“Na Vakacegu me Sotavi Kina na Cava ni Bula,” Me iSakisaki ni iTabagone , Maji. 2023.

Na Vakacegu me Sotavi Kina na Cava ni Bula

Dua na iTukutuku mai vei Elder Dieter F. Uchtdorf

Mai na Kuoramu ni iApositolo Le Tinikarua

iVakatakilakila

Dieter F. Uchtdorf

Na Turaga o Jisu Karisito e kaya vei iko e na gauna ni cava e na nomu bula: “ Mo cegu, mo maravu mai.”

Elder Uchtdorf kei ira na itabagone e na kacivaki ni BYU–Pathway Worldwide e na 7 ni Feperueri, 2017.

Ni oti e dua na siga taucoko ni veivakavulici e matasawa, a vakatura na Turaga o Jisu Karisito vei iratou na Nona tisaipeli me ratou takoso ki na tai kadua ni Wasawasa o Kaleli. Ni oti na nodratou biubiu, a kunea o Jisu e dua na tikina e waqa me vakacegu ka moce kina.

Sega ni bera sa buto na lomalagi “a sa tubu e dua na cagi levu sara, a sa seva na waqa na biau, a sa qai luvu kina” (raica na Marika 4:37).

E vica vei iratou na tisaipeli i Jisu e ratou a dauqoli dina ka ratou kila na kena sokotaki e dua na waqa. Ia sa tubu na cava, ka sa tekivu me ratou taqaya. E a vovoleka sara me sa luvu na waqa.

E na gauna kece oqori, e a moce no ga ko Jisu.

E da sega ni kila na balavu ni nodratou sasaga bula voli na tisaipeli e na gauna ni cava, ia sa yaco me ratou sa sega tale ni rawa ni wawa. E ratou a vakayadrati Jisu ka tagicaka, “Vakavuvuli, ko sa wele beka ga ni da sa mate?” (Marika 4:38).

iVakatakilakila

waqa e wasawasa

Droini mai vei Adam Howling

Na Cava E So ni Bula

O keda taucoko e da dau sotava vakasauri na cava e so ni bula. O na rairai raica beka e so na leqa e veiyasai vuravura se na nomu vakai iko ka o vakila kina na lomaleqa, yalolailai, kei na yalorarawa. E na rawa ni kavoro na utomu e na vukumu se me baleta e dua o lomana. O na lomaleqa beka se rere ka vakila ni sa yali vakadua vei iko na vakanuinui.

E na veigauna vakaoqo, e rawa ni o tagi me vakataki iratou na tisaipeli i Jisu, “Vakavuvuli, ko sa wele beka ga Ni‘u sa mate?”

Ni’u a se yabaki vata kei kemuni, e dua na noqu serenilotu taleitaki sa ikoya na “Jisu Sa Laba na Cagi.”¹ Au rawa ni raitayaloyalotaki au e loma ni waqa ni “[sa] levu mai na ua!” E vakaoqo na tikina bibi ka totoka duadua e na sere ni lotu: “I cagi kaukauwa ka tu e dai: Ruru mai.” Sa qai yaco mai na itukutuku bibi: “Sega na cudru ni wai oqo se cagi tamata se tevoro sa cata ka rawa na waqa ga ni moce ko Koya ka Daulewa.”

Ni oti na nodratou kaci ni veivuke na Nona tisaipeli, ko Jisu a “tucake, ka vunauca na cagi, ka kaya ki na wasawasa, Mo cegu, mo maravu mai. A sa ruru na cagi, a sa maravu levu mai” (Marika 4:39).

Kevaka o na kidavaki Jisu Karisito, “Na Tui ni Sautu” (Aisea 9:6), ki na nomu waqa, e rawa ni o kunea na vakacegu e na loma ni cava codrocodroa ka veivakarerei ka liwa tiko e lomamu ka vakavolivoliti iko talega.

Na vosa vata ga a cavuta o Jisu ki na Wasawasa o Kaleli e na bogi ni cava e na dua na gauna balavu sa oti, e kaya vei iko e na gauna ni cava e na nomu bula: “Mo cegu, mo maravu mai.”

iVakatakilakila

waqa e na cava kei na maravu

Vakararavi ki na Nona Kaukauwa Veivakacegui

E rawa beka ni o raitayaloyalotaka na veika e ratou a vakila na tisaipeli e na gauna e ratou sa raica kina na cagi, na uca, kei na wasawasa ni talairawarawa ki na ivakaro ni nodratou iVakavuvuli? Na ka ga e ratou a rawa ni kaya sa ikoya, “O cei beka oqo, ni sa talairawarawa vua na cagi kei na wasawasa?” (Marika 4:41).

O Jisu Karisito e sega ni tautauvata tale kei na dua e sa bau bula oti e na vuravura oqo. O Koya a lako mai me mai vakabulai keda. E na Were o Kecisemani, a sauma kina o Koya na isau ni noda ivalavala ca kecega. A ciqoma ka vosota o Koya na noda mosi kei na rarawa kecega. Na rarawa levu ka tawayalani oqo a vakavuna Vua me bunotaki dra (raica na Luke 22:44; Vunau kei na Veiyalayalati 19:18).

Na ka a vakayacora na Turaga e na dela ni loloma uasivi e sega sara ga ni ceguva rawa na noqu vakasama. Ia au kila ni a vakayacora oya o Koya me baleti au, baleti iko, kei ira na tamata kecega e ra sa bula oti se e ra na qai bula. A solibula o Koya e na veika taucoko me rawa ni da ciqoma kina na veivakalougatataki taucoko e rawa.

E na sega vakadua ni dua me na vakila na veivakararawataki a sotava o Jisu, ia o iko kei au e na tiko na nodaru cagilaba butobuto ka mosimosi me lakocurumi. Kevaka mo vakararavi vua na Turaga, e na vakamaravutaka o Koya na nomu cava, ni sa sotavi ira kece o Koya. A vakararawataki e na yalo sega ni nanumi koya ga vakaikoya ena vukumu ka tu vua na kaukauwa me veivakaukauwataki, veivakayaloqaqataki, ka vakalougatataki iko.

O Koya e yalataka, “Au sa laiva vei kemudou na vakacegu, au sa solia vei kemudou na noqu vakacegu: au sa sega ni solia vei kemudou me vaka sa solia ko vuravura. Me kakua ni rarawa na yalomudou se rere.” (Joni 14:27).

Sala ki na Vakacegu

Sa solia vei iko na Turaga o Jisu Karisito na sala e so mo vakila kina na Nona vakacegu. A cavuta o Koya, “Mo vuli vei au, ka muria na noqu vosa; mo bula e na yalomalua ni Yaloqu, ko na rawata kina na noqu vakacegu” (Vunau kei na Veiyalayalati 19:23).

Vulica me baleti Koya e na nomu vulica na Nona bula kei na ivakavuvuli e na ivolanikalou. Mo laveta cake na yalomu e na masu. “Tudei … e na veivanua tabu,” oka kina na valetabu (Vunau kei na Veiyalayalati 87:8; raica talega na 45:32).

Rogoca na Nona vosa mai vei ira na parofita bula. Muria na veidusimaki ni Yalo Tabu. Vakayagataka na isolisoli vakalou ni veivutuni. Lako mai ki na Nona Lotu mo mai vakaveitokanitaki, vakavulici, ka vakani e na vosa vinaka ni Kalou.

Lako e na yalomalua ni Nona Yalotabu e na nomu cakava na nomu itikotiko me vanua e dau vakilai kina na Yalona. Vukei ira na tani ka qaravi Koya e na reki. Nanuma tiko, “E tiko na vakacegu e na caka dodonu.”² Saga mo yalodina tikoga ka yaco mo “tisaipeli [daumuri Karisito] e na vakarokoroko” (Moronai 7:3).

Kevaka o na vuli, vakarorogo, ka lako vata kei na Turaga, sa na qai yaco mai na Nona yalayala cecere: O na rawata na Nona vakacegu.

Na Vakabauta mo Vakacegu

E na vakabauta na Turaga o Jisu Karisito, sa rawa kina ni o “vakacegu” ni sa liwavi iko mai na cava ni bula. E na sega beka ni yaco vakatotolo sara na vakacegu me vaka vei iratou na tisaipeli e na Wasawasa o Kaleli, ia na Turaga e na vakaqaqacotaki iko mo lako curuma na cava e so o sotava.

Noqu itokani lomani, au vakadinadinataka ni bula tiko o Jisu Karisito.

E lomani iko o Koya.

O Koya e kilai iko.

E ciqomi iko o Koya.

E na sega ni laivi iko o Koya mo na sega ni vakacegui e na nomu gauna ni leqa.

Na vakacegu dina e lako mai ka vu duadua ga mai Vua. Na Nona vakacegu sa nodra o ira kece e ra na gole Vua.