“Katak kōn Jisōs Kraist im Bōk Kajoor eo An,” N̄an Kōkajoorļo̧k Jodrikdrik ro, Jept. 2022.
Naan eo Āliktata
Katak kōn Jisōs Kraist im Bōk Kajoor eo An
Jān juon kōnono ilo Eprōl 2017 kweilo̧k eo eļap.
Rainin, ikōņaan kōnono kōn ewi wāween ad maron̄ bōktok n̄an mour ko ad kajoor eo an ad Irooj im Maajta, Jisōs Kraist.
Jej jino ilo ad ekkatak kōn E.1 “Jej jab maron̄ [bōk] lo̧mo̧o̧r ilo jajeļo̧kijeņ” (Katak im Bujen ko 131:6). N̄e eļapļo̧k ad meļeļe katak ko an Rilo̧mo̧o̧r eo im ta eo E ekar kōm̧m̧an n̄an kōj, enaaj ļapļo̧k ad jeļā bwe E maron̄ letok kajoor eo jej aikuji ilo mour ko ad.
Āinwōt Armej ro Rekwojarjar ilo Raan-Ko Āliktata, jej kōnono kōn mijen eo An āinwōt Pinmuur eo an Jisōs Kraist, eo ekar kōm̧m̧an bwe jerkakpeje eo ej juon men em̧ool n̄an aolep im kōmaron̄ mour indeeo n̄an ro otemjej rej ukweļo̧k jān jerawiwi ko aer im bōk akkōjparok kain̄i ko raorōk im bujen ko.
Ium̧win karōk indeeo eļap an Jemed, Rilo̧mo̧o̧r ekar en̄taan. Rilo̧mo̧o̧r ekar rupi to ko an mej. Rilo̧mo̧o̧r eo ekar kōļļāik wōņāān jerawiwi ko im bōd ko ad im julo̧ki pedped wōt ioon ad errā n̄an ukweļo̧k. Rilo̧mo̧o̧r eo ej bōkļo̧k kōj jān mej an kanniōk im jetōb.
Naan kein rekwojarjar āinwōt Pinmuur im Jerkakpeje rej kōmeļeļeik ta eo Rilo̧mo̧o̧r eo ekar kōm̧m̧ane, ekkar n̄an karōk eo an Jemed, bwe jen maron̄ mour kōn kōjatdikdik ilo mour in im bōk mour indeeo ilo laļ eo ej itok.