“O Ki e Fa a Nifae mo le Malamalama ia Isaia,” Mo le Malosi o le Autalavou, Sete. 2022.
Sau, Mulimuli Mai ia te A’u
Isaia
O Ki e Fa a Nifae mo le Malamalama ia Isaia
O i ai se faafitauli i le faitauina o le Isaia? O loo iai Nifae ii e fesoasoani!
Ata na tusia e Kevin Keele
E manino lava o tusitusiga a le perofeta o Isaia i le Feagaiga Tuai e taua aua e tele ina ta‘ua soo i le Feagaiga Fou ma le Tusi a Mamona. Na fetalai le Alii, “Ua silisili lava upu a Isaia”: (3 Nifae 23:1).
Ae, aisea e tatau ai ona latou matua faigata ona malamalama i ai?
Ia aua nei e lotovaivai! Na iloa e Nifae la matou tauiviga. Sa ia ioeina “e tele mea na tautala i ai Isaia e faigata … ona malamalama i ai” (2 Nifae 25:1). O le mea e faafetai ai, ua tuuina mai e Nifae ia i tatou ki e fa e mafai ona fesoasoani ia i tatou e tatala ai le uiga o upu a Isaia.
Ki Muamua: Ola i Aso amuli
Na tusia e Nifae o i latou o e ola i “aso e gata ai” o le a mafai ona “malamalama” i upu a Isaia (2 Nifae 25:8). Atonu ona o tagata i aso e gata ai o le a i ai se vaaiga e lei maua e tagata i ona po o Isaia. I aso la ua leva, atonu e lei malamalama tagata i le ala e mafai ai e tagata ona “ta‘ua le leaga o le lelei, ma le lelei o le leaga” (Isaia 5:20) ae tatou te vaaia lava o loo tupu lenei mea i o tatou autafa.
Ma le isi, atonu e le malamalama tagata i le taimi ua tuanai i le uiga o le fetalaiga a le Alii ina ua Ia fetalai, “O le a ou faia se galuega ofoofogia i totonu o lenei nuu, o se galuega ofoofogia lava ma le maoae” (Isaia 29:14).
Ua ta‘u mai e perofeta o aso nei ia i tatou lenei “galuega ofoofogia ma le maoae” e faasino i le oo mai o le Tusi a Mamona ma le Toefuataiga faifai pea o le talalelei a Iesu Keriso. Ua faamanuiaina oe e ola i se taimi e mafai ai ona e molimauina le faataunuuina o le tele o valoaga a Isaia.
Ki Lona Lua: Ia maua le Agaga o Valoaga
Na aoao mai e Nifae e faapea o upu a Isaia “e manino ia te i latou uma o e ua tumu i le agaga o valoaga” (2 Nifae 25:4). Atonu e foliga taufaafefe lena mea i le taimi muamua, ae e le faapea ai ua na o perofeta e mafai ona malamalama ia Isaia. Ma le isi, ua aoao mai tusitusiga paia e faapea “o le agaga o le valoaga o le molimau lea ia Iesu” (Faaaliga 19:10). I se isi faaupuga, afai e te talitonu ia Iesu Keriso, ua uma ona e maua le amataga o le mea e tatau ona e malamalama ai ia Isaia!
O tusitusiga a Isaia e molimau ia Iesu Keriso ma Lana Togiola. E oo lava i lona igoa o loo molimau mai e uiga i le Faaola! O le uiga o le igoa o Isaia “o le Alii o le Faaolataga,” po o le “faaolaina e Iesu.”
Ki Lona Tolu: Malamalama i Solo ma Faatusa
Na faamalamalama mai e Nifae e faapea o upu a Isaia e faigata mo i latou e le masani ai “i le ala o valoaga i totonu o tagata Iutaia” (2 Nifae 25:1). E faigofie atu ona malamalama i upu a Isaia a o tatou aoao atili e uiga i tu ma aga masani o tusitusiga i Sasae i aso o Isaia, e pei o solo ma faatusa. E tele ina faaaoga e Isaia ia faailoga faigata i ana tusitusiga.
Mo se faataitaiga, na tusia e Isaia e uiga ia i latou o e “maualuluga ma faafefeteina” e pei o “alofilima o Lepanona” ma le “aluna o Vasana [Suria]” (2 Nifae 12:13). O Arasi ma aluna o laau laupapa. Sa faaaoga e Isaia se auala faatusisolo e fai atu ai o tagata faamaualuga ma le maualuga e pei o ni laau uumi aua ua latou faamaaaina o latou loto ma mafaufau ua sili atu i latou nai lo isi. O le faitauina o le Isaia e pei o solo e mafai ona fesoasoani tatou te malamalama atili ai i mea sa ia aoao mai.
Ki Lona Fa: Iloa le Faataatiaga Faafaafanua
Ua faaigoa e Isaia nofoaga eseese e 108 i ana tusitusiga. E mafai ona fai si fenumiai o lenei mea e tulitatao ai, aemaise lava pe afai e te lei nofo ai lava iina! O le ki lona fa a Nifae o le iloa lea o “itulagi faataamilo ai” Ierusalema (2 Nifae 25:6).
O Ierusalema o loo i ai i le nofoaga lava e tasi sa i ai lava, ae o aso anamua sa i ai i le totonugalemu o mana faatautava e tolu o le lalolagi. I sasae o Papelonia, o se totonugalemu o faatufugaga ma sitaili. I le itu i matu o Asuria, o le mana o le militeli i ona po o Isaia. I sautesisifo o Aikupito, o se nofoaga autu o fefaatauaiga. O le iloaina o nei mea e tele e mafai ona fesoasoani ia i tatou e siaki ai po o ai na taufaamatau e osofaia Isaraelu ma ave faatagataotaua. I se tulaga faafaatusa, o Papelonia ua faatusa i le faalelalolagi, o le faamaualuga o Asuria, ma le tamaoaiga o Aikupito.
O Upu a Isaia e mo Oe
Sa aoao mai e Isaia le tele o isi mea e taua mo i tatou ia malamalama ai. Sa ia molimau atu e uiga i le faataapeapeina ma le faapotopotoina o Isaraelu, lea na saunoa i ai Peresitene Russell M. Nelson “o le mea aupito sili lea ona taua o loo tupu i le lalolagi i aso nei. … Ma afai e te filifili e, afai e te manao i ai, e mafai ona avea oe ma se vaega tele o lena mea” (“Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], 8, HopeofIsrael.ChurchofJesusChrist.org; tagai Isaia 49:13–23).
Sa molimau mai foi Isaia e uiga i le fausiaina o Siona e sauniuni ai mo le Afio Mai Faalua o le Faaola ma le nofotupu i le meleniuma (tagai, mo se faataitaiga, Isaia 51–52). Faatasi ai ma se molimau ia Iesu Keriso, e mafai e le Agaga ona molimau atu ia te oe i le taua o upu a Isaia ma le ala e mafai ai ona latou fesoasoani ma faamanuia lou olaga i le taimi nei.