“I bin gud tumas blong stap gat sakramen long hom. ?From wanem nao Lod i wantem yumi blong gobak long jos?,” Blong Ol Yut Oli Kam Strong, Septemba 2022.
Ol Kwestin mo Ol Ansa
“I bin gud tumas blong stap tekem sakramen long hom. ?From wanem nao Lod i wantem yumi blong gobak long jos?”
Blong Stap Yunaet
“Lod i wantem yumi blong gobak long jos from se Hem i wantem yumi blong kam moa kolosap long Hem. Hem i wantem tu, blong yumi stap wok wan olsem ol brata mo ol sista. Taem yumi stap go long jos, yumi kam wan, helpem yumi wanwan, mo soem tangkyu blong yumi long Hem, from evri samting we Hem i bin mekem blong yumi. Yumi tu, yumi bildimap fet blong yumi mo lanem ol niu tijing.”
Melanie M., 13 yia, Meksiko
Paoa Tru long Ol Namba
“I bin gud tumas blong stap gat sakramen long hom from se, hemia i tekem Spirit i kam insaed long hom blong yumi mo helpem yumi blong luksave se yumi mas tekem jos i kam long hom blong yumi, bitim blong stap tingbaot nomo wan taem long wan wik. Be, samtaem jos long hom i save mekem yu stap longwe long ol narawan. Long yumi wanwan, jos i impoten from se, i krietem paoa tru long ol namba.”
Nathan G., 15 yia, Arisona, YSA
Bildimap Ol Rilesensip
“Long jos, i gat lav long evri ples. Long ples ia, yu save bildimap ol rilesensip mo blesem laef blong ol narawan mo semtaem i blesem yu tu. Jos i impoten tu, blong stap bildimap save blong yu long gospel. Lod i stap wantem yumi blong prijim gospel long olgeta we oli stap raon long yumi mo bildimap Saeon.”
Amelia W., 16 yia, Yuta, YSA
Yu Stap Taem Ol Narawan Oli Nidim Yu
“Taem wol sik ia bin stat, mi wari se bae mifala nomo save tekem sakramen, !be afta, bisop i letem mifala blong tekem long hom! Sam pipol oli stap tingting se from wanem yumi mas gobak long jos, be mi ting se yumi mas gobak blong givhan long ol narawan—blong toktok ol helpem wan. Yumi mas go long jos blong soem lav mo serem ol eksperiens blong yumi.”
Tamara M., 17 yia, Meksiko
Mekem I Kam Niu Bakegen Ol Kavenan
“God i wantem yumi blong gobak long jos from se, i no evriwan oli bin save tekem sakramen long hom blong olgeta. Bubuman blong mi i bin talem hemia long mi, olsem wan we i gat prishud paoa, mi mas mekemsua se evriwan oli gat janis ia. Hem i impoten blong yumi go long jos, from se yumi evriwan i save mekem i kam niu bakegen ol kavenan blong yumi.”
Esteban M., 16 yia Ajentina