“Aua Kawai ni Ibuobuoki mairoun Nibwaai ibukin Kaotaan ana boki Itaia,” Ibukin Kakorakoraia Kairake, Tebetembwa. 2022.
Nakomai, Iriirai
Itaia
Aua ana kawai ni Ibuobuoki Nibwaai ibukin kaotaan ana boki Itaia
Iai am kangaanga ni warekan Itaia? E mena ikai Nibwaai bwa E na Ibuobuoki!
Kamataataan te tamnei iroun Kevin Keele
E bon ataaki bwa ana koroboki te burabeti ae Itaia n te O Tetemanti a kakawaki ibukina a taekinaki n angin te tai n te Nu Tetemanti ao Ana Boki Moomon. E taku te Uea, “A korakora bonganan ana taeka Itaia” (3 Nibwaai 23:1).
Ma, bukin tera e na rangin ni kaangaanga bwa ko na ota iai?
Tai kabwara nanom! E atai ara kangaanga Nibwaai. E kakoaua bwa ”Itaia e taekini baika a mwaiti aika a kangaanga … ataakiia”(2 Nibwaai 25:1). Ma te karabwarabwa, Nibwaai e a tia n anga aua kawai are a kona ni buokina ni karekea nanon ana taeka Itaia.
Kawai Teuana Maeka inanon Boong aika Kaitira
E koroboki Nibwaai ibukia aika a maeka “boong aika kaitira” ana kona n ota n ana taeka Itaia (2 Nibwaai 25:8). E kona naba bwa bukina aomata ni boong aikai a kona ni iai aia noonori ae akea irouia ke a maiu n ana tai Itaia. N taai aika a bwakanako, a kona n aki ota aomata bwa a kanga aomata ni “atonga te buakaka bwa e tamaroa, ao tamaroa bwa e buakaka” (Itaia 5:20) e ngae ti nooria bwa a riki aikai i rarikira.
Ao, aomata ni boong akekei a kona n akea otaia n nanon ana taeka te Uea ngke E taku, “N na manga karaoa te mwakuri ae kamimi nakon te botanaomata aei, ae bon te mwakuri ae kamimi ae moan te kamimi” (Itaia 29:14).
A tuangiira burabeti ni boong aikai “te mwakuri ae kamimi ae moan te kamimi” e taekina iai rokon ana Boki Moomon ao kaokan ana euangkerio Iesu Kristo. Ti kakabwaiaa ni maeka n te tai ae ko kona ni kakoaua kakoroan ana taetae ni burabeti ae Itaia.
Kawai Uoua: Karekea te Taetae ni burabeti n Tamnei
Nibwaai e reirei bwa ana taeka Itaia “a maataata nakoia aika a kaonaki n tamnein te taetae ni burabeti” (2 Nibwaai 25:4). E kona ni kamwengabuaka n te moan, ma aio e aki nanonaki bwa ti burabeti ae a kona n ota iroun Itaia. Koroboki aika a tabu a reirei bwa “ana kaotioti Iesu bon tamnein te taetae ni burabeti” (Te Kaotioti 19:10). N taekana teuana, ngkana ko kakoaua Iesu Kristo, e a tia n reke iroum te moan ota n ana taeka Itaia!
Ana koroboki Itaia a kakoaua iroun Iesu Kristo ao Ana Mwakuri ni Kamaiu. Arana naba e kakoaua iroun te Tia Kamaiu! Nanon aran Itaia “te Uea bon te kamaiuaki” ke E kamaiu Iesu.”
Kawai Teniua Ota n Koroboki ni Karariki ao Kanikinaa
E kabwarabwara Nibwaai bwa ana taeka Itaia a matoa irouia te koraki ake aki taneiai ma ”te aro ni taetae ni burabeti ibuakoia Iutaia” (2 Nibwaai 25:1). A bebete ao ni kai ota n ana taeka Itaia ngkai ti reiakina riki taekan koroboki mai Mainiku n ana tai Itaia, aika koroboki ni karariki ao kanikinaa. E kakabongana riki kanikina aika a mwaiti n ana koroboki.
Te katooto, Itaia e korea rongorongoia naake a “rietata ao ni karietaki ” n ai aroia “tiiran Rebanon” and the “oke i Batian ni kabane[Tiria]” (2 Nibwaai 12:13). Tiire ao oke bon aroka aika a matoatoa. E kabongana te karariki Itaia n taekinna bwa te kamoamoa ao aomata aika a korakora rabwataia ai aroia aroka aika a abwabwaki ibukina a kamatoai nanoia ao a taku bwa a tamaroa riki nakoia temwangina. Warekan Itaia ai aron warekan te koroboki ni karariki ae kona ni kaotaira riki ae reireiaki.
Kawai Aua Ataa taekan te Aba
Itaia e aranii taabo aika a kakaokoro ae 108 mwaitiia n ana koroboki. E kona n kamino nano teutana aio ni ririmwiin, riki ngkana ko bon tuai ni maeka ikekei! Ana kaaua ni kawai Nibwaai bon ataakin “taabo ni katobibia” Ierutarem (2 Nibwaai 25:6).
Ierutarem e mena n te tabo ae e a kaman mena ikekei, ma taai aika a bwakanako bon te tabo ae mena iai teniua aba aika a korakora. Nako mainiku bon Bwaburon, te tabo ibukin te korobanna ao taian kunikai. Nako meang bon Aatiria, ana tabo te tanga ni buaka ae korakora n ana tai Itaia. Nako maiaki maeao bon Aikubita, te tabo ni iokinibwai. Ataakin ae tau aei e kona n buokira ni tarataraia bwa antai ae kakamaeka Iteraera ao n uotia nako ni kabureia. N te kanikinaa, Bwaburon e tei ibukin aron te aonaaba, Aatiria te kainikatonga, ao Aikubita te kaubwai.
Ana Taeka Itaia bon i Ibukim
E reirei bwaai aika a bati riki Itaia aika bongana nakoia bwa ti na ota. E kakoaua bwa maenakoia ao Ikoikotaia Iteraera, are e taekinna Beretitenti Russell M. Nelson ngke e taku “bon te kabanea ni kakawaki ae riki iaon te aonaaba ngkai. … Ao ngkana ko rineia bwa, ngkana ko tangiria ni, ko kona n riki bwa mwakorona ngkoe.” (“Kantaninga ibukin Iteraeral” [worldwide youth devotional, June 3, 2018], 8, HopeofIsrael.ChurchofJesusChrist.org; taraa Itaia 49:13–23).
E kakoaua naba itaia bwa katean Tion ni katauraoi imwain kauokin te Tia Kamaiu ao teuana te ngaa te ririki n tautaeka (taraa, ibukin te katooto, Itaia 51–52). Ma ana koaua Iesu Kristo, te Tamnei e na kakoauaa nakoim kakawakin ana taeka itaia ao ana kanga ni buokira ao ni kakabwaiaira ni maiura n boong aikai.