“Ua Ofo Mai e Iesu Keriso ia i Tatou le Faamoemoe,” Mo le Malosi ole Autalavou, Sete. 2022.
Ua Ofo Mai e Iesu Keriso ia i Tatou le Faamoemoe
A o tatou auauna atu i isi, ua tuuina mai e Iesu Keriso ia i tatou le faamoemoe o le a lelei mea uma i o tatou lava olaga.
Alii talavou mai Cusco, Peru, o galulue faatasi e auauna atu.
O lenei olaga ua tumu i le tele o luitau. Atonu ua uma ona e aafia i nisi. E tele mafuaaga o le atuatuvale ma le atugalu, fefe ma le popolevale. Pe a tatou oo i nei mea, o le faanaunauga e mo i tatou ia liliu atu i totonu—ia tausia i tatou lava ma o tatou lava manaoga e sili atu i lo isi mea uma. Tatou te manatu afai tatou te faaaluina o tatou taimi ma le malosi e taumafai ai e “faaleleia” mea, e mafai ona tatou foia lo tatou ala e aluese ai mai o tatou faafitauli.
Ae ua faaali mai e Iesu ia i tatou se auala sili atu. Sa Ia aoao: “O se saili ia saogalemu lona ola e maumau ai ia te ia; a o se faamaumau ai e faasaoina e ia” (Luka 17:33). O le auala sili ona vave e maua ai le faamoemoe i ou tofotofoga o le liliu atu lea o lou loto i le Faaola ma mulimuli i Ana faataitaiga ma auauna atu i isi.
O Le Faamalologa i Petesa, saunia e Gary Smith
O le soifuaga o le Faaola o se faataitaiga atoatoa o le alofa ma le agalelei i tagata. E faagalo lava e Ia o Ia lava e fai ma sui o isi tagata. O Ana galuega le manatu faapitoa na faailoa mai i mea uma na Ia faia i aso uma o Lona soifuaga ma sa le tapulaa i se vaitau faapitoa.
A o tatou liliu atu i fafo o tatou loto e pei ona sa faia e le Faaola, ou te faamautinoa atu ia te outou o le a tatou maua avanoa e le faatapulaaina e tuu lemu atu ai i tatou lava ma le agalelei i tagata e manaomia i tatou.
O le a fesoasoani lenei mea ia i tatou e iloa atili ai le Faaola ma maua ai mo i tatou lava le filemu i le lalolagi e tusa lava pe tatou te atiina ae le alofa mama sili atu i isi. A o e “faamaumau lou ola” i le fesoasoani atu i isi, mulimuli i le faataitaiga a le Faaola, o le a Ia fesoasoani ia te oe.
Agelu o Aso Uma
E tele taimi o le a taitai ai e le Faaola isi i o tatou olaga e fesoasoani e aumaia ia i tatou le filemu ma le mafanafana tatou te manaomia i taimi o tofotofoga. O nei tagata faamanuiaina e tatou te lagonaina ai le pei o agelu na auina mai le lagi, aua e mautinoa lava o i latou.
Na matou lagonaina ma lo’u aiga i ni mea eseese na tutupu ia lagona o le mafanafana ma le filemu lea e mafai ona aumaia e se agelu faaona po nei. Ou te fia manatunatu i se tasi o na mea na tupu. I le 2003, sa matou siitia ese ai mai lo matou atunuu o Pasila i Iuta i le Iunaite Setete.
O lena taumalulu, sa taia ai i matou i se tasi o āfa kiona sili ona malosi na tupu i Iuta mo le tele o tausaga. Matou te le i vaai muamua lava i se mea faapea i o matou olaga, ona sa matou ola a’e faatasi ma niu ma matafaga oneone. Sa tu le matou fale i se tulimanu i luga o se maupuepue lea sa i ai se ala savali umi lava.
Ina ua amata le kiona, sa amata ma le lototele e lo‘u toalua ona faga ese le kiona mai le auala taavale ma le auala savali. Sa le mafai ona ou fesoasoani ona sa ou see i le aisa ma gau ai lo‘u tapulima i ni nai aso na muamua atu. O lena faalavelave na faia ai se taotoga ma se sima tele i lo’u lima.
A o amata ona ia fagaina le kiona i le masini, sa le iloa e si o’u toalua pele e ao ona ia suia le itu o le gutu e feula i ai pe a uma ona faamamaina le tasi itu o le auala taavale. O lea, ina ua ia alu i le isi itu e faamama, o iina lea sa faasaga atu i ai le gutu o le masini feula kiona. Sa ia fefo’ifo’ia’i ai lava e aunoa ma se mea na ausia. Oka se faaletonu!
Ona o le umi na i ai i l e malulu, sa aafia ai ona taliga e lua ma sa toeitiiti lava a tutuli atoa ai mo le lua masina. I le taimi lava lea e tasi, sa faamanualia ai lo‘u atalii e 16 tausaga lona tua i lana faaseega i le aisa ma manaomia ai ona nofo i le moega ina ia faamaloloina. Ia o matou la lena, tasi na faataotolia i le moega, tasi na tutuli, tasi na sima le lima, ma sa maalilili uma.
Ou te mautinoa sa ese se vaaiga a o matou tuaoi ia i matou. I se tasi o na taeao po malulu tele pe tusa o le 5:00 i le vaveao, sa ou ala a’e ai i luga i le leo o se masini feula kiona i fafo o lo’u faamalama. Sa ou tilotilo atu i fafo i le faamalama ma ou vaaia ai i le auala lo’u tuaoi, o Uso Blain Williams. I le toeitiiti atoa le 70 o ona tausaga, sa ia tuua ai lona fale mafanafana ma toafimalie ma sau filemu ma faamama le matou auala taavale ma auala savali, ma le iloaina sa le mafai ona matou faia e i matou lava.
Atapue mai le Getty Images
O se isi uso, o Uso Daniel Almeida, sa sau i lo matou fale e ave a’u i Sate Leki mo le galuega, ona sa le mafai ona ou aveave i le faalavelave o le sima o lo’u lima. Sa latou i ai iina mo a’u i taeao uma, ma faaalia lo latou alolofa i nei faatinoga faatauvaa o le agalelei, seia oo ina faamaloloina lo‘u aiga ma sa toe mafai ona matou faia na o i matou ni mea.
I lena taumalulu tetele o le 2003, na auina mai ai nei uso agelu ia i matou. Na mulimuli nei uso e toalua i le faataitaiga a lo tatou Faaola ma mafaufau i o matou manaoga a o le i mafaufau i o laua lava manaoga.
Ua Ofo Mai e le Faaola le Filemu
O le auauna atu i isi e aumaia ai ia i tatou se vaaiga maualuga atu ma paia atu. A o tatou auauna atu i isi, ua tuuina mai e Iesu Keriso ia i tatou le faamoemoe o le a lelei mea uma i o tatou lava olaga.
O le liliu atu o o tatou loto i fafo e pei ona sa faia e le Faaola o le a faamanuiaina ai i tatou i avanoa e le faatapulaaina e tuuina atu ai i tatou lava ma le filemu ma le agalelei i tagata o loo manaomia i tatou. O le ola ai e pei ona sa faia e le Faaola e fesoasoani foi ia i tatou e atiina ae le alofa mama sili atu faaKeriso i isi. E fesoasoani lenei mea ia i tatou e maua ai fuataga sili atu o le alofa, filemu, malamalama, ma le malosi faafouina.
Ua valaaulia i tatou e le Faaola e saili atu ia te Ia i mafaufauga uma ma mulimuli ia te Ia. Ua aumaia ai ia i tatou le folafolaga e faapea e mafai ona tatou savavali i Lona malamalama ma o Lana taitaiga e puipuia mai ai le tosinaga a le pouliuli i o tatou olaga. A o e “faamaumau” lou ola ia te Ia, o le a Ia fesoasoani ia te oe ia maua oe lava.
Atapue mai le Getty Images
Liliu Atu ia Keriso, i Taimi Uma
Ou te tuuina atu la‘u molimau paia na toetu mai Iesu mai le oti ma o loo soifua o Ia. Ou te molimau atu ia te outou e faapea, na ala mai ia te Ia ma Lana Togiola e le iu, na saunia ai e le Faaola mo i tatou le ala e faatoilalo ai le oti, i le faaletino ma le faaleagaga.
Ma le isi, ua Ia ofoina mai ia i tatou le faamafanafanaga ma le faamautinoaga i taimi faigata. Ou te faamautinoa ao tatou faalagolago ia Iesu Keriso ma Lana togiola faalelagi, ma tumau i lo tatou faatuatua e oo i le iuga, o le a tatou olioli i folafolaga a lo tatou Tama Faalelagi pele, o le o loo faia mea uma i Lona mana e fesoasoani ai ia i tatou ia toe foi atu i Lona afioaga i se aso.