugeta blong givim seves.
Laef ia i fulap long plante jalenj. Ating yu stap eksperiensem sam finis. I gat plante samting we i oli hapen from oli risal blong taet, tingting tumas, fraet mo wari. Taem yumi eksperiensem ol samting ia, i mekem yumi rere blong lukluk moa insaed long yumiwan—blong kea long ol nid blong yumiwan bitim eni narafala samting. Yumi ting se sapos yumi spenem moa taem mo paoa blong yumi blong stap traem blong “fiksim” ol samting, yumi save faenem wei aot long ol problem blong yumi.
Be Jisas Kraes i bin soem long yumi, wan wei we i moa gud. Hem i bin tijim: “Man we i wantem sevem laef blong hem, hem bambae i lusum laef blong hem, be man we i lusum laef blong hem from mi, hem bambae i kasem laef blong hem” (Luk 17:33). Kwik wei blong faenem hop long ol tes blong laef blong yu i blong tanem hat blong yu i go long Sevya mo blong folem eksampol blong Hem mo givim seves long ol narafala man.
Hiling long Betsaeda, i kam long Gary Smith
Laef blong Sevya i stret eksampol blong lav mo gudfala fasin long ol man. Oltaem Hem i putum ol narawan fastaem long Hem. Ol kaen fasin blong Hem i soem tru long evri samting we Hem i mekem evri dei long laef blong Hem, mo i nogat limit blong stop.
Taem yumi tanem hat blong yumi i go aot olsem we Sevya i bin mekem, mi save promesem yu se bae yumi faenem ol janis we i no gat en, blong yumi givim yumiwan kwaet mo wetem kaen fasin long ol pipol we oli nidim yumi.
Hemia bae i helpem yumi blong kam blong save Sevya moa, mo faenem pis blong yumiwan long wol ia, iven sapos yumi developem moa lav long ol narawan. Taem yu “lusum laef blong yu” blong stap helpem ol narawan, stap folem eksampol blong Sevya, Hem bae i helpem yu.
Enjel blong Evri Dei
Plante taem Sevya bae i lidim ol narawan blong kam insaed long laef blong yumi blong help blong karem pis mo kamfot i kam long yumi, taem we yumi nidim. Ol pipol we oli kasem blesing ia, oli olsem ol enjel we oli sendem olgeta long heven i kam long yumi, yes i tru oli ol enjel.
Famli blong mi mo mi i bin kasem kamfot mo pis long plante long ol defren ples we wan grup blong ol enjel blong tedei i karem i kam long mifala. Mi wantem blong luklukbak long wan long ol taem ia. Long 2003, mifala i bin muvaot long hom kantri blong mifala long Brasil i go long Yuta long Yunaeted Stet.
Long winta ia, mifala i bin gat wan bigfala strong win blong sno long Yuta, we i no bin hapen blong plante yia. Mifala i neva bin luk wan samting olsem long laef blong mifala, from mifala i groap long medel blong ol pamtri mo ol sanbij. Hom blong mifala i stap long wan kona long wan hil, we i gat wan longfala rod blong man i wokbaot long hem.
Taem we sno i stat, waef blong mi we i gat strong paoa long tingting i stat blong karemaot ol sno long rod blong draev mo ples blong wokbaot we i kam long haos Mi no bin save help from mi bin glis mo foldaon long aes mo brekem joen blong han blong mi long sam dei we i jes pas. Aksiden ia, i mekem se oli pasem mi long wan operesen mo oli putum bigfala simen raon long han blong mi.
Taem hem i bin stat blong karemaot sno long eria ia blong fastaem long laef blong hem, dia waef blong mi i no bin save se hem i mas jenisim paep we sno i stap kamaot long hem long masin blong karemaot sno blong i fesem nara daereksen, afta we hem i klinim wan saed blong rod blong draev. Taem hem i go long narafala saed blong klinim sno, ples ia nao we paep blong masin blong karemaot sno bae i sakem sno long hem. Hem i go mo kam, be nogat nao. !I mekem bigfala doti!
From se hem i stap longtaem tumas long kolkol, hem i kasem soa long sora, mo hem i no save harem samting blong 2 manis. Long semtaem, boe blong mi we i gat 16 yia, i kasem kil long bak blong hem taem hem i bin stap ski, mo i mas stap long bed blong mekem se soa blong hem i kam oraet. Mekem se, hemia nao, wan i mas stap long bed, wan sora i fas, wan i simen i stap long hem, mo evriwan oli stap kolkol.
Mi save se ol neba blong mifala i stap lukluk mifala. Wan long ol eli moning ia, samples long 5 klok moning, mi wekap from saon blong masin blong karemaot sno aotsaed long windo blong mi. Mi lukluk i go aotsaed mo mi luk krosem rod, mo neba blong mi, Brata Blen Williams we i stap wok. Hem i gat ova 70 yia, mo hem i aot long wom mo naes hom blong hem mo kam kwaet nomo blong klinim rod blong draev mo wokbaot blong mifala, from hem i save se mifala i no save mekem mifalawan.
Foto i kam long Getty Images
Wan nara fren, brata Daniel Almeida, i bin kamkamaot long hom blong mi blong draevem mi i go long Sol Lek blong mi wok, from se mi no save draev wetem simen we i kavremap han blong mi. Oli bin stap long ples ia from mi evri moning, blong stap soem lav mo simpol kaen fasin blong olgeta long mi, kasem taem we famli blong mi i kam oraet mo mifala i save mekem samting mifalawan bakegen.
Long tetaem ia blong kolkol weta long 2003, oli bin sendem ol enjel brata oli kam long mifala. Tufala brata ia, oli bin folem eksampol blong Sevya mo tingting long nid blong mifala bifo oli tingting long ol nid blong olgeta bakegen.
Sevya I Givim Pis
Blong stap givim seves long ol narawan i stap givim long yumi wan moa hae mo tabu lukluk. Taem yumi givim seves long ol narawan, Jisas Kraes i givim hop long yumi se ol samting bae oli kam gud long laef blong yumi.
Taem yumi stap tanem hat blong yumi i go aot olsem Sevya i mekem, bae Hem i blesem yumi blong faenem ol janis we i no gat en, blong yumi givim yumiwan kwaet mo wetem kaen fasin long ol pipol we oli nidim yumi. Taem yumi stap laef olsem we Sevya i bin mekem, i save helpem yumi tu blong developem bigfala lav olsem hemia blong Kraes i go long ol narafala man. Hemia i helpem yumi blong faenem bigfala lav, pis, laet, mo mekem paoa blong yumi i kam niu bakegen.
Sevya i stap invaetem yumi blong lukluk long Hem long evri tingting blong yumi mo blong folem Hem. Hemia i givim yumi promes ia se yumi save wokbaot long laet blong Hem, mo we, paoa blong Hem blong lidim yumi i stopem paoa blong tudak insaed long laef blong yumi. Sapos yu “lusum” laef blong yu from Hem, Hem bae i helpem yu blong faenem yuwan.
Foto i kam long Getty Images
Tanem Yu long Kraes, Oltaem
Mi talem tabu witnes blong mi se Jisas i bin girap long ded, mo we Hem i stap laef. Mi testifae long yufala se, tru long Hem mo Atonmen blong Hem we i no gat en, Sevya i bin givim yumi rod ia blong winim ded, long bodi mo long spirit.
Blong ademap, Hem tu i givim long yumi kamfot mo stret save long taem blong hadtaem. Mi talem kwaet long yufala se, taem yumi trastem Jisas Kraes mo sakrifaes ia blong Hem we i pem praes from sin, we i no gat man i save mekem, taem yumi stap strong kasem en wetem fet, bambae yumi glad long ol promes blong Papa long Heven we i lavem yumi, we i mekem evri samting long paoa blong Hem blong helpem yumi gobak stap wetem Hem wan dei.