“O Mea e Fiafia Ark e Aoao,” Mo le Malosi o le Autalavou, Sete. 2022.
O Mea e Fiafia Ark E Aoao
Atunuu fou, aganuu fou, uo fou … e le afaina!
Ata na pueina e Clayton Chan
E fiafia Ark i meaai e feu. O se mea fou lenei mo ia. I Filipaina, lea na ia tuputupu ae ai, sa le i feu tele le tofo o meaai.
Ona maua lea o se galuega a lona tama i Meleisia.
I lena taimi, sa feiloai ai Ark i uo i le lotu o e na o mai mai soo se ituaiga o talaaga, e aofia ai ni nai tagata mai Initia.
“Latou te aai i ni meaai e matuai feu lava!” Fai mai Ark C., 14 tausaga, e uiga i ana uo fou. “O lenei meaai e sili atu ona feu nai lo le mea sa masani ona ou ‘ai ai i le fale.”
E ui i lea, o se mea malie—e lei iloa lava e Ark le mea sa ia misia. O lea la ua fiafia o ia e sailiili i se lalolagi fou tau taumafa.
Ioe e le na o le pau lena o le auala na suia ai e uo a Ark i le Ekalesia lona olaga mo le lelei sili atu. “Sa ou fiafia e siitia atu i Meleisia, ae sa ou faanoanoa i le taimi lava e tasi. O uo fou uma lava, ma e faigata ona talanoa i uo fou.”
Ae sa fesoasoani le autalavou o lana paranesi fou ia te ia e faia lena suiga. O se ponesi, ua tele atu mea ua ia iloa e uiga i le tele o vaega eseese. “Ua ou aoao e uiga i aganuu eseese,” o lana tala lea. “E ese meaai, ma e faapena foi lavalava. E felanulanuai o latou ofu, ma e ese le manaia o le ala latou te faia ai!”
Peitai, sa i ai se vaega se tasi o uo, na sili atu ona faamalosia ai o ia nai lo se isi lava taimi ma ina ua mavae le siitia atu: o lona aiga.
Taaloga faatasi ma Uo
E fiafia Ark e faaalu le taimi ma lona aiga, aemaise lava pe a latou taaalo i taaloga kata. O le taaloga Uno o lana taaloga e sili ona fiafia i ai. O le a le mafuaaga? “Ou te manumalo lava i taimi uma,” o lana tala ata lea.
E fiafia foi o ia e taaalo le Monopoly ma ona matua ma lona uso laitiiti, o Leaf. (O lona tuafafine laitiiti e le lava lona matua e auai ai.) Peitai, e tele atu mea o loo faia i taaloga, nai lo le togiina o le maa taisi ma le faaaluina o tupe faafoliga. “E aoao a‘u e o’u matua i auala faapisinisi ma mataupu faavae o tupe i taaloga. O se fautuaga aoga tele mo le lumanai.”
O lona tama o se tagata e fausia polokalama, ma sa masani ona fai e lona tina lana lava pisinisi i Filipaina. E tele o la tomai e tuufaasolo mai. Mo lana vaega, e naunau lava Ark e aoao mea uma na te mafaia mai ia i laua. O loo i ai ni ana fuafuaga tetele mo lana galuega.
O ana mataupu e sili ona fiafia i ai i le aoga o le meaola tautekinolosi ma enisinia. E manao Ark e avea ma se tagata inisinia i mea tau meaola. Faatasi ai ma le maualuga o lana vaaiga, na te faaaogaina avanoa uma na te mafaia e aoao ai se mea fou.
E ui i lea, o le aoao mai ona matua, sa le o taimi uma na manaomia ai e Ark le punavai lea mo le aotauina. E pei o lona fiafia i meaai feu, o le mauaina o se punaoa taua na oo mai mulimuli ane i lona olaga.
Mai le Faamaaa i le Tamaitiiti Aoga
“Sa masani ona ou matua lotomaaa lava,” o le tautino mai lea a Ark. “Ou te lei popole tele i le aoao mai i o’u matua.”
E taumafai o ia e alu na o ia pe aoao mai i ana uo ma faiaoga. Ona ia faitauina lea o se mea i le Tusi a Mamona na faia ai se eseesega tele i le ala na ia vaai ai i mea.
I le Alema mataupu 36 ma le 37, o loo tuuina atu ai e Alema se fautuaga i lona atalii o Helamana. Ua aoao atu e Alema ia Helamana e uiga i mea uma, mai le tala ofoofogia o le liua o Alema (lea na aofia ai aso e tolu o le le malamalama ina ua uma ona ta‘u atu e se agelu ia te ia e le o ia faia tonu ni filifiliga sili o le olaga [tagai Alema 36:6–10]) i le matautia o faapotopotoga faalilolilo.
I le ogatotonu o le faitauga, sa i ai se fuaiupu o le itulau na tulagaese ia Ark: “E, ia e manatua, lo‘u atalii e, ma aoao le poto i lou talavou; ioe, aoao i lou talavou e tausi i poloaiga a le Atua” (Alema 37:35).
Na kiliki se mea i le mafaufau o Ark i na upu. “E mafai foi e o‘u matua ona aoaoina a’u i le poto,” o lana tala lea. I le taimi lava lea na ia iloaina ai sa ia te ia se tamaoaiga o faamatalaga i ona luma. “O lea ua ou amanaia tele lo la atamai. La te alolofa ia te a‘u ma e mafai ona fesoasoani ia te a’u e sauni mo lo‘u lumanai.”
Ma e sili atu le tele o lo la atamai nai lo fautuaga faapisinisi na faasoaina i le taimi o taaloga laupapa.
O Le Poto o Tina ma Tama
O se tasi o lesona taua na aoaoina ai Ark e ona matua o le le faatagaina lea o faatosinaga leaga o siomia o ia e faaleagaina o ia. “O iinei i la‘u aoga, e toatele tamaiti e mananao ou te faataitaia le kofe, lauti, sikaleti, ma isi mea faapena.”
O se autu masani lenei o talanoaga i le fale. “Sa tele ni a matou talanoaga ma ou matua e uiga i lenei mea. La te faia faafia,” o lana tala lea.
Ae, o na mea uma e tautu i ai ua tauia. O taimi taitasi e talosagaina ai o ia e faia se mea e faasaga i ona talitonuga, e maua e Ark le malosi mai mea na aoaoina ai o ia e ona matua.
O le isi lesona na ia teulotoina o le auala e fai ai ona laei. Leai, sa lei manaomia e Ark se fautuaga mai ona matua ina ia fetaui lelei ai i le aoga. O le mea moni, sa fai si tulagaese o ia i lena vaega. “Sa masani ona ou ofuina ofu manaia uma,” o le tala lea a Ark. “Sa ou taumafai e faafiafia teineiti.”
E ui i lea, sa fesoasoani ona matua ia te ia ia iloa, sa i ai foi nisi o taunuuga e lei faamoemoeina e laei ai faapena. “O ofu tatou te ofuina e mafai ona aafia ai le ala e mafaufau ai isi tagata ia te oe,” o le faamalamalama mai lea a Ark. A o ia gauai atu ma le toto‘a, sa iloa e Ark na te le fiafia i nisi o auala na foliga mai na mafaufau ai tagata ia te ia ina ua ia laei e pei ona sa ia faia muamua.
O lea la ua ia filifilia ni ofu e sili atu ona talafeagai, tauagafau—pe, e pei ona ia fiafia e valaau i ai, “sitaili le taulia”—lavalava. E fiafia o ia i lana vaaiga fou ma e lelei atu ona lagona faaleagaga e uiga i ona laei. (E le gata i lea, Ark, e lelei le au le taulia! Mea moni e le masalomia.)
Aoaoina i le Olaga Atoa
E fiafia Ark i le mea o loo nofo ai, e alofa o ia i lona aiga, ma e fiafia o ia e aoao mai ona matua.
E fiafia foi o ia e aoao le talalelei.
“Ou te talitonu o loo soifua Iesu Keriso,” o le tala lea a Ark. “Ou te talitonu o lo tatou perofeta soifua o Russell M. Nelson ma e ala mai ia Iosefa Samita, na toefuatai mai ai e Iesu Keriso Lana Ekalesia. Ou te talitonu e mafai ona fesoasoani le talalelei ia i tatou i o tatou olaga ma e ala i soo se faafitauli po o tofotofoga tatou te oo i ai.”
Po o a lava mea ofoofogia o le a aoaoina e Ark i le lumanai, ua uma ona ia aoaoina nisi o mea e sili ona taua i mea uma. O le latalata i le pito i luga o lena lisi o le: o le faaaluina o le taimi ma le aiga e faaopoopo ai le tele o mea faamanogi i le olaga!