“Semati,” Me iSakisaki ni iTabagone, Maji 2023.
Semati
Rikuto I.,
16, Japani
iTaba mai vei Sayaka Okubo
Na yacaqu o Rikuto, ka’u tiko mai Matsudo City, Japani.
Ena dua na itaviqaravi ni lotu vakamatavuvale, au a vakayagataka na app ni Vunikau ni Matavuvale me’u vulica se o cei o ira na noqu qase e liu ka a vakaevei tu na ituvaki ni nodra bula. Au kurabui ni’u kila ni dua vei ira na noqu qase e liu e a sotia ka dau yadrava tu e dua na tui mai Japani ka a bula ena dua na gauna balavu sa oti.
Au taleitaka na qito soka, ia baleta ni’u lewe ni Lotu i Jisu Karisito ni Yalododonu Edaidai, au sega ni dau via qito e na Sigatabu. A dredre vei au me’u tukuna vei noqu dauveivakatavulici ni’u na sega ni rawa ni vakatovotovo e na Sigatabu, ia ni’u vakamacalataka ni‘u dau lako i lotu, e a vakatara me’u lewe tiko ga ni timi.
Vakatekivu mai na noqu dau calata na vakatovotovo e na Sigatabu, e ra sega ni dau nuitaka na noqu lewe ni timi na noqu ivakatagedegede ni kila ni qito. Au a masulaka me’u dau vakanamata ka qito vakavinaka e na gauna ni vakatovotovo, ni sega soti ni levu na gauna ni noqu vakatovotovo me vakataki ira na vo ni timi. Ni sa yaco mai na iotioti ni sotasota, au a sureti me’u vakaitavi e na qito. Au kila ni a vukei au na Kalou me’u rawata na lalawa o ya.