“Go Helpem Ol Narawan mo Lukaot blong Mekem Gud,” Blong Ol Yut Oli Kam Strong, Septemba 2022.
Help blong Laef
Go Helpem Ol Narawan mo Lukaot blong Mekem Gud
Yumi evriwan i defdefren, yumi evriwan i ol pikinini blong God, !mo hemia i naes tumas!
Foto i kam long Getty Images
Pikjarem long maen blong yu se yu stap laef long wan wol we ol peinting oli pentem wetem blu kala nomo, evri kaekae oli tes i semmak nomo, mo evri singsing oli gat wan singgel not nomo. !Mi no save long yu, be mi ting se hemia bae i wan bigfala boring ples!
Ol samting oli defdefren long wok blong art, kaekae, mo miusik, i tru, bae i wan moa naesfala ples we i pulum intres. Long semmak wei, pipol oli gat ol defdefren stori, bilif, wei we oli luk, kantri, kastom mo ol defdefren eksperiens we i mekem se wol i wan naesfala ples.
Taem mi yangfala, mi stap long Arabia, wan bigfala pat blong ol Muslim long wol we i stap blong plante yia. Long sam pat blong taem ia mi go long wan boding skul long Inglan. Long tugeta ples we mi stap long hem, Arabia mo Inglan, mi mitim plante long ol defdefren pipol. Long fastaem i had blong stap raon long ol defren kaen pipol we oli no semmak long mi. Be long en, mi lanem tru long ol eksperiens se plante defdefren pipol oli gud, iven oli naes tumas. Laef blong i kam moa gud taem mi stap mit wetem ol defdefren pipol blong ol defren kalja mo bilif long plante pat blong wol.
Hemia sam long samting we mi bin lanem we i save helpem yu blong respektem mo andastanem olgeta we oli defren long yu.
Faenem Wanem we I Gud
Samtaem ol gudfala samting we i stap long pipol i no klia kwiktaem, be i gud tumas taem yumi traem blong faenem ol gudfala samting, taem yumi lukaotem wetem lav mo sore. Taem yu mekem hemia, hat blong yu bae i open blong stap lanem samting abaot ol narawan.
I help plante blong tingbaot se ol pipol oli save mekem samting long ol wei we yu no save andastanem from se, oli bin harem nogud long sam wei. Kolosap evriwan oli filim se oli no sef, o oli stap traehad wetem wan samting. Yu save filim olsem ia tu. Taem yu andastanem hemia, i save kam moa isi blong faenem wanem we i gud long ol narafala man, from se yu save andastanem from wanem ol pipol ia oli stap mekem ol samting we oli stap mekem. Afta, yu save faenem ol wei blong helpem mo blesem olgeta.
Oli Lisin Gud
Rod blong folem blong respektem mo stap andastanem oli narawan, i stat taem yumi lisin—lisin gud—long ol narawan. Olsem ol memba blong Jos Ia blong Jisas Kraes blong Ol Lata-dei Sent, oltaem yumi kwik blong serem gospel, !mo hemia i wan gudfala samting! Afta long evri samting ia, gospel blong Jisas Kraes i presen ia we i fulap long glori mo we i no save finis. Be samtaem, yumi serem ol bilif blong yumi wetem ol narawan bifo yumi andastanem eni samting abaot olgeta. Yumi nid blong lisin gud long ol narawan mo lanem samting long olgeta. Yumi save mekem save blong yumi i kam bigwan long—mo glad long—evriwan we yumi mitim olgeta.
Lukaotem Ol Semmak Samting we Oli Stap
Long wan taem blong visit we i jes pas, i go long ol ples long Arabia, mi mitim plante pipol we oli defren long mi. Be taem mi kam blong save olgeta, ol stamba bilif blong mifala oli no defren tumas. Mi kasem insperesen tru long ol samting we mifala i gat we oli semsemmak.
Wan samting we mi faenem we mifala i serem i wan strong filing blong helpem olgeta we oli ol rifuji we oli bin karemaot olgeta long ol hom ples blong olgeta from ol faet. Blong faenem wanem we i stap finis, i wan bigwan tumas. Mi glad long hemia mo filim bigfala lav long ol pipol we mi bin mitim.
Taem we yumi save faenem ol samting we oli semmak, mifala i save tokbaot ol samting we mifala i defren long ol, mo tu, ol valiu we mifala i semmak long ol, wetem wan tru intres blong stap lanem abaot wanwan long mifala. Eksperiens ia i rimaenem mi se ol gud pipol long evri ples oli stap traem blong mekem ol gudfala samting folem ol bilif blong olgeta.
Stap Lukluk Samting
Wan gudfala wei blong mitim ol narawan i blong luklukgud mo faenem sam wei blong statem wan storian. Eksampol. Sapos yu luk wan i gat wan naesfala baeskel, talem: “!Si, mi laekem baeskel blong yu!” afta, askem olgeta abaot baeskel ia.
Wan simpol kwestin olsem: “?Olsem wanem long dei blong yu?” i save helpem yu blong konek wetem ol narawan. Bae yu save filim se yu sem smol long fastaem. I nidim blong praktisim, be i naes taem yu kasem sam gudfala eksperiens long hemia.
Lukluk Aotsaed long Yuwan
Sevya i bin mitim plante pipol long ol defdefren Kalja. Hem i go aot mo givhan tu long olgeta we evriwan oli no laekem. Hem i go aot mo mitim olgeta we oli gat sik mo olgeta we oli sakem aot olgeta. Hem i toktok wetem olgeta mo hilim olgeta.
Sapos yumi mekem wanem we Hem i mekem, blong tingting long ol narawan fastaem long yumi, wol ia bae i kam wan moa gud ples. Helpem ol narawan long ol bigfala o smosmol wei. Sendem wan naesfala mesej, mekem wan naes samting mekem wan we i stap hemwan i kam pat blong yufala. Ol fasin blong stap kaen olsem hemia bae i helpem yu blong konek wetem olgeta raon long yu. I sapraes se, ol aksen olsem ia i save mekem yumi yumi filim gud tu.
No Mestem
Nambatu bigfala komanmen i blong “Yufala i mas lavlavem yufala, olsem we mi lavem yufala” (Matiu 22:39). Tingbaot se yumi evriwan, yumi ol pikinini blong God. Lukluk blong mi long wol i kam moa bigwan—ol neba blong mi—we oli defren long mi. No mestem wanem we yu save lanem long ol narawan.
Sapos yu go helpem ol narawan mo lanem blong lavem mo respektem ol samting we i mekem se oli defren long yu we oli stap raon long yu, bae yu sapraes tumas long olsem wanem wol ia i save kam naes tumas.