“Ones Mak,” Blong Ol Yut Oli Kam Strong, Septemba 2022.
Ol Strong Fandesen we Oli No Save Muv
Ol Lata-dei Sent yut, oli stap bildimap laef blong olgeta long Strong Ston blong Ridima (luk long Hileman 5:12).
Ones Mak
Ol pikja oli kam long Katie Payne
Long skul, saens tija blong mi i wantem help blong mekem se i gat fasin blong stap ones insaed long klas blong hem. Hem i bin talem long mifala blong makem ol tes blong mifala wan mo mekem ripot blong ol sko blong mifala wan. Taem mi makem ol ansa blong mi, mi kasem temtesen ia blong putum wan moa poen long sko blong mi. Mi nidim wan ekstra poen nomo blong pasem tes ia. Mi sidaon long ples ia blong wan smoltaem, mo stap tingting long wanem blong mekem.
Taem mi stap sidaon ia mo tingting, kwiktaem mi tingbaot wan kwot blong Presiden Gordon B. Hinckley (1910–2008) we mi putum long bak blong aedentifikesen kad blong mi: “I wan bigfala nogud samting blong talem wan smol giaman. … Oganaesesen bae i save stanap nomata sapos i no gat mane, be wanwan man mo woman i no save stanap sapos hem i lusum respek long hemwan” (“I Believe,” Ensign, Ogis 1992, 5). Andanit long kwot ia i gat sentens ia: “Sapos Sevya i stanap long saed blong mi, ?wanem nao bae mi mekem?”
Mi filim pis mo glad taem mi save wanem mi nid blong mekem. Mi no jenisim sko we mi fel long hem, be mi save se mi bin pasem wan moa impoten tes—tes blong fasin blong stap ones—mo mi glad tumas long wanem joes we mi bin mekem.
Natalie A., Filipin