Lig-on nga mga Pundasyon

Mga Santos sa Ulahing mga Adlaw nga kabatan-onan, nagtukod sa ilang kinabuhi diha sa Lig-on nga Sukaranan ni Jesukristo (tan-awa sa Helaman 5:12).

Ang Problema sa Pagbalhin

Ang akong Pamilya sige na og balhin samtang nagdako ko. Ang pag-adjust sa bag-ong mga dapit lisod, apan diha sa akong freshman nga tuig sa high school, ganahan ko sa among gipuy-an. Hinoon, ang tanan nausab sa dihang ang akong lolo namatay ug ang akong mga ginikanan nakahukom nga mobalhin duol sa akong lola. Nahadlok ko nga mobalhin na usab. Naningkamot ko nga maanad sa eskwelahan ug makakaplag og mga higala.

Nahimo kong masinupakon ug nakiglantugi sa akong mga ginikanan mahitungod sa pagbalhin. Ang akong mga ginikanan miawhag kanako sa pag-ampo mahitungod niini. Misulay ko apan wala makadawat og bisan unsang tubag. Bisan sa akong kasagmuyo, nakahukom ko nga mag-ampo og kausa pa. Sa wala pa ko kasugod, nakadungog ko og tin-aw nga tingog sa akong hunahuna nga nag-ingon, “Rachel, wala ka makadawat og tubag tungod kay dili ka ganahan nga makadawat.” Nakuratan ako. Human sa mubo nga panahon, nagsugod ko sa pag-ampo sa lahi nga paagi. Akong gibubo ang akong kasingkasing ngadto sa Langitnong Amahan ug nangutana unsay Iyang gikinahanglan nga akong buhaton.

Ang pagbati nga akong nadawat mao nga ang akong pamilya kinahanglan nga mobalhin. Human magpaubos sa akong kaugalingon ug midawat sa unsay gusto sa Langitnong Amahan, mibati ko og kalinaw. Kadto dili kanunay sayon, apan nasayod ko nga anaa kami kon asa ang gusto sa Ginoo nga kami maadto. Kini nga kasinatian nakatabang nako nga maduol sa akong Manluluwas ug mas maduol sa pagkahimong tawo nga maoy Iyang gusto kanako.

Rachel H., Washington, USA