“Aapa Atu ma Vaavaai mo le Lelei,” Mo le Malosi o le Autalavou, Sete. 2022.
Fesoasoani o le Olaga
Aapa Atu ma Vaavaai mo le Lelei
E eseese uma lava i tatou, o i tatou uma o fanau a le Atua, ma e matagofie lena mea!
Atapue mai le Getty Images
Vaai faalemafaufau i le ola ai i se lalolagi lea sa valiina ai ata vali uma i le na o le lanumoana, e tutusa tofo o meaai uma, ma o pese uma e nao le tasi le nota. Ou te le iloa ia te oe, ae ou te manatu o le a matuai le manaia lava!
O eseesega i faatufugaga, tofo, ma musika e atili ai ona manaia ma matagofie le lalolagi. I le ala lava lea e tasi, e i ai i tagata ni talaaga iloga, talitonuga, foliga, tagatanuu, ituaiga, ma aafiaga ia e matagofie ai le lalolagi.
Mai lava i lo‘u laitiiti, sa ou nofo i Arapi, o se vaega tele faaIsalama o le lalolagi, mo le tele o tausaga. Mo se vaega o lena taimi, sa ou auai ai i le aoga nofotumau i Egelani. I nofoaga uma e lua, o Arapi ma Egelani, sa ou feiloai ai ma le tele o tagata eseese. I le taimi muamua e mafai ona faigata le i ai faatasi ma ni tagata eseese e le pei o au lava ia. Ae mulimuli ane, sa ou aoaoina e ala i aafiaga o le tele o eseesega e lelei, e matuai matagofie lava! Ua faatamaoaigaina lo‘u olaga e le mafuatiaina e ala i le fegalegaleai ma tagata o aganuu ma talitonuga eseese i le tele o vaega o le lalolagi.
O nisi nei o mea ua ou aoaoina e mafai ona fesoasoani ia te oe e faaaloalo ma malamalama ai ia i latou e ese mai ia te oe.
Saili le Lelei
O nisi taimi o le lelei i tagata atonu e le vave iloa, ae e ofoofogia le auala tatou te maua ai le lelei pe a tatou vaavaai atu i ai ma le alofa ma le agaalofa. A o e faia, o le a tatalaina lou loto i le aoaoina mai isi.
E aoga le manatua atonu e galulue tagata i ni auala e te le malamalama ai ona sa latou tiga. E toetoe lava o tagata uma e lagona le vaivai pe o loo tauivi ma se mea. Atonu e faapena foi ou lagona. A e malamalama i lenei mea, e mafai ona faigofie atu ona maua le lelei i isi ona e mafai ona e malamalama atili pe aisea ua faapea ai tagata. Ona mafai lea ona e maua auala e fesoasoani ma faamanuia ai i latou.
Faalogo Ma le Mataalia
O le ala i le faaaloalo ma le malamalama e amata pe a tatou faalogo—matuai faalogo—i isi. I le avea ai ma tagata O Le Ekalesia a Iesu Keriso o le Au Paia o Aso e Gata Ai, e tele lava ina vave ona tatou faasoa atu le talalelei, ma o se mea lelei lena! O le mea moni lava, o le talalelei a Iesu Keriso o le meaalofa aupito sili lea ona mamalu ma faavavau e mafai ona tatou faasoa atu. Ae o nisi taimi tatou te faasoa atu ai o tatou talitonuga i isi ae tatou te lei malamalama i se mea e uiga ia i latou. E manaomia ona tatou faalogo atu ma le mataalia i isi ma aoao mai ia i latou. E mafai ona faateleina lo tatou malamalama i le—ma le talisapaia o—tagata uma tatou te feiloai i ai.
Saili mo Tulaga Tutusa
I se asiasiga talu ai nei i le Vanu o Arapi, sa ou feiloai ai i le toatele o tagata e matua ese lava mai ia te a’u. Ae ina ua ou iloaina i latou, sa ou iloa ai o o tatou talitonuga autu e le eseese tele. Sa musuia au e ala mai i mea matou te tutusa ai.
O se tasi o mea na ou iloa matou te faasoa atu o se manao e fesoasoani i tagata sulufai o e ua faaaunuua ma tiga i feteenaiga. O le iloaina o le tutusa sa maoae tele. Sa ou olioli i lenei mea ma lagonaina le alofa tele mo tagata sa ou feiloai i ai.
Ina ua matou maua ni tulaga tutusa, sa mafai loa ona matou talanoa e uiga i o matou eseesega, faapea foi ma o matou tulaga faatauaina fefaasoaai, faatasi ai ma se fiafia moni e aoao e uiga i le tasi ma le isi. O lenei aafiaga na faamanatu mai ai ia te au o tagata lelei i soo se mea o loo taumafai e faia mea lelei e tusa ai ma o latou talitonuga.
Ia Mataala
O se auala sili e fegalegaleai ai ma isi o le matau lea ma saili se auala e amata ai se talanoaga. Mo se faataitaiga, afai e te matauina se tasi o i ai se uila maoae, fai i ai, “Oka, ou te fiafia i lau uila!” ona fesili atu lea ia i latou e uiga i ai.
O se fesili faigofie e pei o le “O a mai lou aso?” e mafai ona fesoasoani ia te oe e fesootai ai ma se tasi. Atonu e te lagona le le toafimalie i le taimi muamua. E manaomia ai le faataitai, ae e malie i le taimi lava e te maua ai ni aafiaga lelei.
Vaai i Fafo Atu o Oe Lava
Sa feiloai le Faaola i le toatele o tagata mai isi aganuu. Sa ia aapa atu foi ia i latou o e na aloese mai ai isi tagata uma. Sa alu ese atu o Ia mai Lona ala e fetaiai ma e mama‘i ma e ua faate’aeseina. Sa talanoa o Ia ma i latou, ma sa Ia faamaloloina i latou.
Afai tatou te uia Lana auala le manatu faapito, o le a avea le lalolagi ma se nofoaga e sili atu ona lelei. Fesoasoani i isi i ni auala tetele pe laiti. Auina atu se feau tusitusia agalelei, faasoa atu se meaai mama, e aofia ai se tasi ua tuua e isi. O galuega agalelei faapenei o le a fesoasoani ia te oe e fesootai ai ma i latou o siomia oe. O le mea e ofo ai, o nei faatinoga tatou te maua ai foi se lagona lelei.
Aua Ne’i e Misia
O le poloaiga sili lona lua o le “alofa atu i le lua te tuaoi ia pei o oe lava ia te oe” (Mataio 22:39). Ia manatua o i latou o fanau a le Atua. E faateleina lo‘u vaaiga i le lalolagi ma ou lelei atili ai pe a ou feiloai atu i isi—o o’u tuaoi—o e e ese mai ia te a‘u. Aua le misia mea e mafai ona e aoao mai i isi.
Afai e te aapa atu ma aoao e alofa ma faaaloalo i eseesega o tagata uma o siomiaina oe, o le a e ofo i le susulu ma le matagofie e mafai ona i ai le lalolagi.