“E Kila tu na iVakabula na Sala me Vukei Au kina e na mate na Kenisa,” Me iSakisaki ni iTabagone, Maji. 2023.
Au Sa Rawata na ka Kecega e na vuku i Karisito
E ra wasea na itabagone na sala sa vakaqaqacotaki ira kina na Karisito me ra vakayacora na veika dredre (raica na Filipai 4:13).
E Kila tu na iVakabula na Sala me Vukei Au Kina e na mate na Kenisa
A totoka tu na noqu bula me yacova na vulaibatabata ni 2020. Au a tauvimate ka nanuma ni oqo e dua ga na matetaka, ka‘u gunuva e vica vata na wainimate vakaturi mai vei vuniwai. E muri, au sa tekivu vakila na mosi ni ulu, oca, ka malumalumu. Ni oti ga vakalailai au yadra cake mai e na 10 e na bogi ka‘u nanuma ni sa mataka lailai ka‘u sa tekivu vakavakarau sara me‘u gole ki vuli.
Ni tukuna vei au o ganequ ni se bogi tikoga, au a cici ki na nodrau rumu na noqu itubutubu e na loma taqaya. A tara o tinaqu na uluqu, ka vakila ni sa tubu sara tu ga icake na noqu katakata. Keirau a gole vei vuniwai e na siga ka tarava, ka vakayacora sara o koya e so na vakadidike.
E na bogi oya rau a curu mai ki na noqu rumu na noqu itubutubu ena tagi. E rau tukuna vei au ni‘u sa tauvi kenisa ni dra ka me keitou gole ki valenibula me lai rogoci tale mai kina e so na isaunitaro. Au a tiko e na rumu ni leqa tubukoso e na bogi taucoko ka tekivu caka vei au na iwalewale ni veiqaravi ka yacana na kemocerapi e na vica ga na siga ka tarava.
Na veiqaravi vaka oqo e na tomani tiko me dua se rua tale na yabaki, ia sa yaco me‘u mamada mai vakalailai. Au vakila wale tokaga oqo niu sa vinaka cake mai ka nuitaka niu na rawa ni gole totolo tale ki vuli. Ia, e sega ni rawarawa. Na kemocerapi e levu tu na kena revurevu, ka oka kina e dua na mate ni sui ka dau dredre kina vei au me’u taubale.
E dina ga ni vakakina—ka rairai e na vuku ni ka oqo—au sa toro vakavoleka sara kina vua na Tamaqu Vakalomalagi. Ia oqo sa titobu sara na noqu kila vinaka na Veisorovaki i Jisu Karisito. Au dau nanuma tu ni Nona Veisorovaki e dua na ka o gadreva ga e na gauna o caka cala kina. Oqori e dua ga na tikina, ia na vakararavi vua na iVakabula e dua talega na ka sa vukei au me’u kakua ni vakila na galili.
Sa colata o Jisu Karisito na noda rarawa kei na ivalavala ca kecega, ka kena ibalebale ni kila vakavinaka sara tu ga o Koya na sala me vukei au kina me’u lako curuma kina na kenisa ni dra. Na lako curumi ni veivakatovolei cava ga e na rawa ni veivakatikitikitaki sara, ia e na Veisorovaki i Karisito, sa rawa me da vakacegu ni da kila ni kila vakaidina o Koya na veika e da sotava tiko.
Andrew F., Utah, Amerika