“Usa ka Pagsulay sa Kinaiya,” Alang sa Kalig-on sa Kabatan-onan, Sept. 2022.
Lig-on nga mga Pundasyon
Mga Santos sa Ulahing mga Adlaw nga kabatan-onan, nagtukod sa ilang kinabuhi diha sa Lig-on nga Sukaranan ni Jesukristo (tan-awa sa Helaman 5:12).
Usa ka Pagsulay sa Kinaiya
Paghulagway pinaagi ni Katie Payne
Dili kini mao ang akong giuyonan nga buhaton. Andam gyod kaayo ko nga mobutang og pangkontra sa anay nga asite [linseed oil] sa koral sa akong lola sa tuhod aron maprotektahan kini. Apan dihang nagkataas ang adlaw, ang mga singot midagayday sa akong nawong ug ang akong kaandam napulihan og kaluya tungod sa kainit.
Ang akong mama misugyot nga mopahulay ug moinom sa dili pa mobalik sa pagtrabaho, apan nikusmod ko, ug naguol.
“Dallin, walay tinuod nga ganti sa pagbaton og maayong kinaiya kon ang tanan sa kinabuhi maayo kaayo,” miingon siya. “Ang tinuod nga pagsulay sa batasan ug ang tinuod nga ganti moabot kon magbaton ka og maayo nga kinaiya bisan kon ang tanan ingon og makalagot.”
Paglabay sa semana, ang akong lolo nangutana kon mahimo kong mobutang sa iyang koral og pangkontra sa anay nga asite [linseed oil]. Mas taas ang iyang koral, ug kinahanglan namong pamutangan ang isig ka kilid.
Niini nga panahon, determinado nakong usabon ang akong batasan bisan og lisod ang trabahoon. Nagsugod kami og sayo, apan siguradong maluto gyod kami sa init sa adlaw. Ang trabaho daw walay kahumanan samtang nagdala kami sa bug-at nga mga balde nga may pilit, baho nga asite. Ang tunukon nga mga sagbot subay sa koral mitusok sa among mga bitiis. Hinoon, dihang nahinumdom ko sa giingon ni mama, wala ko moreklamo. Wala ko mohunong. Mainampingon ko nga mitrabaho ug gipaningkamotan ang usa ka maayong batasan.
Dihang nakahuman kami, akong gitan-aw ang bag-ong nabutangan og asite nga koral ug mibati nga mapasigarbohon sa among nahimo. Gikapoy ko ug nagpilit, apan nasayod ko nga nakapasar usab ko sa importante nga pagsulay sa kinaiya. Akong nakat-onan nga makapakita ko og maayong kinaiya bisan kon ang tanan nga butang ingon og makalagot.
Dallin H., Oklahoma, USA