Faavae Maumaututu

O talavou o le Au Paia o Aso e Gata Ai, o fausia o latou olaga i luga o le Papa o Iesu Keriso (tagai Helamana 5:12).

O Se Suega o Uiga Faaletagata

alii talavou o loo valiina le pa

Ata na tusia e Katie Payne

E le o le mea lea sa ou saini e alu i ai. Sa lava lo‘u naunau e fesoasoani e taulima ai le pa a le tina o lo’u tinamatua i le suauu lino e fesoasoani e puipuia ai. Ae i le aluga o le aso, sa sisina ifo le afu i o‘u foliga ma sa liua lo’u naunautai i le vaivai i le vevela.

Sa fautuaina e lo‘u tina se malologa ma se meainu a o lei toe foi i le galuega, ae sa ou augani atu, ma le naunautai ia faanoanoa.

“Dallin, e leai se taui moni mo le i ai o se uiga lelei pe a lelei mea uma i le olaga,” o lana tala lea. “O le tofotofoga moni o le tagata ma le taui moni e oo mai pe a mafai ona e maua se uiga lelei e tusa lava pe foliga mai e faanoanoa mea uma.”

I se vaiaso mulimuli ane, sa fesili mai ai lo‘u tamamatua pe mafai ona ou valiina lana pa i le suauu lino. Sa umi atu lana pa, ma e tatau ona ma valiina itu uma e lua.

O le taimi lea, sa ou naunau ai e galue i o‘u uiga faaalia e tusa lava pe faigata le galuega. Sa ma vave amata, ae na mautinoa lava, sa lei pine ae ma velasia i le la. Sa foliga mai e le muta le galuega a o ma tauaveina na pakete mamafa o le suauu piipii, ma le magoni leaga. O pupu vaotuitui i luga o le pa na tuia ai o ma vae. E ui i lea, a o ou manatuaina le tala na fai mai ai lo‘u tina, ou te lei faitio. Ou te le’i fiu. Sa ou galue ma le faaeteete ma taumafai e tausisia se uiga faaalia lelei.

Ina ua uma, sa ou tilotilo atu i le pa na faatoa valiina ma lagona le mitamita i mea sa ma faia. Sa ou lelava ma piipii, ae sa ou iloaina sa ou pasia foi se suega taua o uiga faaletagata. Sa ou aoaoina e mafai ona ou maua se uiga lelei e tusa lava pe foliga mai e faanoanoa mea uma.

Dallin H., Oklahoma, ISA