“Lanem abaot Jisas Kraes mo Yusum Paoa blong Hem,” Blong Ol Yut Oli Kam Strong, Septemba 2022.
Las Toktok
Lanem abaot Jisas Kraes mo Yusum Paoa blong Hem
I kam long wan toktok blong jeneral konfrens blong Epril 2017.
Mi laekem blong serem olsem wanem yumi karem i kam long laef blong yumi, paoa blong Lod mo Masta blong yumi, Jisas Kraes.
Yumi statem hemia, taem yumi stap lan abaot Hem.1 “Hem i no posibol nating blong Lod i sevem man we i no save ol samting blong God” (Doktrin mo Ol Kavenan 131:6). Moa yumi andastanem doktrin blong Sevya mo wanem we Hem i bin mekem blong yumi, moa bae yumi save se Hem i save givim paoa we yumi nidim long laef blong yumi.
Olsem Ol Lata-dei Sent, yumi stap tokbaot misin blong Hem olsem Atonmen blong Jisas Kraes, we i mekem se Laef Bakegen long Ded i wan tru samting blong evriwan, mo we, i mekem se laef we i no save finis, i posibol blong olgeta we oli sakem sin mo kasem ol odinens we oli nidim mo ol kavenan.
Anda long bigfala plan we i no save finis, blong Papa, hem i Sevya nao we i bin safa. Hem i Sevya nao we i bin brekem ol rop blong ded. Hem i Sevya nao we i bin pem praes blong ol sin blong yumi mo tekemaot ol sin blong olgeta long kondisen se yumi sakem sin. Hem i Sevya nao we i mekem yumi kam fri long ded long saed blong bodi mo spirit.
Ol tabu toktok olsem Atonmen mo Laef Bakegen long Ded i tokbaot wanem we Sevya i bin mekem, folem plan blong Papa, mekem se yumi save laef wetem hop long laef ia mo kasem laef we i no save finis long wol we i bae i kam.