E Mafai e Iesu Keriso …

Saunia e David A. Edwards

Mekasini a le Ekalesia

O upumoni na tusia i le faitau afe o tausaga ua mavae ua aoaoina ai oe i mea e mafai ona faia e le Alii mo oe i le aso.

O Iesu ma Peteru o loo savavali i luga o le vai

E leai se aso e uma ai le aoga o le upumoni mai le Atua. E afua ona o le malamalama, “i mea e pei ona i ai moni lava, ma e uiga i mea e pei o le a i ai moni lava” (Iakopo 4:13).

O upumoni na tusia i le faitau afe o tausaga ua mavae i le Feagaiga Tuai o loo moni pea i le taimi nei. Ma o nisi o i latou e fesoasoani ia te oe e vaai po o le a se mea e mafai ona faia e le Alii mo oe i aso nei. O ni nai upumoni nei mai tusi o le Faataoto, Failauga, ma Isaia (lea o le a e suesueina i lenei masina). Latou te faaali atu ia te oe e mafai e Iesu Keriso ona …

Faatonutonu Ou Ala

E i ai taimi, tatou te lagona uma ai le fenumiai, leiloa, po o le manaomia o le taitaiga. Afai e te tuuina atu i le Alii lou faatuatuaga atoa, lotomaualalo, ma le lotofaafetai, “o le a taitai e ia ou ala” (tagai Faataoto 3:5–6).

Afai e te tausia Ana poloaiga, Na te “taitai oe i le ala e tatau ona e alu ai” ma faia “lou manuia … pei o se vaitafe” (Isaia 48:17–18).

Avatu ia te Oe se Vaaiga Mamao

O uiga faaalia ma iuga o le olaga i le lalolagi e foliga mai e manaia pe faafiafiaina. Ae o aoaoga a Iesu Keriso e mafai ona fesoasoani ia te oe e iloa ai le gaogao ma le sola ese o ala o le lalolagi.

O mea uma “ua faia i lalo o le la … o mea faatauvaa uma lava ia ma le ’ai i le matagi” (Failauga 1:14). I se isi faaupuga, o le ala a le lalolagi e aumaia ai le le fiafia. E pei o le tuliloaina o le matagi ma taumafai e sapo. E oo mai le fiafia pe a tatou avatu le faaaloalo ma le migao i le Atua ma tausi Ana poloaiga (tagai Failauga 12:13).

E toatele tagata o le lalolagi ua “fai mai, ua lelei le mea leaga, ae leaga le mea lelei; … o e fai ma malamalama le pouliuli, a e fai foi ma pouliuli le malamalama; … o e fai mea suamalie ma le mea oona, a e fai ma mea oona le mea suamalie” (Isaia 5:20). Ae ua faaali mai e le Alii ia i tatou le upumoni. E ala i le mulimuli i Lana ala ma Lana afioga, e mafai ai ona tatou “o atu ma le olioli, ma taitaiina atu i le filemu” (tagai Isaia 55:8–12).

(Tagai foi Isaia 40:6–8; 51:7–8.)

Faamagalo Au Agasala

O tatou uma lava e faia ni mea sese. O tatou uma e agasala. Ae afai tatou te salamo ma taumafai pea e tausi poloaiga a le Atua, e mafai e Iesu Keriso ona faamamaina ma toe faaatoatoaina i tatou. “Ona alofa mai lea o ia ia te [i tatou]; … aua na te matua faamagaloina” (Isaia 55:7). Na Ia fetalai:

“E ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” (Isaia 1:18).

“O a‘u, o a’u lava lē soloiesea au solitulafono … o au agasala foi ou te le toe manatua ia” (Isaia 43:25).

Faamalosia Oe

Tatou te lagona uma lava le vaivai po o le lelava i nisi taimi. E mafai e Iesu Keriso ona avatu ia te oe le malosi. “O le Alii o Ieova o le malosi e faavavau ia” (Isaia 26:4). Afai e te lotomaualalo ma faalagolago ia te Ia, e mafai ona Ia fesoasoani ia te oe e tetee atu i faaosoosoga, faia ni faaiuga faigata, pe tau lava o le faaauau pea e ui i faigata. Na Ia fetalai:

“Aua e te fefe: aua ou te ia te oe: aua le fetepatepai; aua o au o lou Atua: ou te faamalosia oe; e moni ou te fesoasoani ia te oe” (Isaia 41:10).

Aua Lava Nei Galo Oe

Na ositaulagaina e le Faaola o Iesu Keriso o Ia lava mo oe ona e alofa o Ia i lo tatou Tama Faalelagi—ma ona e alofa o Ia ia te oe. O Lana taulaga ua mafai ai ona e toetu ma maua se avanoa e avea ai e faapei o le Tama Faalelagi. O le a Ia le tuulafoaia lava oe pe faagalo oe. Na Ia fetalai:

“E galo ea i le fafine lana tama ua susu … ? ai lava e galo ia te i latou, a e le galo lava oe ia te au.

“Faauta, ua ou taia lou faatusa i ou alofilima” (Isaia 49:15-16).

Talu ai e tele mea ua Ia faia mo i tatou ma o le a le galo lava ia te Ia i tatou, o i tatou foi, e tatau ona taumafai ia “manatua pea o Ia” (Mataupu Faavae ma Feagaiga 20:77, 79).