“Ol Fofala Ki blong Nifae blong Andastanem Aesea,” Blong Ol Yut Oli Kam Strong, Septemba 2022.
Kam Folem Mi
Aesea
Ol Fofala Ki blong Nifae blong Andastanem Aesea
?Yu stap gat problem blong stap ridim Aesea? !Hemia help blong Nifae!
Ol pikja oli kam long Kevin Keele
Hemia i tru se ol toktok blong profet Aesea insaed long OlTesteman oli impoten, we oli stap kwotem olgeta oltaem insaed long Niu Testeman mo long Buk blong Momon. Sevya Hemwan i talem se: “Ol toktok blong Aesea oli bigwan tumas” (3 Nifae 23:1).
Be yet, from wanem oli mas had tumas blong andastanem?
!Yu no mas lusum tras! Nifae i save ol hadwok blong yumi. Hem i agri se “Aesea i bin talemaot plante samting we i bin had … blong andastanem;” (2 Nifae 25:1). Tangkyu long Nifae from se hem i bin givim fofala ki we i save helpem yumi blong save minim blong ol toktok blong Aesea.
Ki Nambawan: Laef long taem blong Ol Las Dei
Nifae i raetem se olgeta we oli stap long “ol las dei” bae oli save “andastanem” ol toktok blong Aesea (2 Nifae 25:8). Ating, from se ol pipol long ol las dei bae oli save gat wan lukluk we ol pipol long dei blong Aesea oli no bin gat. Longtaem i pas, pipol oli no save andastanem olsem wanem ol pipol oli save “singaotem ol nogud samting se oli gudfala, mo ol gudfala samting oli nogud,” (Aesea 5:20) be yet, yumi stap luk hemia i stap hapen raon long yumi.
Mo tu, ol pipol long bifo oli no bin andastanem wanem Lod i bin minim taem Hem i talem: “Bambae mi stap mekem ol samting blong sapraes, we i blong sapraes tru” (Aesea 29:14).
Ol profet blong tedei oli bin talem long yumi hemia se “wan gudfala wok mo wan sapraes,” i stap tokbaot Buk blong Momon we i bae i kam mo Restoresen blong gospel blong Jisas Kraes we i stap gogohed. Yu kasem blesing ia blong stap laef long wan taem we yu save witnesem ol profesi blong Aesea we bae oli stap kam tru.
Ki Nambatu: Gat Spirit blong Profesi
Nifae i bin talem se ol toktok blong Aesea bae “oli klia long olgeta we oli fulap wetem spirit blong profesi” (2 Nifae 25:4). Hemia i saon wari long fas ples, be hemia i no minim se ol profet nomo oli save andastanem Aesea. Ol skripja oli tijim se “tok ya we Jisas i talemaot se i tru, hemia i stamba blong ol tok blong ol profet” (Revelesen 19:10). Long ol narafala toktok, sapos yu biliv long Jisas Kraes, yu gat wan stat finis long evri samting we yu nidim blong andastanem Aesea.
Ol toktok blong Aesea oli testifae abaot Jisas Kraes mo Atonmen blong Hem. !Iven nem blong hem i testifae abaot Sevya! Nem blong Aesea i minim “God i sevem yufala,” o “Jisas i sevem man.”
Ki Nambatri: Andastanem Poem mo Ol Simbol
Nifae i eksplenem se, ol toktok blong Aesea oli had long olgeta we oli no save gud “from oli no save long saed blong fasin blong talemaot profesi long medel blong Ol Jiu.” (2 Nifae 25:1). I isi blong andastanem ol toktok blong Aesea, taem yumi lanem moa abaot ol tradisen raeting blong ol man long Is long dei blong Aesea, olsem ol poem mo ol simbol. Plante taem Aesea i yusum ol leta blong ol simbol long ol raeting blong hem.
Eksampol. Aesea i raet abaot olgeta we oli “hae mo oli leftemap olgeta antap;” oli olsem “redwud blong Lebanon,” mo “evri oktri blong Basan; [Siria]” (2 Nifae 12:13). Redwud mo oktri oli ol hadwud tri. Aesea i yusum wan wei long saed blong poem blong talem se ol pipol we oli flas mo longfala, oli olsem ol longfala tri, from se oli mekem hat blong olgeta i kam strong mo ting se oli moa gud bitim ol narawan. Taem yumi ridim Aesea olsem wan poem, i save helpem yumi blong andastanem moa wanem we hem i bin tijim.
Ki Nambafo: Save Ples
Aesea i givim nem long 108 defren ples long ol raeting blong hem. Hemia bae i had smol blong stap folfolem, !speseli, sapos yu neva laef long ples ia! Nambafo ki blong Nifae i blong save “ol kantri ol ples raon long” Jerusalem (2 Nifae 25:6).
Jerusalem i stap oltaem long ples we i bin stap long hem, blong longtaem bifo, hem i stap long medel blong tri kantri we oli kompit agensem olgeta. Babilon i stap long Is, senta blong ol art mo stael klos. Asiria i stap long Not, ples blong ami we i gat paoa long dei blong Aesea. Ijip i stap long Saot Wes, senta blong ol bisnis. Blong save evri samting ia, i save help yumi blong folemap gud huia oli stap agensem mo atakem Isrel mo karem oli kam ol prisena. Blong andastanem ol simbol ia, Babilon i ripresentem ol samting blong wol, Asiria hem i hae tingting mo Ijip hem i plante rij samting.
Ol Toktok blong Aesea Oli Yu
Aesea i tijim plante ol narafala samting we oli impoten blong yumi andastanem. Hem i testifae abaot kam tugeta ia blong Isrel, we Presiden Russell M. Nelson i bin talem se “i samting we i moa impoten we i stap tekem ples long wol tedei. … Mo sapos yu jusum, sapos yu wantem, yu save tekpat bigwan long hem” (“Hope of Israel” [worldwide youth devotional, 3 Jun, 2018], 8, HopeofIsrael.ChurchofJesusChrist.org; lukluk long Aesea 49:13–23).
Aesea i testifae tu abaot Saeon we bae oli bildim, blong rere from Seken Kaming blong Sevya mo taem we mileniom bae i rul (lukluk long eksampol, Aesea 51–52). Wetem wan testemoni blong Jisas Kraes, Spirit i save testifae long yu abaot ol toktok blong Aesea we oli impoten mo olsem wanem oli save helpem mo blesem laef blong yu.