“Aoao ia Iesu Keriso ma Maua Lona Mana,” Mo le Malosi o le Autalavou, Sete. 2022.
Upu Faaiu
Aoao ia Iesu Keriso ma Maua Lona Mana
O le asō, ou te fia talanoa atu ai e uiga i le auala e mafai ona tatou maua ai i o tatou olaga le mana o lo tatou Alii ma le Matai, o Iesu Keriso.
Tatou te amata i le aoao e uiga ia te Ia.1 “E lē mafai lava ona faaolaina[i tatou] i le lē iloa” (Mataupu Faavae ma Feagaiga 131:6). “O le faateleina o lo tatou iloa e uiga i le galuega ma le misiona—o le faateleina lea o lo tatou malamalama i Lana aoaoga faavae ma le mea na Ia faia mo i tatou—o le faateleina foi lena o lo tatou iloaina e mafai ona Ia auina mai le mana lea tatou te manaomiaina mo o tatou olaga.
I le avea ai ma tagata o le Au Paia o Aso e Gata Ai, tatou te faasino atu i Lana misiona o le Togiola a Iesu Keriso, lea ua mafai ai ona avea le toetutu o se mea moni mo tagata uma ma ua mafai ai ona maua le ola e faavavau e i latou o e salamo i a latou agasala ma taliaina ma tausia ia sauniga ma feagaiga taua.
I lalo o le fuafuaga sili o le faavavau a le Tama, o le Faaola na puapuagatia. O le Faaola na motusiaina noataga o le oti. O le Faaola na totogia le tau mo a tatou agasala ma solitulafono ma tafiesea ai e tusa ma tuutuuga o lo tatou salamo. O le Faaola na te laveai i tatou mai le oti faaletino ma le faaleagaga.
O faaupuga paia e pei o le Togiola ma le Toetu ua faamatala ai le mea na faia e le Faaola, e tusa ma le fuafuaga a le Tama, ina ia mafai ai ona tatou ola i le faamoemoe i lenei olaga ma maua le ola e faavavau i le lalolagi a sau.