“Magkat-on mahitungod ni Jesukristo ug Mogamit sa Iyang Gahom,” Alang sa Kalig-on sa Kabatan-onan, Sept. 2022.
Kataposang Pulong
Magkat-on mahitungod ni Jesukristo ug Mogamit sa Iyang Gahom
Karon mamulong ako kon unsaon nato nga madawat dinhi sa atong kinabuhi ang gahom sa atong Ginoo ug Agalon, si Jesukristo.
Sugdan nato pinaagi sa pagkat-on mahitungod Kaniya.1 “Malisod alang [kanato] nga maluwas diha sa pagkawalay alamag” (Doktrina ug mga Pakigsaad 131:6). Kon mas daghan kita og nasabtan sa doktrina sa Manluluwas ug sa unsay Iyang gibuhat alang kanato mas masayran nato nga Siya makahatag sa gahom nga atong gikinahanglan sa atong kinabuhi.
Isip mga Santos sa Ulahing mga Adlaw, gitawag nato ang Iyang misyon isip ang Pag-ula ni Jesukristo, diin ang pagkabanhaw nahimong reyalidad alang sa tanan ug ang kinabuhing dayon nahimong posible alang niadtong maghinulsol sa ilang mga sala ug modawat ug motuman sa mahinungdanong mga ordinansa ug pakigsaad.
Ubos sa mahinungdanon ug mahangturon nga plano sa Amahan, ang Manluluwas maoy nag-antos. Ang Manluluwas ang mibugto sa mga higot sa kamatayon. Ang Manluluwas ang miantos sa bugti sa atong mga sala ug kalapasan ug mopapas niini kon kita maghinulsol. Ang Manluluwas ang motubos kanato gikan sa pisikal ug espirituwal nga kamatayon.
Ang sagradong mga termino sama sa Pag-ula ug Pagkabanhaw naghulagway sa gibuhat sa Manluluwas, sumala sa plano sa Amahan, aron magpakabuhi kita nga may paglaom niining kinabuhia ug makaangkon og kinabuhing dayon sa kalibotan nga moabot.