“E Konaa Iesu Kristo …,” Ibukin Kakorakoraaia Kairake, Tebetembwa. 2022.
Nakomai, Iriirai
Taeka n Rabakau; Minita; Itaia
E Konaa Iesu Kristo …
Koaua ake a koreaki ngaa n ririki n nako e reireiniko bwa tera are e konaa ni karaoia te Uea ibukim n te bong aei.
Tia Onimaki ni Koaua, iroun J. Alan Barrett
Akea tokin tain te koaua mairoun te Atua. Aio bukina bwa te wanawana ane bon “bwaai aika ngkai, ma aika a na roko” (Iakobwa 4:13).
Koaua ake a koreaki ngaa n ririki n nako n te O Tetemanti a boni koaua naba ngkai. Ao tabeua mai ibuakoia a buokiko n nooria bwa tera ae kona ni karaoia te Uea nakoim n te bong ai. Aikai koaua tabeua man booki aika Taeka n Rabakau, Minita, ao Itaia (ake ko na kamatebwaia n te namakaina aio). Ana kaotia nakoim bwa Iesu Kristo e konaa …
Kaira Kawaim
N taai tabetai, ti bane n namakina te aki ota, bua, ao tangiran te kairiiri. Ngkana ko anga am onimaki ae bwanin nakon te Uea, nanorinano, ao kakaitau, e na kaira kawaim” (taraa Taekan Rabakau 3:5–6).
Ngkan ako kawakin An tua nako, E na “kairiko n te kawai are ko na bon riai n nako iai” ao ni karekea “raum … n aron te karanga” (Itaia 48:17–18).
Te Kaitibo ma te Tia Kamaiu, iroun Jen Tolman
Anganiko te Kantaninga
Te aoaro ao te anua ni maiu n te aonaaba aio e kona n taraa n tamaroa ke ni kakukurei. Ma ana reirei Iesu Kristo e konaa ni buokiko n noora akean ao tawen ana waaki te aonaaba.
Mwakuri ni kabane “aika a karaoaki iaan taai … akea manenani bwaai ni bane ao boni kaean te ang” (Minita 1:14). N taekana teuana, ana kawai te aonaaba a karekea te unun. Ai aron kaean te ang ao kataakina ni karekeaki. E roko te kukurei ngkana ti anga te karinerine ao te karine nakon te Tama are i Karawa ao kawakinan Ana tua nako (taraa Minita 12:13).
A mwaiti aomata n te aonaaba aio “atonga te buakaka bwa te raoiroi, ao te raoiroi bwa te buakaka; … te ro bwa te ota, ao te ota bwa te ro; … atonga te maai bwa e kangkang, ao ae kangkang bwa e maai” (Itaia 5:20). Ma e kaokaota te koaua te Uea. Man irakin Ana kawai ao Ana taeka, kam na “otinako ma te kakatonga, ao ni kairaki nako ma te rau” (taraa Itaia 55:8–12).
(Taraa naba Itaia 40:6–8; 51:7–8.)
Kabwarai Am Bure
Ti bane ni karaoa te kaairua. Ti bane n tia ni bure. Ngkana ti raira n nano ao ni keiaki ni kateimatoa kawakinan ana tua te Atua, E na kaitiakiira ana ni karokoraoira riki Iesu Kristo. “E na ruo ana nanoanga nako [aora]; … ao ane e na nanoangai iai” (Itaia 55:7). E a tia n taekinna:
“Tao ai aroni kunnikai aika uraura ami bure, ao a na riki ni mainaina n ai aron te tinoo; ngkana tao a uraura n ai aron te bwai ae moan te uraura, ao a na riki n ai aroni buraen te tibu.” (Itaia 1:18).
“Ngai, ae boni Ngai, ae I kamaunai am bure… ao N na aki uring am buakaka ” (Itaia 43:25).
Rawetamnei iroun Mark Marbry
Kakorakorako
Ngaira ni kabane ti namakina te maamara ke te kua n taai tabetai. E kona n kakorakorako Iesu Kristo. “Iroun te Uea ae Iehova akea tokin korakorau” (Itaia 26:4). Ngkana ko nanorinano ao n onimaki Irouna, He na buokiko n totokoi kaririaki, karaoi babaire aika a matoa, ao n waaki nako e ngae ngke bati kangaanga. E taku naba:
“Tai maaku; I a buokiko Ngai: tai barannano; ibukina Ngai Atuami: N na kakorakorako; eng, N na buokiko” (Itaia 41:10).
N na Bon Aki Mwanuokiniko
E kareanna te Tia Kamaiu ae Iesu Kristo nakoim ibukina e tangira Tama ae i Karawa—ao ibukina bwa E tangi riko. Ana naga karea e karikia ibukira bwa ti na manga uti ao n reke ara tai ni katotongnga riki Tama ae i Karawa. E na bon aki mwanuokiniko ke n aki uringko. E taku naba:
“E kona te aine ni mwanuokina natina ae e mamma …? eng, a kona n mwaninga, ao Ngai N na aki manuokiniko.
Nooria, I a tia ni koroi arami iaon nanon baiu” (Itaia 49:15–16).
Ngkai ea tia ni karaoa ae bati ibukira ao n aki mwanuokinira, ngaira, naba, ti na keiaki “n Ururingnga n taainako” (Reirei ao Berita aika Tabu 20:77, 79).