Dali, Sunod Kanako

Isaias

Upat ka Mahinungdanong Paagi ni Nephi sa Pagsabot sa Isaias

Ni Bradley R. Wilcox

Ikaduhang Magtatambag sa Kinatibuk-ang Kapangulohan sa Young Men

Nagproblema ka ba sa pagbasa sa Isaias? Ania si Nephi nga motabang!

Mga paghulagway ni Kevin Keele

Maklaro nga ang mga sinulat ni propeta Isaias diha sa Daang Tugon mga importante tungod kay gikutlo kini kanunay diha sa Bag-ong Tugon ug sa Basahon ni Mormon. Ang Ginoo Mismo miingon, “Mahinungdanon ang mga pulong ni Isaias” (3 Nephi 23:1).

Sa gihapon, nganong lisod man kaayo kining sabton?

Ayaw pagpakawala sa paglaom! Nahibalo si Nephi sa atong mga panglimbasog. Miuyon siya nga si “Isaias namulong og daghan nga mga butang nga lisod … sa pagsabot” (2 Nephi 25:1). Maayo na lang, si Nephi mihatag nato og upat ka mahinungdanong paagi nga makatabang nato nga masabtan ang buot ipasabot sa mga pulong ni Isaias.

Unang Mahinungdanon nga Paagi: Magpuyo sa Kataposang mga Adlaw

Si Nephi misulat nga kadtong magpuyo sa “kataposan nga mga adlaw”mahimo nga “makasabot” sa mga pulong ni Isaias (2 Nephi 25:8). Tingali kana tungod kay ang katawhan sa kataposang mga adlaw makabaton og panglantaw nga wala sa katawhan sa kapanahonan ni Isaias. Sa unang panahon, ang katawhan wala makasabot kon sa unsang paagi ang katawhan “nagtawag sa pagkadaotan nga matarong, ug ang pagkamatarong daotan” (Isaias 5:20) ug gani nakita nato kini nga nanghitabo sa atong palibot.

Usab, ang katawhan kaniadto tingali wala makasabot unsay gipasabot sa Ginoo dihang Siya miingon, “Ako magpadayon pagbuhat og usa ka katingalahan nga buhat sa taliwala niining mga katawhan, gani usa ka katingalahang buhat ug usa ka kahibulongan” (Isaias 29:14).

Ang modernong mga propeta misulti niini kanato nga kini nga “katingalahang buhat ug usa ka kahibulongan” nagpasabot sa pag-abot sa Basahon ni Mormon ug sa padayon nga Pagpahiuli sa ebanghelyo ni Jesukristo. Bulahan kamo nga nakapuyo sa panahon diin kamo makasaksi sa katumanan sa daghan nga panagna ni Isaias.

Ikaduhang Mahinungdanon nga Paagi: Magbaton sa Espiritu sa Panagna

Si Nephi miingon nga ang mga pulong ni Isaias mahimo nga “yano ngadto sa tanan nga napuno sa espiritu sa panagna.” (2 Nephi 25:4). Kana ingon og makahadlok sa sinugdanan, apan wala kini magpasabot nga ang mga propeta lamang ang makasabot ni Isaias. Ang mga kasulatan nagtudlo nga “ang pagpanghimatuod ni Jesus mao man ang espiritu sa propesiya” (Pinadayag 19:10). Sa laing pagkasulti, kon kamo motuo ni Jesukristo, anaa na kamo sa sinugdanan kon unsay gikinahanglan aron makasabot sa Isaias!

Ang mga sinulat ni Isaias mopamatuod kang Jesukristo ug sa Iyang Pag-ula. Bisan ang iyang ngalan nagpamatuod bahin sa Manluluwas! Ang ngalan ni Isaias nangahulogan og “ang Ginoo mao ang Kaluwasan,” o si Jesus moluwas.”

Ikatulong Mahinungdanon nga Paagi: Sabta ang mga Balak ug mga Simbolo

Si Nephi mipasabot nga ang mga pulong ni Isaias “lisod alang niadtong dili sinati sa “matang sa pagpanagna taliwala sa mga Judeo” (2 Nephi 25:1). Ang mga pulong ni Isaias mas sayon sabton kon atong kat-onan ang mas daghan pa mahitungod sa mga tradisyon sa Sidlakan bahin sa pagsulat sa kapanahonan ni Isaias, sama sa mga balak ug mga simbolo. Si Isaias sa kasagaran mogamit og komplikadong mga simbolo sa iyang mga sinulat.

Sama pananglit, si Isaias misulat mahitungod niadtong mga “mapahitas-on ug tigpataas” nga sama sa “mga cedro sa Libano” ug sa “mga tugas sa Basan [Siria]” (2 Nephi 12:13). Ang mga Cedro ug mga tugas mga lubason nga kahoy. Si Isaias migamit og balaknon nga paagi nga ang mapagarbuhon ug mapahitas-on nga katawhan susama sa tag-as nga mga kahoy tungod kay sila mipatig-a sa ilang mga kasingkasing ug naghunahuna nga sila mas maayo kay sa uban. Ang pagbasa sa Isaias nga sama sa mga balak makatabang nato nga mas makasabot sa unsay iyang gitudlo.

Ikaupat nga Mahinungdanon nga Paagi: Hibaloi ang Hiyograpiya

Si Isaias mingalan og 108 ka lainlaing mga dapit sa iyang mga sinulat. Ingon og makalibog ang pagsusi niini, ilabi na kon wala kamo makapuyo didto! Ang ikaupat nga mahinungdanong paagi ni Nephi mao ang pagkahibalo sa “mga dapit nga nag-alirong ” sa Jerusalem (2 Nephi 25:6).

Ang Jerusalem anaa sa samang dapit sukad, apan sa karaan anaa kini sa sentro sa tulo ka nagkompetensiya nga mga gahom sa kalibotan. Ngadto sa sidlakang bahin sa Babelonia, usa ka sentro sa art ug estilo. Ngadto sa amihanang bahin sa Asiria, ang gahom sa militar sa kapanahonan ni Isaias. Ngadto sa habagatang kasadpan mao ang Ehipto, usa ka sentro sa komersyo. Ang pag-ila bisan niini lang kadaghan makatabang sa pagsusi kon kinsa ang mihulga nga mosulong sa Israel ug midala sa mga bihag. Sa pinasimbolo nga paagi, ang Babelonia nagrepresentar sa pagkakalibotanon, ang Asiria sa garbo, ug ang Ehipto sa kaadunahan.

Ang mga Pulong ni Isaias Mga alang Kaninyo

Si Isaias mitudlo og daghan pang uban nga butang nga importante nga atong masabtan. Mipamatuod siya bahin sa pagkatibulaag ug pagpundok sa Israel, nga giingon ni Presidente Russell M. Nelson nga “mao ang labing importanting butang nga nanghitabo na sa yuta karon. … Ug kon ikaw mopili niini, kon ganahan ka niini, mahimo ka nga dakong bahin niini” (“Paglaom sa Israel” [tibuok kalibotan nga debosyonal, Hunyo 3, 2018], 8, “https://abn.churchofjesuschrist.org/study/broadcasts/worldwide-devotional-for-young-adults/2018/06/hope-of-israel?lang=ceb; tan-awa sa Isaias 49:13–23).

Si Isaias mipamatuod usab bahin sa pagtukod sa Zion agig pagpangandam alang sa Ikaduhang Pag-anhi sa Manluluwas ug sa milenyal nga paghari (tan-awa, pananglitan sa, Isaias 51–52). Uban sa pagpamatuod kang Jesukristo, ang Espiritu makapamatuod kaninyo sa kaimportante sa mga pulong ni Isaias ug sa unsang paagi kini makatabang ug makapanalangin sa inyong kinabuhi karon.