“Wanem Ark I Laekem blong Lanem,” Blong Ol Yut Oli Kam Strong, Septemba 2022.
Wanem Ark i Laekem blong Lanem
Niufala kantri, ol niufala kalja, ol niufala fren … !no gat problem!
Ol foto oli kam long Clayton Chan
Ark i laekem tumas ol kaekae we i gat spaes long hem. Hemia i wan niufala samting we bae hem i faenemaot. I gobak long Filipin, long ples we hem i groap long hem, ol kaekae oli no gat tumas tes.
Be afta, papa blong hem i kasem wan wok long Malesia.
Long pat ia, Ark i bin mitim ol fren long jos we oli gat ol defdefren bakgraon, we i gat tu, olgeta blong India.
“!Oli kakae ol kaekae we i gat plante spaes long hem!” Ark C., i gat 14 yia,i tokbaot ol niufala fren blong hem. “Kaekae ia i gat plante spaes long hem bitim ol kaekae we mi stap kakae oltaem long hom blong mi bifo.”
Fani samting i we—Ark i neva save wanem we hem i stap mestem. Naoia hem i stap traem plante defdefren kaen blong ol kaekae.
I tru, hemia i no wei ia nomo we ol fren blong hem long Jos oli bin jenisim laef blong hem. “Mi glad blong muv i kam long Malesia, be mi harem nogud tu semtaem. Hemia i from, evri niufala fren, mo i had blong toktok long ol niufala fren.”
Be ol yut long long niu branj blong hem oli helpem hem blong mekem jenis ia. Olsem wan risal, naoia hem i save moa abaot plante defdefren ples. “Mi bin lanem abaot ol defdefren kalja,” hem i talem. “Ol kaekae oli defren mo i semmak long ol klos. Ol klos blong olgeta oli gat plante naes kala, !mo i intres tumas blong lukluk olsem wanem oli mekem!”
Be i gat wan grup blong ol fren we oli gohed blong sapotem hem moa bitim eni narafala wan long taem ia mo afta we oli bin muv i kam: hem i famli blong hem.
Ol Pleiplei wetem Ol Fren
Ark i laekem blong spenem taem wetem famli blong hem, speseli taem oli plei ol gem blong kad. Gem ia Uno hem wan gem ia nomo we i fevret blong hem. ?From wanem? “Oltaem mi stap win,” hem talem mo laf wetem.
Hem i laekem tu blong plei Monopoly wetem papa mo mama blong hem mo yangfala brata blong hem, Leaf. (Smol sista blong hem i no bigwan inaf yet blong joenem olgeta.) Be i gat moa samting i stap hapen long taem blong ol gem, we i no blong stap sakem daes nomo mo stap spenem giaman mane long ol gem ia. “Papa mo mama blong mitufala i tijim mi ol plan blong bisnis mo ol prinsipol blong mane long ol gem ia. Hem i ol tru advaes we oli help bigwan long fiuja.”
Papa blong hem i wok olsem man blong developem ol program blong kompiuta mo mama blong hem i bin wok long bisnis blong hemwan long Filipin. Tufala i gat plante skil blong pasem i kam. Olsem pat blong hem, Ark i wantem tumas blong lanem evri samting we hem i save lanem aot long tufala. Hem i gat ol bigfala plan blong fiuja wok blong hem.
Fevret sabjek blong hem long skul i baeoloji mo enjinering. Ark i wan kam wan teknisen blong baeoloji. Wetem ol strong tingting we hem i gat long ol gol blong hem, hem i tekem evri janis we hem i gat blong lanem wan samting we i niu.
I nomata se blong lanem samting long papa mo mama blong hem i no ples we Ark i wantem edukesen long hem. Olsem lav we hem i gat long ol spaes kaekae, hem i faenem hemia we i impoten i kam afta long laef blong hem.
Aot long Stronghed Pikinini i kam Studen
“Mi bin wan stronghed bifo,” Ark i admitim. “Mi no wantem tumas blong lanem samting aot long papa mo mama blong mi.”
Hem i bin traem blong lanem samting hemwan nomo o lanem samting long ol fren blong hem mo ol tija long skul nomo. Afta, hem i ridim wan samting long Buk blong Momon we i bin mekem wan bigfala jenis long olsem wanem hem i stap tingting long ol samting.
Long Alma, ol japta 36 mo 37, Alma i stap givim advaes long pikinini blong hem, Hileman. Alma i tijim Hileman abaot evri samting, long naesfala stori ia blong hemwan abaot taem we Alma i bin jenisim laef blong hem (we i tekem tu, tru dei we hem i no save toktok, afta wan enjel i talem long hem se, hem i no stap mekem wan bes joes long laef blong hem [lukluk long Alma 36:6–10]) blong putum hemwan long denja blong mekem ol sikret grup.
Long medel blong evri samting ia, wan ves i kamaot long klia long Ark: “O, tingbaot, boe blong mi, mo lanem waes tingting long yangfala laef blong yu; yes, lanem long yangfala laef blong yu blong obei long ol komanmen blong God.” (Alma 37:35).
Wan samting i klik long maen blong Ark tru long ol toktok ia. “Papa mo mama blong mi oli save tijim waes tingting tu,” hem i talem. Long wan taem nomo hem i luksave se hem i gat plante infomesen long fored blong hem. “Naoia i wantem moa waes tingting blong tufala. Tufala i lavem mi mo tufala i save helpem mi rere from fiuja blong mi.”
Mo waes tingting blong tufala i go moa bitim blong serem ol bisnis aedia long taem blong ol gem.
Waes Tingting blong Mama mo Papa
Wan impoten lesen we papa mo mama blong Ark i bin tijim long hem i blong no letem ol rabis fasin raon long hem i pulum hem blong mekem wan mistek. “Long ples ia long skul blong mi, plante pikinini oli wantem mi blong traem kofi, ti, sigaret mo ol narafala samting.”
Hemia i wan topik we evri dei oli tokbaot long hom. “Mi bin gat storian wetem papa mo mama blong mi abaot hemia. Oli ripitim olgeta samting ia, olgetawan plante taem,” hem i mekem fani.
Yet, ol samting we tufala i stap ripitim ia i bin wok. Wanwan taem we oli askem hem blong mekem wan samting we i go agensem bilif blong hem, hem i kasem paoa blong no mekem, tru long ol samting we papa mo mama blong hem oli bin tijim long hem.
Wan narafala lesen we hem i tekem long hat blong hem, olsem wanem blong dresap. No, Ark i no nidim blong kasem advaes long saed blong ol stael klos long papa mo mama blong hem, blong mekem se oli save luksave hem moa long skul. I tru, hem i stap mekem moa gud long Dipatmen ia. “Mi bin stap dresap long ol naesfala klos,” Ark i talem. “Mi stap traem blong pulum tingting blong ol gel.”
Papa mo mama blong hem tufala i helpem hem blong luksave se, bae i gat ol risal we bae i kam we hem bae i no wantem from kaen dresap olsem. “Ol klos we yumi werem bae i save mekem ol nara pipol oli tingting defren abaot yu,” Ark i eksplenem. Taem hem i tingting moa long hemia, Ark i luksave se hem i no laekem sam long ol wei ia we ol pipol oli stap tingting abaot hem, taem hem i stap dresap olsem bifo.
Naoia hem i jusum moa long wanem we oli agensem, , klos we i kavremap gud bodi—o, olsem we hem i laekem blong singaotem olgeta, “pua”—klos. Hem i laekem wanem we hem i jenisim mo hem i filim moa gud long saed blong spirit abaot olsem wanem hem i stap dresap. (Nomata hemia, !ol pua klos blong Ark oli naes tumas! Trutok we i no save jenis.)
Stap Lan blong Laeftaem
Ark i laekem tumas ples we hem i stap laef long hem, hem i lavem famli blong hem mo hem i laekem blong lanem samting aot long papa mo mama blong hem.
Hem laekem tu blong lanem gospel.
“Mi biliv se Jisas Kraes i stap laef,” Ark i talem. “Mi biliv se Presiden Russell M. Nelson i profet blong yumi we i stap laef mo we tru long Josef Smit, Jisas Kraes i putum bakegen Jos blong Hem. Mi biliv se gospel i save helpem yumi tru long laef blong yumi, mo fesem eni samting we i stap blokem yumi ol ol tes blong laef we yumi stap eksperiensem.”
Nomata long ol gudgudfala samting we Ark i stap gohed blong lanem long fiuja, hem i stap lanem sam long ol impoten wan long evriwan ia finis. Kolosap long top blong lis ia i gat hemia: !blong spenem taem wetem famli i ademap plante long spaes long laef!