Si Jesukristo Makahimo …

Ni David A. Edwards

Mga Magasin sa Simbahan

Ang mga kamatuoran nga nasulat liboan ka tuig ang milabay nagtudlo kaninyo unsay mahimo sa Ginoo alang kaninyo karon.

Si Jesukristo ug Pedro nga naglakaw sa tubig

Walay paghupas ang kamatuoran gikan sa Dios. Tungod kay kini mao ang kahibalo “sa mga butang ingon nga sila gayod mao, ug sa mga butang nga sila gayod mahimo unya” (Jacob 4:13).

Ang mga kamatuoran nga nasulat liboan ka tuig ang milabay diha sa Daang Tugon tinuod gihapon karon. Ug pipila niini makatabang nga inyong makita unsay mahimo sa Ginoo alang kaninyo karon. Aniay pipila ka kamatuoran gikan sa mga basahon sa Mga Panultihon, Ecclesiastes, ug Isaias (nga inyong pagatun-an niining bulana). Kini magpakita kaninyo nga si Jesukristo …

Makagiya sa Inyong mga Dalan

Usahay, tanan kita mobati og kalibog, nawala, o nagkinahanglan og giya. Kon ihatag ninyo sa Ginoo ang inyong tibuok nga pagsalig, “tultolan ka[mo] niya sa matarong nga dalan” (tan-awa sa Mga Panultihon 3:5–6).

Kon kamo magtuman sa Iyang mga sugo, Siya “nagtultol kaninyo sa dalan nga angay ninyong laktan” ug mohimo “sa inyong pakigdait … sama sa suba” (Isaias 48:17–18).

Makahatag Ninyo og Panglantaw

Ang mga kinaiya ug mga estilo sa kinabuhi dinhi sa kalibotan daw maanindot o makalingaw. Apan ang mga pagtulon-an ni Jesukristo makatabang ninyo nga makakita unsa ka haw-ang ug katemporaryo ang mga paagi sa kalibotan.

Ang tanan nga “gibuhat dinhi sa kalibotan … walay kapuslanan sama ra kini sa tawo nga nagdakop og hangin” (Ecclesiastes 1:14). Sa laing pagkasulti, ang paagi sa kalibotan magdala og kasagmuyo. Sama ra kini sa paggukod sa hangin ug pagsulay og dakop niini. Ang kalipay moabot kon kita morespeto ug motahod sa Dios ug motuman sa Iyang mga sugo (tan-awa sa Ecclesiastes 12:13).

Daghang katawhan sa kalibotan “nagtawag sa daotan nga maayo ug sa maayo nga daotan; … naghimo sa kangitngit nga kahayag ug sa kahayag nga kangitngit; … naghimo sa pait nga tam-is ug sa tam-is nga pait” (Isaias 5:20). Apan ang Ginoo nagpakita kanato sa kamatuoran. Pinaagi sa pagsunod sa Iyang pamaagi ug sa Iyang pulong, kita “mamiya nga malipayon, ug pagawason nga malinawon” (tan-awa sa Isaias 55:8–12).

(Tan-awa usab sa Isaias 40:6–8; 51:7–8.)

Makapasaylo sa Inyong mga Sala

Tanan kita makahimo og mga sayop. Tanan kita nakasala. Apan kon maghinulsol kita ug padayong maningkamot sa pagtuman sa mga sugo sa Dios, si Jesukristo makahimo nato nga limpyo ug mamaayo pag-usab. “[Kita Iyang] kaloy-an; … kay andam siya sa pagpasaylo” (Isaias 55:7). Siya miingon:

Ang Ginoo miingon, “Bisag unsa ka pula ang inyong sala, maputi kini kaayo; bisan pa kinig dagtom-pula, maputi kini sama sa balhibo sa karnero” (Isaias 1:18).

“Apan, Ako mismo, maoy nagpala sa imong mga sala … ug dili ko na gayod kini hinumdoman” (Isaias 43:25).

Si Jesukristo nga naggakos og usa ka tawo

Magalig-on Kaninyo

Tanan kita mobati nga huyang o luya usahay. Si Jesukristo makahatag kaninyo og kalig-on. “Saligi kanunay ang Ginoo kay siya mao ang batong dalangpanan nga magpabilin hangtod sa hangtod” (Isaias 26:4). Kon kamo magmapaubsanon ug mosalig Kaniya, Siya makatabang sa inyong pagbatok sa tintasyon, paghimo og lisod nga mga desisyon, o pagpadayon bisan sa mga kalisdanan. Siya miingon:

“Ayaw kahadlok; kay ania ako uban kanimo: ayaw pagtalaw; kay ako mao ang imong Dios; palig-onon ko ikaw; oo, buligan ko ikaw” (Isaias 41: 10).

Dili Gayod Makalimot Kaninyo

Ang Manluluwas nga si Jesukristo misakripisyo sa Iyang Kaugalingon alang kaninyo tungod kay Siya nahigugma sa atong Langitnong Amahan—ug tungod kay Siya nahigugma kaninyo. Ang iyang sakripisyo naghimong posible nga kamo mabanhaw ug makaangkon og higayon nga mahimong sama sa Langitnong Amahan. Dili gayod Siya motalikod o makalimot kaninyo. Siya miingon:

“Makalimot ba ang usa ka inahan sa iyang anak nga masuso … ? oo, apan bisan pag malimot ang inahan sa iyang anak, ako dili gayod malimot kanimo.

“Tan-awa, … gikulit ko ang imong ngalan diha sa akong mga palad” (Isaias 49:15–16).

Kay Siya nakahimo og daghan kaayo alang kanato ug dili gayod makalimot kanato, kita usab, kinahanglang maningkamot nga “sa kanunay mohinumdom Kaniya” (Doktrina ug mga Pakigsaad 20:77, 79).