“Anga te Ibuobuoki ao Tarai Baika a Raraoi,” Ibukin Kakorakoraia Kairake, Tebetembwa 2022.
Maiu Ibuobuoki
Anga te Ibuobuoki ao Tarai baika a Raraoi
Ti bane ni kakaokoro, ao e rang tamaroa anne!
Tamnei iroun Getty Images
Katamneia te maeka n te aonaaba ike korobanna a beeniaki n ti te buruu, amwarake titebo kanakiia, ao anene nako ti teuana aia nooti. I aki ataiko, ma I taku bwa e anne e rangi ni kabotu!
Te kaokoro n korotamnei, kanakin amwarake, ao katangtang a karika te aonaaba bwa e na kakaongora riki ao n tikiraoi. N te aro anne, aomata a kakaokoro aroia, koaua, taraaia, riikia, aia reeti, aia taneiei ae katamaroa te aonaaba.
Ngke I uarerke, I maeka i Arabia, aban Islamic ae bubura n te aonaaba, n ririki aika a mwaiti. N te tai naba ikanne, I kaea te reirei ao I maeka iai i Engiran. N taabo akanne, Arabia ao Engiran, I kaitibo ma aomata aika a mwaiti man kakaokoro. N te moantai e kuri kangaanga te mena irarikiia aomata aika a kakaokoro tiaki n ai arou. Ma n waakin te tai, I reiakinaki inanon te waaki bwa te kakaokoro ae bubura e rangi n tikiraoi, ao ni tamaroa! E a tia ni kaonaki maeiu iaon are i kantaningaia man reitakiu ma aomata mani katei ao koaua aika a kakaokoro man mwakoron nako te aonaaba.
Aikai tabeua bwaai ae I reakinna are e kona ni buokiko n karinea ao n ota nakoia ake a kaokoro ma ngkoe.
Kakaea te Tamaroa
N tabetai tamaroaia aomata e aki rangi ni kai nooraki n te tai ae tawe, ma e rangi ni tamaroa kuneakin te tamaroa ngkana ti ukoria ma te tangira ao te nanoanga. Ngkai ko karaoa anne, e na uki nanom ao n reiakinaki mairouia tabeman.
E ibuobuoki uringana bwa aomata a kona ni karaoi waaki ae ko aki ota iai ibukina a tia ni maraki n anga tabeua. Angiia aomata a namakina ae a kona ke n kaitara mataoan te bwai teuana. Tao e reke naba iroum te namakin aei. Ngkana ko oota n aei, e na waekoa ni bebete kunean tamaroaia tabeman ibukina ko kona n oota riki bwa bukin tera aomata aroia arei. Ko kona ngkanne ni kakaei kawai ni buokiia ao ni kakabwaiaiaa.
Kakauongo raoi
Te kawai nakon te karinerine ao te atatai e moa man te tai are ti kakauongo—rangi ni kakauongo —nakoia tabeman. Ngkai membwa n Ana Ekaretia Iesu Kristo ibukiia Aika Itiaki ni Boong aika Kaitira, ti rangi ni tawe n tibwaua te euangkerio, ao ane te bwai ae moan te tamaroa! Imwiin ane, ana euangkerio Iesu Kristo bon te bwain tangira ae te kabanea ni mimitong ae akea tokina ae ti konaa n tibwauaia. Ma n tabetai to tobwaa ara koaua ma tabeman imwain ae ti ota raoi ibukiia. Ti na riai ni kakauongo raoi nakoia tabeman ao n reirei mairouia. Ti kona n karababa ootara ni—kakaitau ibukiia—aomata ni kabane ake ti kaitibo ma ngaia.
Ukorii Nanoia Aomata
Inanon kawaran Arabian Gulf n te tai ae aki maan, I kaitibo ma aomata aika a rangi ni kaokoro ma ngai. Ma ngke I tabe ni kinaia, I kunea bwa ara koaua kanga akea raoi te kaokoro iai. I karekea ungan nanou man bwaai aika ti titebo iai.
Teuana te bwai ae I kunea ae ti tibauaia bon te nano ni ibuobuoki nakoia taan birinako mai abaia ake a tia ni katukaki ma te maraki ao te mangongao. Kunean tibwaakin te reitaki e bon rangi ni tamaroa. I karekea te kukurei n aio ao ni namakina te tangira ae korakora ibukia aomata ake I kaitibo ma ngaia.
N te tai are ti kunea iai nanoia aomata, ti kona iai n maroro ibukin kakaokorora, ao ai aron naba tibwaakin arora, ma te nano ae itiaki ni kan reiakina arora n tatabemaniira. Te taneiai aei e kauringai bwa aomata aika a raraoi taabo nako a kekeiaki ni karaoa ae raoiroi ni kaineti ma aia koaua.
Taratara raoi
Te kabane n tamaroa n waaki ibukin te reitaki ma tabeman bon man te taratara raoi ao ni karekei kawai tabeua ni moana te kakarabakau. Te katooto, ngkana ko nora temanna ae iai ana bwatika ae rangi n tikiraoi, atonga, Auee, I tangira am bwatika! ao imwiina titirakinia ibukina.
Te titiraki ae bebete n aron “E uara am bong aei?” I kona n reitiko ma temanna. Ko konaa n angi mwengaraoi n te moan tai. E kainanoa te kakaraoana, ma e kaunga gkana ko a taneiai iai.
Taraa Nako Tinanikum
Te tia Kamaiu e kaitibo ma aomata aika a mwaiti man katei tabeua. E anga baina ni ibuobuoki nakoia ake a katinanikuaki. E nakon kawaina ni kaitibo ma aoraki ao ake a katinanikuaki. E taetae ma ngaia, ao e kamauia.
Ngkana ti anaa arona ni kakeaa anne, e na rangi n tamaroa riki te aonaaba. Buokia tabeman n anga aika a bubura ke uarereke. Kanakoa te rongorongo ae kakateke, tibwai amwarake, ao kairia n am tibwatibwa anne te aomata ae mwanuokinaki irouia tabeman. Karaoan ae raoiroi n aron aikai e na buokiko n reitaki ma akana irarikim. Kamimin, mwakuri aikai e na kanakoraoira riki.
Tai Katibanakoa
Te kauoua ni korakora n tua bon “tangira raom n ai aron tangiram i bon iroum” (Mataio 22:39). Uringnga bwa ngaira bon natin te Atua ni kabane. Au taratara n te aonaba e rikirake ao I a tamaroa riki ngkana I kaitibo ma tabeman—kain rarikiu—aika a kaokoro ma ngai. Tai katibanakoa bwa tera ae ko na reiakinna mairouia tabeman.
Ngkana ko anga te ibuobuoki ao n reiakinna n tangira ao n karinea kakaokoroia aomata ake i rarikim, ko na bon mimi ni raneanean ao kamimin te aonaba.