Fesili ma Tali

“O le tagofia o le faamanatuga i le fale sa manaia tele. Aisea e finagalo ai le Alii tatou te toe foi i le falelotu?”

“O le auai i le lotu tatou te maua ai le malosiaga ma le faaleleiga o le faatuatua lea e sau mai le fegalegaleai ma isi tagata talitonu ma tapuai faatasi ma i latou o loo tauivi e tumau i luga o le ala o feagaiga ma ia avea ma ni soo lelei atu o Keriso.”

Peresitene Dallin H. Oaks, Fesoasoani Muamua i le Au Peresitene Sili, konafesi aoao Oke. 2021 (Liahona, Nov. 2021, 26).

Tagai i le Mataupu Faavae ma Feagaiga 59: 9–10.

Ia Lotogatasi

“E finagalo le Alii ia tatou toe foi atu i le falelotu aua e finagalo o Ia ia tatou latalata atili atu ia te Ia. E finagalo foi o Ia ia tatou lotogatasi o ni uso ma ni tuafafine. O le o i le falelotu, tatou te lotogatasi ai, fesoasoani le tasi i le isi, ma faaali atu ia te Ia lo tatou lotofaafetai mo mea uma ua Ia faia mo i tatou. Tatou te faalolotoina foi lo tatou faatuatua ma aoaoina ni aoaoga fou.”

Melanie M., 13, Mekisiko

Malosi e ala i Tulaga Faatonuina

“Sa maoae le faamanatuga i le fale aua na aumaia ai le Agaga i totonu o o matou fale ma fesoasoani ia i matou ia iloa e tatau ona matou aumaia le lotu i totonu o o matou fale nai lo le na o le taulai atu i ai e faatasi i le vaiaso. Peitai, o nisi taimi o le lotu i le fale e mafai ona e lagona ai le faaesea. O le auai i le faleotu e fatuina ai le malosi e ala i fuainumera.”

Nathan G., 15, Arisona, ISA

Fausia ni Sootaga

“I le lotu o loo i ai se siosiomaga alofa. O iina, e mafai ona e fausia ai sootaga ma faamanuia ai olaga o isi a o faamanuiaina oe i le taimi lava lea e tasi. E taua foi le falelotu mo le fausiaina o lou malamalama i le talalelei. E finagalo le Alii ia tatou talai atu le talalelei ia i latou o siomia i tatou ma fausia Siona.”

Amelia W., 16, Iuta, ISA

Ia Iai Iina mo Isi

“Ina ua amata le faama‘i oti, sa ou popole o le a le mafai ona matou tagofia le faamanatuga, ae sa faataga i maua e le epikopo e fai i le fale! E taumanatunatu nisi tagata pe aisea e tatau ai ona tatou toe foi i le falelotu, ae ou te manatu e tatau ona tatou toe foi atu e faasusulu isi—e talanoa pe fesoasoani i se tasi. E tatau ona tatou o i le falelotu e tuuina atu lo tatou alofa ma faasoa atu o tatou aafiaga.”

Tamara M., 17, Mekisiko

Faafou Feagaiga

“E finagalo le Atua ia tatou toe foi atu i le falelotu aua e le o tagata uma na mafai ona tagofia le faamanatuga i o latou fale. Sa ta‘u mai e lo’u tamamatua ia te a‘u, i le avea ai ma se e umia le perisitua, e tatau ona ou mautinoa ua tofu tagata uma ma lenei avanoa. E taua mo i tatou le o i le lotu ina ia mafai ona tatou faafouina uma a tatou feagaiga.”

Esteban M., 16, Atenitina

O tali ua faamoemoe mo se fesoasoani ma se vaaiga, ae e lē o se faalauiloaga aloaia o aoaoga faavae o le Ekalesia.

O Le A Sou Manatu?

“Ou te faalogo i isi o talanoa e uiga i o latou aafiaga faaleagaga. O le a se mea e mafai ona ou faia pe afai ou te le lagonaina e pei o loo ou mauaina i latou?”

Auina mai lau tali ma le ata ae lei oo i le aso 15 o Oketopa, 2022.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le umi po o le manino.