“Si Jesukristo Mitanyag Kanato og Paglaom,” Alang sa Kalig-on sa Kabatan-onan, Sept. 2022.
Si Jesukristo Mitanyag Kanato og Paglaom
Kon moserbisyo kita sa uban, si Jesukristo mohatag kanato og paglaom nga ang mga butang mamaayo ra sa kaugalingon natong kinabuhi.
Mga batan-ong lalaki nga taga-Cusco, Peru, nagtinabangay sa pagserbisyo.
Kini nga kinabuhi puno sa mga hagit. Tingali kamo nakasinati na og pipila niini. Adunay daghan nga hinungdan sa kaluya ug kabalaka, kahadlok ug kahingawa. Kon kita makasinati niining mga butanga, ang kalagmitan mao nga kita magtutok sa atong kaugalingon—sa pag-atiman sa atong kaugalingon ug sa kaugalingon natong mga panginahanglan labaw sa bisan unsang butang. Magtuo kita nga kon mogahin kita sa atong panahon ug kusog sa pagpaningkamot og “ayo” sa mga butang, makahimo ra kita gamit ang atong kaugalingong paagi nga malingkawas sa atong mga problema.
Apan si Jesukristo mipakita kanato og mas maayong paagi. Mitudlo siya nga: “[Si bisan kinsa nga] maninguha pagluwas sa iyang kinabuhi, mawad-an hinoon niini; apan ang magwagtang sa iyang kinabuhi, magluwas niini.” (Lucas 17:33). Ang kinadaliang paagi sa pagkaplag og paglaom diha sa inyong mga pagsulay mao ang pagtumong sa inyong kasingkasing ngadto sa Manluluwas ug pagsunod sa ehemplo ug pagserbisyo sa uban.
The Healing at Bethesda [Ang Pag-ayo didto sa Betsata], ni Gary Smith
Ang kinabuhi sa Manluluwas mao ang hingpit nga ehemplo sa gugma ug panagdait ngadto sa katawhan. Kanunay Niyang gikalimtan ang Iyang Kaugalingon alang sa uban. Ang Iyang kawalay hinakog nga mga buhat gipakita diha sa Iyang tanan nga gibuhat sa matag adlaw sa Iyang kinabuhi ug dili limitado sa piho nga panahon.
Kon kita maghunahuna sa panginahanglan sa uban kay sa atong kaugalingon sama sa gibuhat sa Manluluwas, ipaniguro nako kaninyo nga kita makakita og walay kinutoban nga mga oportunidad sa pagtugyan sa atong kaugalingon sa hilom ug mabinationg paagi ngadto sa mga tawo nga nagkinahanglan nato.
Makatabang kini kanato nga mas makaila sa Manluluwas ug makakaplag sa atong kaugalingon og kalinaw sa yuta gani samtang kita magpalambo og mas dako nga gugmang putli ngadto sa uban. Kon inyong “kalimtan ang inyong kinabuhi” tungod sa pagtabang sa uban, magsunod sa ehemplo sa Manluluwas, Siya motabang kaninyo.
Matag Adlaw nga mga Anghel
Sa kasagaran ang Manluluwas mopadala sa uban nganha sa atong kinabuhi sa pagtabang nga mapadalhan kita og kalinaw ug kahupayan nga atong gikinahanglan atol sa pagsulay. Kining bulahan nga katawhan atong bation sama sa mga anghel nga gipadala sa langit, kay sila mao man gayod.
Ang akong pamilya ug ako nakasinati atol sa daghang managlahi nga okasyon sa pagbati og kahupayan ug kalinaw nga ikahatag sa modernong adlaw nga panon sa mga anghel. Gusto nakong pamalandongan ang usa niana nga mga okasyon. Niadtong 2003, mibalhin kami gikan sa among nasod sa Brazil ngadto sa Utah sa Estados Unidos.
Nianang tingtugnaw, adunay miabot namo nga labing dako nga snowstorm sa Utah nga wala masinati sulod na sa daghang mga tuig. Wala kami makakita niana sa among kinabuhi, kay nagdako kami nga gilibotan sa mga kahoy nga palma ug balason nga baybayon. Ang among balay nahimutang sa eskina sa bungtod nga dunay taas kaayong kilid nga agianan.
Dihang nagsugod ang snow, ang akong asawa maisugon nga misugod sa paghawan sa snow sa agianan sa sakyanan ug sa mga kilid nga agianan. Wala ko makatabang kay nadakin-as ko sa ice ug nabalian ko sa may pulso pipila ka adlaw ang milabay. Ang aksidente miresulta sa usa ka operasyon ug gisemento ang akong bukton.
Samtang siya nagsugod sa paghawan sa snow sa unang higayon sa iyang kinabuhi, ang akong mahal nga asawa walay ideya nga kinahanglan diay niyang usbon ang direksiyon asa ipadahili ang snow human malimpyohan ang usa ka bahin sa agianan. Mao nga, sa dihang miadto siya sa pikas bahin aron manglimpyo, didto na midahili ang snow. Nagbalilk-balik siya, nga walay nahimo. Nagkayamukat noon!
Tungod sa gidugayon nga didto siya sa bugnaw, naimpeksyon hinoon ang iyang mga dunggan ug hapit mabungol sa hingpit sulod sa duha ka bulan. Sa samang higayon ang akong 16 anyos nga anak nga lalaki nakaangkon og angol sa iyang buko-buko samtang nagpadailos ug kinahanglan nga maghigda ra aron maayo. Mao nay nahitabo namo, ang usa naghigda, ang usa bungol, ang usa gisemento, ug ang tanan gitugnaw.
Nakasiguro ko nga ang among mga silingan nakamatikod niini. Sa usa niadto nga mabugnawng kabuntagon, mga alas 5:00 sa buntag, nakamata ko sa andar sa snowblower nga naghawan sa gawas. Mitambo ko sa gawas ug nakita nako ang akong silingan nga nagpuyo tabok sa karsada, si Brother Blaine Williams. Sa edad nga hapit na mag-70, gibiyaan niya ang iyang init ug komportable nga panimalay ug hilom nga miadto ug gilimpyohan ang snow sa agianan sa among sakyanan ug ang kilid nga agianan, nasayod nga kami sa among kaugalingon dili makahimo niini.
Litrato gikan sa Getty Images
Laing higala, si Brother Daniel Almeida, miabot sa among balay aron ihatod ko sa Salt Lake City sa akong trabaho, kay dili ko makadrayb tungod sa bug-at nga semento sa akong bukton. Anaa sila didto alang nako matag buntag, nagpakita sa ilang gugma pinaagi niining yano nga mga buhat sa kamabination, hangtod nga ang akong pamilya naayo ug makahimo na kami og balik mismo sa among mga bulohaton.
Atol nianang bugnaw nga tingtugnaw sa tuig 2003, kining ingon og anghel nga mga kaigsoonan gipadala ngari kanamo. Kining duha ka igsoon misunod sa ehemplo sa atong Manluluwas ug mihunahuna og una sa among panginahanglan kay sa ilang kaugalingon.
Ang Manluluwas Mitanyag og Kalinaw
Ang pagserbisyo ngadto sa uban maghatag kanato og mas taas ug mas balaan nga panglantaw. Kon moserbisyo kita sa uban, si Jesukristo mohatag kanato og paglaom nga ang mga butang mamaayo ra sa kaugalingon natong kinabuhi.
Ang paghunahuna sa panginahanglan sa uban kay sa atong kaugalingon sama sa gibuhat sa Manluluwas makapanalangin nato og walay kinutoban nga mga oportunidad sa pagtugyan sa atong kaugalingon sa hilom ug mabinationg paagi ngadto sa mga tawo nga nagkinahanglan kanato. Ang pagpakabuhi sama sa gihimo sa Manluluwas makatabang usab kanato nga makapalambo og mas dako nga Kristohanong gugma nga putli ngadto sa uban. Makatabang kini nga atong makita ang mas dakong sumbanan sa gugma, kalinaw, kahayag, ug nabag-o nga kalig-on.
Ang Manluluwas nagdapit kanato sa pagpangita Kaniya diha sa matag hunahuna ug sa pagsunod Kaniya. Naghatag kini kanato sa saad nga kita makasubay sa Iyang kahayag ug nga ang Iyang giya mopugong sa impluwensiya sa kangitngit diha sa atong kinabuhi. Kon inyong “isiguro” ang inyong kinabuhi diha Kaniya, Siya motabang kaninyo nga makaplagan ang inyong kaugalingon.
Litrato gikan sa Getty Images
Dangop ngadto kang Kristo, sa Kanunay
Mohatag ko sa akong ligdong nga pagsaksi nga si Jesus mibangon gikan sa mga patay ug nga Siya buhi. Ako mopamatuod kaninyo nga pinaagi Kaniya ug sa Iyang walay kinutoban nga Pag-ula, ang Manluluwas mihatag nato sa paagi sa pagbuntog sa kamatayon, sa pisikal ug espirituwal.
Agig dugang, Siya usab mitanyag kanato og kahupayan ug kasiguroan atol sa malisod nga mga panahon. Akong ipaniguro kaninyo nga kon kita mosalig ni Jesukristo ug sa Iyang langitnong maulaon nga sakripisyo, molahutay inubanan sa atong hugot nga pagtuo hangtod sa kataposan, matagamtam nato ang mga saad sa atong minahal nga Langitnong Amahan, kinsa mibuhat sa tanan pinaagi sa Iyang gahom sa pagtabang kanato nga makabalik ngadto sa Iyang presensya sa moabot nga adlaw.