Kam Folem Mi

Ol Proveb; Prija; Aesea

Jisas Kraes I Save …

I Kam long David A. Edwards

Ol Magasin blong Jos

Ol trutok we oli raetem taosen yia i pas oli tijim yu wanem we Lod i save mekem blong yu tedei.

Hem we I Stat Kasem En blong Stamba blong Bilif, i kam long J. Alan Barrett

I no gat wan ekspae deit blong trutok we i kam long Lod. Hemia i from se, hem i save ia blong “ol samting olsem we oli rili stap, mo ol samting olsem we bae oli rili stap;” (Jekob 4:13).

Ol trutok we oli raetem taosen yia i pas long OlTesteman oli tru yet naoia. Mo sam long olgeta oli helpem yu blong luk wanem we Lod i save mekem blong yu tedei. Hemia i sam long ol trutok olsem we i stap long ol buk blong Ol Proveb, Prija mo Aesea (we bae yu stap stadi long olgeta long manis ia). Oli soem long yu se Jisas Kraes i save …

Lidim Ol Rod blong Yu

I gat sam taem we yumi filim tingting i fasfas, lus o we yumi nidim help. Sapos yu givim tras blong yu we i fulwan long Lod, tingting i stap daon mo gat fasin blong talem tangkyu, “hem bambae i soemaot stret rod long yu ” (luk long Ol Proveb 3:5–6).

Sapos yu obei long ol komanmen blong Hem, “Hem i stap lidim yufala long ol rod we i stret blong yufala i folem” mo mekem “pis blong yufala … olsem wan gudfala reva we i stap ron” (Aesea 48:17–18).

Mitim Sevya, i kam long Jen Tolman

Givim long Yu Gudfala Tingting

Ol fasin mo laef stael blong wol i save luk naes o i gud tumas. Be ol tijing blong Jisas Kraes oli save helpem yu blong luk olsem wanem ol wei blong wol ia oli, emti mo oli blong sot taem nomo.

Evri “samting ya i blong nating nomo … I olsem we yumi stap resis olbaot nomo” (Prija 1:14). long narafala toktok, wei blong wol i mekem ol tingting i fasfas. I olsem se yumi stap ronem win mo stap traem blong kasem. Hapines i kam taem yumi givim respek mo gat respek long God mo obei long ol komanmen blong Hem (luk long Prija 12:13).

Plante pipol long wol “oli singaotem ol nogud samting se oli gudfala; … se tudak i laet, mo laet i tudak; … we oli tekem konkon blong swit, mo swit blong konkon” (Aesea 5:20). Be Lod i soem trutok long yumi. Taem yumi stap folem wei mo toktok blong Hem, yumi save “go aot we yufala i glad tumas, bambae yufala i no save trabol nating” (luk long Aesea 55:8–12).

(Luk tu long Aesea 40:6–8; 51:7–8.)

Fogivim Ol Sin blong Yu

Yumi evriwan i mekem ol mistek. Yumi evriwan i bin mekem sin. Be sapos yumi sakem sin mo stap traehad blong obei long ol komanmen blong God, Jisas Kraes i save mekem yumi kam klin mo kam oraet bakegen. “Hem i gat sore long yumi; … i kwik blong fogivim yumi, i tekemaot ol sin blong yumi” (Aesea 55:7). Hem i bin talem:

“Nating we ol sin blong yufala i mekem yufala i doti gud, bambae mi mekem we yufala i klin we i klin. Naoia, yufala i doti we i doti, be bambae yufala i kam klin olgeta” (Aesea 1:18).

“Be mi mi Hae God, mi God blong yufala, mo mi stap fogivim yufala, mi stap tekemaot ol sin blong yufala. Bambae mi no moa save tingbaot ol sin blong yufala bakegen.” (Aesea 43:25).

Foto i kam long Mark Mabry

Mekem Yuwan Yu Kam Strong Moa

Yumi evriwan i filim slak o taet samtaem. Jisas Kraes i save givim paoa long yu. “Hem nao i strong sefples blong yumi we bambae i stap oltaem, gogo i no save finis” (Aesea 26:4). Sapos yu gat tingting we i stap daon mo trastem Hem, Hem i save mekem yu stap longwe long ol temtesen, helpem yu blong mekem ol had desisen o mekem yu stap gohed strong nomata ol hadtaem we yu stap fesem. Hem i bin talem:

“Yufala i no fraet; Mi mi stap wetem yufala. Mi mi God blong yufala, Yufala i no seksek; mi bambae mi mekem yufala i strong, Mi bambae mi givhan long yufala” (Aesea 41:10).

Neva Fogetem Yu

Sevya Jisas Kraes i bin sakrifaesem Hemwan blong yu from se Hem i lavem Papa blong yumi long Heven—mo from se Hem i lavem yu. Sakrifaes blong Hem i mekem i posibol blong yu save laef bakegen long ded mo gat wan janis blong kam olsem Papa long Heven. Hem bae i no save lego yu fogud o fogetem yu. Hem i bin talem:

“?Olsem wanem? ?Woman i save fogetem pikinini blong hem? … ? Maet i gat woman we i save mekem olsem, be mi bambae mi no save mekem olsem long yufala samtaem.

“Luk, mi bin raetem yu long skin blong insaedhan blong han blong mi.” (Aesea 49:15–16).

From se Hem i bin mekem plante samting blong yumi mo bae Hem i neva fogetem yumi, yumi tu, yumi mas traehad blong “oltaem tingbaot Hem” (Doktrin mo Ol Kavenan 20:77, 79).