“Kii ko Emen an Nipai n̄an Meļeļe kōn Aiseia,” N̄an Kōkajoorļo̧k Jodikdik ro, Jept. 2022.
Itok, Ļoor Eō
Aiseia
Meļeļe ko Raorōk Emān an Nipai n̄an Meļeļe kōn Aiseia
Epen ke am riiti Aiseia? Nipai epād ijin n̄an jipan̄!
Kōmeļeļe ko jān Kevin Keele
Elukkuun alikkar bwe jeje ko an rikanaan Aiseia ilo Kallim̧ur Mokta relukkuun aorōk kōnke ekkā aer kout ilo Kallim̧ur Ekāāl im Bok in Mormon. Irooj ekar ba, “Reļļap naan ko an Aiseia” (3 Nipai 23:1).
Innām, etke ej aikuj kar pen n̄an meļeļe?
Jab ebweer! Nipai ejeļā apan̄ eo ad. Ekar errā bwe “Aiseia eaar kōnono elōn̄ men ko raar pen … n̄an meļeļe” (2 Nipai 25:1). Kam̧m̧oolol, Nipai ekar letok n̄an kōj emen kii ko me remaron̄ jipan̄ kōj kōpeļļok meļeļein naan ko an Aiseia.
Meļeļe eo Eaorōk Kein Kajuon: Mour ilo Raan Kein Āliktata
Nipai ekar jeje bwe ro rej mour ilo “raan ko āliktata” renaaj maron̄ “meļeļe” naan ko an Aiseia (2 Nipai 25:8). Bōlen kōnke armej ro ilo raan ko āliktata emaron̄ wōr aer meļeļe ko me armej ro ilo iien ko an Aiseia rekar jab. Jem̧aan, armej remaron̄ kar jab meļeļe wāween an armej maron̄ likit “nana āinwōt eṃṃan, im eṃṃan ñan nana” (Aiseia 5:20) im aaet jej loe men in ej waļo̧k ipelaakid.
Barāinwōt, armej ro ilo jem̧aan remaron̄ kar jab meļeļe ta eo Irooj ej ba ke E kar ba “Inaaj jerbale juon men in bwilōñ ñan ro ri aelōñ in, aet, juon jerbal men in bwilōñ” (Aiseia 29:14).
Rikanaan ro raan kein emōj aer ba n̄an kōj kōn “jerbal in ekabulōn̄lōn̄ im aiboojoj” ej kōnaan kōn itok eo an Bok in Mormon im jerbal ko rej wōnmanļo̧k kijien Jeplaaktok eo an gospel eo an Jisōs Kraist. Kwojeraam̧m̧an ilo am mour ilo iien in n̄an kam̧ool elōn̄ iaan kanaan ko emōj aer kūrm̧ool an Aiseia.
Meļeļe eo Eaorōk Kein Karuo: Bōk Jetōb in Kanaan
Nipai eaar kwaļo̧k bwe naan ko an Aiseia “raar kajoor n̄an aolepen ro me raar obrak kōn jetōbin kanaan” (2 Nipai 25:4). Menin emaron̄ kapokpok ilo jinoin, ak ejjab meļeļein bwe rikanaan wōt remaron̄ meļeļe kōn Aiseia. Jeje ko rekwojarjar ej katak bwe “bwe kōnnaan kōn Jisōs ej jetōb in rūkaanij” (Revelesōn 19:10). Ilo naan ko jet, n̄e kwōj tōmak ilo Jisōs Kraist, emōj am bōke kadede bun̄ten eo jinointata n̄an meļeļe Aiseia!
Jeje ko an Aiseia rej kam̧ool kōn Jisōs Kraist im Pinmuur eo An. Barāinwōt etan ej kam̧ool kōn Rilo̧mo̧o̧r eo! Meļeļein etan Aiseia ej “Irooj ej Lo̧mo̧o̧r,” ak “Jisōs ej Lo̧mo̧o̧r.”
Kii Kein Kajilu: Meļeļe Jeje ak Kōkaļļe ko
Nipai ekar kōmeļeļe bwe naan ko an Aiseia repen n̄an ro rej jab lukkuun jeļā “ilubwiljin riJu ro raar kanaan.” (2 Nipai 25:1). Naan ko an Aiseia epidodo n̄an meļeļe ilo ad katak eļapļo̧k kōn jeje ilo raan ko an Aiseia, āinwōt bwebwenato ko im kōkaļļe ko. Aiseia ekkā an kōjerbal kōkaļļe ko rekaibokbok ilo jeje ko an.
N̄an waanjon̄ak, Aiseia ekar jeje kōn ro rej “reutiej im toojlo̧k” āinwōt “aik ko ilo Lebanon” im “oak ko ilo Bashan [Syria]” (2 Nipai 12:13). Aik im oak rej wōjke ko repen. Aiseia ekar kōjerbale ilo wāween bwebwenato n̄an ba bwe armej ro reuteij būruer im kiplie rej āinwōt wōjke ko raitok kōnke emōj aer kapen būruer im lōmņak bwe rem̧m̧anļo̧k jān ro jet. Riiti Aiseia āinwōt bwebwenato ko emaron̄ jipan̄ kōj meļeļe eļapļo̧k ta ej katakin.
Meļeļe eo Eaorōk Kein Kemān: Jeļā Jikin ko
Aiseia ej ņae etan 108 jikin ko reoktak jen doon ilo jeje ko an. Menin emaron̄ kaipokpok n̄an emeemej, eļaptata n̄e kwoj jan̄in jo̧kwe ijo! Meļeļe eo eaorōk kein kemān an Nipai ej n̄an jeļā “jikin eo ipeļaakin ijo” Jerusalem (2 Nipai 25:6).
Jerusalem ej āinwot kar baj wōt jān jinoin, ak jemaan ekar pād iolapin jilu jikin ko rekajoor rej jum̧aeik doon. Rear in ej Babylon, jikin jin̄a ko im wāween tūrejab. Tuean̄ ej Assyria, jikin ritariņae ro rekajoor ilo raan ko an Aiseia. Iturōk ej Egypt, jikin wia kake eo eļap. Ilo ad jeļā jon̄an ļap in emaron̄ jipan̄ kōj lale wōn ekōņaan kakkure Israel im bōk rikalibuuj ro. Ilo kōkaļļe, Babylon ej bōk jikin men ko an laļ, Assyria eo uteij, im Ijipt kōn m̧weie.
Naan Ko an Aiseia rej n̄an Kwe
Aiseia ekar katakin kōn elōn̄ men ko jet raorōk n̄an ad meļeļe. Ekar kwaļo̧k an naan in kam̧ool kōn jepelōklōk im aintok eo an Israel, eo Būreejtōn Russell M. Nelson ekar ba “ej men eo aorōk tata ej bōk jikin rainin. … Im n̄e kwōj kālet n̄an kōm̧m̧ane, n̄e kwokōņaan, komaron̄ pād ie ilo ijo eļap” (“Hope of Israel” [worldwide youth devotional, June 3, 2018], 8, HopeofIsrael.ChurchofJesusChrist.org; see Aiseia 49:13–23).
Aiseia ekar bar kwaļo̧k an naan in kamool kōņ ekalōk eo an Zaion n̄an kepopo eo an Itok eo Kein Karuo an Rilo̧mo̧o̧r eo im 1000 iiō in kiin ioon (lale, n̄an waanjon̄ak, Aiseia 51–52). Kōn juon naan in kam̧ool kōn Jisōs Kraist, Jetōb emaron̄ kamool n̄an kwe kōn aorōk in naan ko an Aiseia im elmen aer nej jipan̄ im kōjeraam̧m̧an mour eo am rainin.