“Iesu Kristo e Karekea Nakoira te Kaantaninga,” Ibukin Kakorakoraaia Kairake, Tebetembwa 2022.
Iesu Kristo e Karekea Nakoira te Kaantaninga
Ngkai ti beku ibukiia temwaangina, E anganira te kantaninga Iesu Kristo bwa a na bon nakoraoi bwaai ni kabane inanon maeura.
Ataeinimwaane mai Cusco, Peru, a bootaki ni mwakuri n anga te ibuobuoki.
E onrake te maiu aei n taian kakaewenako. Ko na bae n tia n rinanon tabeua. A bati bukin te rawawata ao te raraoma, te maaku ao te nako n nano. Ngkana ti rinanon baikai, ti tangiria n tara moa arora—n tararuaira man tobwai oin kainnanora imwain bwaai ake tabeua. Ti iangoia bwa ngkana ti kabanea ara tai ao korakoraara ni kataia n “tobwai” kangaanga, ti kona n otinako man ara kangaanga.
Ma Iesu Kristo e kaota te kawai ae tamaroa riki. E reirei: “; ao ane e ukoukora kawakinani maiuna ao e na kabua; ao ane e kabua maiuna ao e na kawakinna” (Ruka 17:33). Te kabanea ni waekoa ni kawai ni karekea te kaantaninga inanon am kangaanga bon kaetan nanom nakon te tia Kamaiu ao ni karaoi Ana katooto ao ana beku ibukiia aomata.
Te Kamaiu i Beteteta, iroun Gary Smith
Maiun te Tia Kamaiu bon te katooto ae te kabanea n tamaroa ibukin te tangira ao karaoan ae raoiroi nakoia aomata. E aki toki ni karimoaia aomata nakon moa nanona. A na mwakuri aika a itiaki e oti n Arona inanon Maiuna ni katoa bong ao tiaki n tii te taina ke n tain te motirawa.
Kaetan nanora nakoia ake irarikira n aron ae tia ni karaoia te tia Kamaiu e na kakabwaiaira ma akean tian te kakabwaia are e na roko irouia n aki ataaki ao nakoia aomata ake a kainnanoira.
Aio e na buokiira ni kinaa riki te Tia Kamaiu ao ni kunea ibon iroura te rau i aonaaba ngkai ti karikirakea te tangira ae kororaoi riki nakoia tabeman. Ngkai ko “kakeaa maium” ni buokia aomata, karaoi ana katooto te tia Kamaiu, E na buokiko.
Anera ni Katoabong
N taai nako te Tia Kamaiu, E na kairia tabeman nakon maiura ni karekea nakoira te rau ao te rau n nano ae ti kainnanoia n taai ni kangaanga. Aomata aika a kakabwaiaaki aikai a namakina nakoira n aroia anera aika a karuoaki mai karawa, ake bon ngaia raoi.
Ngai ao au utu ti a tia n rinanon namakinan te karaunano ao te rau ae a kona n uotia anera ake i bon ibuakora. I tangiria n kaokarikaaki te ururing man teuana kanoan taian bobotaki akekei. Inanon 2003, ti mwaing man abara ae Brazil nako Utah.
N tain te kamwaitoro anne, e bon rangi ni korakora buakan te tinooi i Utah nakon ake n ririki tabeua. Ti tuai man nonoora aekakin aei inanon maiura, ngkai ti bon ikawairake ma taian nii ao te bikebike. Mweengara e mena ni koonan te katabuki i Bountiful are iai ite tabo n nakonako ae abwabwaki iai.
E moan bwaka te tinoo, kainabau e rangi ni ninikoria n kanakoi tinoo ake n ara tabo ni buti ao tabo n nakonako. I aki konaa ni ibuobuoki ibukin mwaoton touni baiu tabeua te bong mai imwaina ngke I marannako iaon te aiti. Te kabuanibwai anne e uotai nakon te korokoro ao ni kabaeaki ni kabane baiu nakon angau.
Ngke e moana kanakoan te tinoo man ara tabo te moan tai inanon maiuna, kainnabau ae tangiraki e aki ataia bwa e riai ni bita tabon te mitiin ni kanako tinoo imwin kaitiakin iteran te kawai are teuana. Ngaia are, ngke e nakon te tabo are te iterana ni kaitiakia, anne te tabo are e tiinako iai te tinoo. E okioki karaoan aei irouna, ao bon akea bongana. E aki reke bwainakina!
Ibukin maanna nakon te kamwaitoro, e rootaki taningana ake uoua n te manaoraki ao e kuri bonotaninga inanon uoua te namwakaina. N te tai naba anne natiu te mwaane ae 16 ana ririki e ikoaki nukana imwin te takakaro ae te tikii iaon te tinoo ao e bon tiku n ana kainiwene ni kamaoa ikoakina. Ao anne ngaira, temanna ae mena n te kainiwene, temanna e bonotaninga, ao temanna ae kaibaeaki baina, ao ti bane ni mariri.
Irou ngai ti bon rangi ni kakamataku irouia kaain rarikira. N teuanga te moaningabong, are rangi ni kamwaitoro imarenan 5:00 a.m., I a uti n tangin te mitiin ni kanako tinoo i tinanikun au wintoo. I taraa tinanikun au winto ao I nooria kaain rarikiu are maeka ni iteran te kawai are teiterana, Te Tari Blain Williams. E a kan koro 70 ana ririki ni maiu, e a tia ni kitana mwengana ae aabue man kamwengaraoi ao e roko n aki ataaki ao e katiaka kawaira ao te tabo n nakonako, ngkai e ataia bwa e kaangaanga karaoan aio iroura.
Tamnei iroun Getty Images
Raoraou temanna, Tari Daniel Almeida, e roko ni mwengara bwa e na kabutai rikaaki nako Salt Lake City ibukin te mwakuri, ngkai I aki kona ni kabuti kaa ma kabaean baiu imwiin ikoakiu. A mena ikekei ni katoa ingabong, kakaota aia tangira ma aia mwakuri n akoi aika a uarereke aikai, ni karokoa a marurung au utu ao ni kona ni manga karaoi mwakuri i bon iroura.
Inanon tain te mwaitorotoro anne 2003, a karokoaki taari aikai nakoira. Taari aika uoman aikai a tia n ira ara katooto te Tia Kamaiu ao a tabeakin riki kainnanora imwain moa are bon oin kainnanoia.
Te Tia Kamaiu e Anga te Rau
Beku ibukiia temwangina e anganira te taratara ae rietata riki ao ni tabu riki. Ngkai ti beku ibukia temwaangina, E anganira te kantaninga Iesu Kristo bwa ana bon nakoraoi bwaai ni kabane inanon maiura.
Kaetan nanora nakoia ake irarikira n aron ae tia ni karaoia te tia Kamaiu e na kakabwaiaira n akean tian te kakabwaia are e na roko irouia n aki ataaki ao nakoia aomata ake a kainnanoira. Maiu n aron te tia Kamaiu e na buokira ni karikirakea riki ana tangira ae kororaoi Iesu nakoia aomat. E buokira aio ni karekea riki mwaitin ara tangira, rau, ota, ae korakora riki ao kaboui korakoraara.
E kaoira te Tia Kamaiu bwa ti na ukoria n reirei ni kabane ao n ririmwiina. Aio e anganiira te berita are ti kona iai n nakonako n Otana ao bwa Ana kairi e totokoa ana kariri te rotongtong inanon maiura. Ngkana ko rairaki Nakoina, E na buokiko ni kanakoraoiko riki.
Tamnei iroun Getty Images
Rairaki nakon te Uea, n Taainako
I kaota au koaua bwa e a tia n uti Iesu man te mate ao E maiu. I kaota au koaua bwa mai Irouna ma Ana anga karea ni kamaiu ae akea tokina, te Tia Kamaiu e katauraoa te kawai n tokanikai iaon te mate, n rabwata ao tamnei.
Irarikin anne, E anga nakoira te mweraoi ao te karau nano n taai ni kangaanga, n taai n rawawata. E na rau nanomi bwa ngkae ti kaki ara onimaki iroun Iesu Kristo ao Ana Mwakuri ni Kamaiu, n teimatoa ara onimaki ni karokoa te toki, ti na karekea ana berita Tamara are i Karawa, are e karaoi bwai ni kabane ni korakorana ni buokira n oki nako Ina n te bong teuana.