“Jisōs Kraist ej Letok n̄an Kōj Kōjatdikdik,” N̄an Kōkajoorļo̧k Jodikdik ro, Jept. 2022.
Jisōs Kraist ej Letok n̄an Kōj Kōjatdikdik
Ilo ad jerbal in jipan̄ ro jet, Jisōs Kraist ej letok n̄an kōj kōjatdikdik bwe men ko renaaj em̧m̧an ilo mour ko ad make.
Likao ro jān Cusco, Peru, rej jerbal ippān doon n̄an leļo̧k jerbal in jipan̄.
Mour in eobrak kōn elon̄ apan̄ ko. Emōj am bōlen iooni jet iaer. Ewōr men ko rej kōm̧m̧an en̄jake ko āinwōt poub im inepata, mijak im kwōr. N̄e jej en̄jake men kein, men eo jej aikuj kōm̧m̧an ej n̄an reiļo̧k ilowa—n̄an lale kōj make im aikuj ko ad ilōn̄in ko jet. Jej ļōmņak bwe eļan̄n̄e jenaaj bōk ad iien im aoleped ad maron̄ n̄an “m̧adm̧ōde” elōn̄ men ko, jemaron̄ eļļa jen būraabōļōm̧ ko ad.
Ak Jisōs Kraist ej kwaļo̧k n̄an kōj juon iaļ eo em̧m̧anļo̧k. Ekar katakin: “Jabdewōt eo ej pukot bwe en dāpij an mour enaaj jako jān e; im jabdewōt eo an mour enaaj jako innem e in enaaj kōjparok e” (Luk 17:33). Wāween eo emōkajtata n̄an bōk kōjatdikdik ilo melijon̄ ko ej n̄an lelo̧k būruom n̄an Rilo̧mo̧o̧r eo im loore waanjon̄ak eo An im jerbal in jipan̄ n̄an ro jet.
Kōmour eo ilo Bethesda, jān Gary Smith
Mour eo an Rilo̧mo̧o̧r eo eaar waanjon̄ak eo eweppān kōn iakwe im meanwōd n̄an armej. Aolep iien ej meļo̧kļo̧k E kōn wōt ro jet. Jerbal ko An me ejjeļo̧k kalijōkļo̧k ie rekar kwaļo̧k kōn aolep men ko E ekar kōm̧m̧ani aolep raan ilo mour eo An im ekar ejjeļo̧k jem̧ļo̧kier n̄an juon jijen eo ak raan ekwojarjar eo emake.
Ilo ad kōm̧m̧ane menin āinwōt kar Rilo̧mo̧o̧r eaar kōm̧m̧ane, imaron̄ kallim̧ur n̄an kom̧ bwe jenaaj lo iien ko rem̧m̧an ejjeļo̧k jem̧ļo̧kier n̄an leļo̧k kōj make n̄an jipan̄ ilo ittino im ilo jouj n̄an armej ro rej aikuji kōj.
Menin emaron̄ jipan̄ kōj n̄an itok n̄an jeļā eļapļo̧k kōn Rilo̧mo̧o̧r eo im kapukōt ilo kōj make aenōm̧m̧an ilo laļ in aaet ilo ad kōļapļo̧k iakwe an Kraist n̄an ro jet. Ilo am “ajjeļo̧k mour eo am” n̄anjipan̄ ro jet, ļoore waanjon̄ak eo an Rilo̧mo̧o̧r, E enaaj jipan̄ eok.
Enjeļ ro Aolep Raan
Ekkā an Rilo̧mo̧o̧r eo tōl ro jet n̄an mour ko ad n̄an jipan̄ bōktok aenōm̧m̧an n̄an kōj im kaenōm̧m̧an eo jej aikuji ilo iien ko reppen. Armej rein rej kejeram̧m̧an ilo ad en̄jake āinwōt enjel ro jilkintok jān lan̄, bwe aaet rej.
Baam̧le eo aō im n̄a ekar wōr am en̄jake ilo jejjo̧ iien ko raorōk im ein juon jen doon jitibōn kaeņōm̧m̧an im meanwōd letok ilo rainin jen eo ej kūr jen engeļeo emaron̄ bōktok. Ikōņaan reilikļo̧k n̄an juon iaan iien ko. Ilo 2003, kōm kar em̧akūt jān ijo jikum̧ ilo Brazil n̄an Utah ilo United States.
Ilo iien m̧ōļo jab eo, ekar juon ļan̄ in sņo ko reļļap ilo Utah ekar waļo̧k ālkin jet iiō ko. Kōmij jan̄in kar lo jabdewōt kain in ilo mour ko am, ke kōm kar rūttoļo̧k ilo mejatoto ko rejjab m̧ōlo. Im̧weo imōm̧ ekar pād ilo juon kona ioon juon bat eo me ekar wōr juon jikin etetal aitok.
Ke sņo eo ekar jinoe, kōrā eo ippa ekar niknik an jinoe popoikļo̧k sņo ko ilo jikin diwōj deļo̧n̄ in wa eo im jikin etetal eo aitok. Ijjab maron̄ kar jipan̄ kōnke ikar jikāet ilo aij im būlak peiū jejjo raan ko remootlak. Jirilo̧k jab eo ekar kōm̧m̧an bwe in m̧wijm̧wij im wōr juon korak kileplep ilo peiū.
Ke liin ekar jino popoikļo̧k sņo ilo eria eo ilo an juon men eo ekāāl n̄ane , lio pāleeō jitōn bōro ekar jaje bwe ej aikuj in kajitļo̧k chute eo ālkin karreoik ijo rejet in jikin diwōj deļo̧n̄ an wa eo. Kōn menin, ke liin ekar etal n̄an jait eo juon n̄an karroeiki, ekar ijo me chute eo kajejjetļo̧k sņo ko. Ekar āindein an etal itok, ekar ejjeļo̧k tōprak. Ej juon ettoon ļapļap!
Kōnke ekar to an pād ilo m̧ōļo, liin ekar jorrāān lo̧jiln̄in im ekar enan̄in lukkuun in jaron̄ron̄ ium̧win ruo allōn̄ ko. Ilo ejja iien eo wōt, laddik eo neju 16 an iiō ekar joreen likin ilo ad kar ikkure jikāāt im aikuj kar pād wōt ilo peet eo n̄an kejmour. Kōn menin en̄in ekar kōm, juon ej pād ilo peet, juon ejaron̄ron̄, juon ekorak pein, im kōm aolep kar jab em̧akūtkūt.
Ij tōmak kar menin kalimjōk kōm jān ro rūtūrūm. Ilo juon iaan jibbon̄in ko, relukkuun in m̧ōļo ilo enan̄in 5:00 awa jibbon̄, ikar ruj kōn juon ainikien juon snowblower itunam̧ōjin wintō eo aō. Ikar reinam̧ōjļo̧k ilo wintō eo im ikar lo iturejet in iaļ eo juon rūturū, Brother Blaine Williams. Epaake jiljilimjuonn̄oul jim̧a iiō dettan, ekar kejekdoon okmeņeņ eo an m̧weo im̧ōn,im em̧m̧an n̄an an kar itok ilo an jab ba kake im karreoik jikin diwōj deļo̧n̄ an wa eo waam im jikin etetal eo, ilo an jeļā bwe kōm jab kar maron̄ kōm̧m̧an make iaam.
Pija ko jān Getty Image ko
Bar juon m̧ōtta, Brother Daniel Almedia, ekar jedetok n̄an m̧weo imōm̧ bwe en ettōrļo̧k kake n̄a n̄an Salt Lake n̄an jerbal, āinwōt aō kar jab maron̄ kattōr kōn korak kileplep eo ilo peiū. Rekar pād im jipan n̄a aolep jibbon̄, kwaļo̧k iakwe eo aer kōn jerbal kein redik ilo jouj, mae iien baamle eo am ekar mour im jekar maron̄ bar kōm̧m̧ani men kein make iaam.
Ilo iien m̧ōļo eo ilo 2003, rein jeū ilo jitōb kar jilkintok n̄an kim. Brother rein ruo raar ļoor waanjon̄ak eo an Rilo̧mo̧o̧r eo im kar ļōmņak kōn aikuj ko am m̧okta jān aer ļōmņak kōn ko aer make.
Jisōs Kraist ej Letok Aenōm̧m̧an
Jerbal in jipan̄ n̄an ro jet ej letok n̄an kōj juon keļmenļo̧kjen eo eļapļo̧k im aorōkļo̧k . Ilo ad jerbal in jipan̄ n̄an ro jet, Jisōs Kraist ej letok n̄an kōj kōjatdikdik bwe jabdewōt men naaj em̧m̧an ilo mour ko ad make.
Ilo ad keppeļo̧k būruōd āinwōt an kar Rilo̧mo̧o̧r eo kōm̧m̧ane enaaj kōjeram̧m̧an kōj iien ko otemjej ilo ejjeļo̧k jem̧ļo̧kin n̄an leļo̧k kōj make n̄an jipan̄ ro jet ilo ittino im ilo jouj n̄an armej ro rej aikuji kōj. Mour āinwōt kar Rilo̧mo̧o̧r eo ekōm̧m̧an bwe jen barāinwōt kōļapļo̧k iakwe ilo kōj āinwōt an kar Kraist n̄an ro jet. Menin ej jipan̄ kōj en̄jake eļapļo̧k iakwe, aeno̧m̧m̧an, meram, im peran.
Rilo̧mo̧o̧r eo ej karuwainene kōj n̄an kapukōt E ilo aolep ļōmņak ko im n̄an ļoore E. Menin ej letok n̄an kōj kallim̧ur eo bwe jen maron̄ in etetal ilo meram eo An im bwe An tōl en bōbrae kareel eo an marok ilo mour ko ad. Ilo am “ajjeļo̧k mour eo am̧ n̄an i E, E naaj jipan̄ kwe pukōt eok make.
Pija ko jān Getty Image ko
Oktakļo̧k n̄an Kraist, Aolep iien
Ij kwaļo̧k aō kam̧ool ebin bwe Jisōs ekar jerkak jān mej im bwe E emour. Ij kam̧ool n̄an kom̧ bwe kōn E im katok in pinmuur eo An eļap, Rilo̧mo̧o̧r ej letok n̄an kōj wāween ko n̄an eļļā jān mej, jim̧or ilo kanniōk im jetōb.
N̄an kakobaba, E ej bareinwōt letok n̄an kōj aeņōm̧m̧an im kam̧ool ilo iien ko reppen. Ij kallim̧ur n̄an kom̧ bwe ilo ami likūt ami lōke ilo Jisōs Kraist im Pinmuur eo An, niknik ilo tōmak koad n̄an jem̧ļo̧kin, jenaaj lan̄lōn̄ kōn kallim̧ur ko an Jemedwōj Ilan̄ ejitōnbōro, eo ej kōm̧m̧ani aolep men ko ilo kajoor eo An n̄an jipan̄ kōj jepļaak n̄an im̧aan Mejān juon raan.