“Vakarau mo Dua na Daukaulotu,” Me iSakisaki ni iTabagone, Maji. 2023.
Vakarau mo Dua na Daukaulotu
O na kila vakacava ni o sa vakarau tu mo lako i kaulotu?
Sa vakananuma vei keda o Peresitedi Russell M. Nelson na bibi ni cakacaka ni kaulotu ka sa vakayaloqaqataki ira na cauravou kei na goneyalewa me ra vakavakarau me ra veiqaravi.1 Na bula vakadaukaulotu tudei e gadrevi me cakacakataki, ka sa vakakina na noda yaco me da dua!
Na vakavakarau ki na kaulotu e rawa ni veivakadrukai e na so na gauna baleta ni vaka me levu tu na ka me caka:
“E gadrevi me’u maroroi ilavo.”
“E dodonu me’u vulica na Vunautaka na Noqu Kosipeli.”
“Au na vakasasaqa se savata vakacava na noqu isulu vakai au?”
“E dodonu me’u na lokuca vata kei noqu bisopi e dua na gauna.”
“Au sa lomadei beka me’u wasea na kosipeli?”
Na veivakasama kei na kauwai oqo e ka dina. Ia, e vinaka ga mo vakanamata ki na inaki levu cake ni nomu veiqaravi.
Nomu iNaki
E veivuke vakalevu mo tarogi iko e na: “Na cava na vuna au via lako kina i kaulotu kina?”
O na rairai nanuma beka ni sa nomu itavi vakakina. O na rairai marautaka beka mo bula e na dua na vanua vou se mo vulica e dua na vosa vou. De o vinakata beka mo wasea na nomu ivakadinadina me baleta na Veisorovaki i Jisu Karisito se na ivunau ni matavuvale tawamudu. Se o vakabauta, me vaka e tukuna o Peresitedi Nelson, ni “ tamata kece sara e dodonu me kila na kosipeli vakalesui mai i Jisu Karisito.”2
E so na vuni veiqaravi vakadaukaulotu e vinaka cake mai vei ira tale e so, ka tiko e levu na vuna vinaka me da lako kina. Na nomu inaki e dodonu me vakanamata ki na nomu lomana na Turaga kei na Nona kosipeli vakalesui mai. Vakasamataka na vuna o na vukei kina mo qarava na Turaga “e na yalomu taucoko, igu, vakasama kei na kaukauwa” (Vunau kei na Veiyalayalati 4:2). Kevaka e sega vei iko na gagadre, e rawa ni o masu vua na Tamada Vakalomalagi me vukei iko mo rawata kina.
Nomu iVakadinadina
“E tiko beka e dua na noqu ivakadinadina ni kosipeli vakalesui mai i Jisu Karisito? Ka’u vakabauta dina beka ni sa kacivi au o Koya me‘u veiqaravi?”
Sa inaki ni dua na kaulotu sa ikoya me sureti ira tale na so vei Karisito. Kevaka o sureti ira tiko na tamata me ra vulica na veika me baleti Jisu Karisito kei na Nona kosipeli, sa ka bibi me tiko na nomu ivakadinadina vakai iko.
E sega ni gadrevi me taucoko sara na nomu ivakadinadina; e na dau tiko ga na vanua me tarai cake kina. Na ka e bibi duadua sa ikoya na yavu: o Jisu Karisito. E na rawa ni o kilai Koya vakataki iko e na nomu vulica na Nona vosa e na ivolanikalou, masu vua na Tamada Vakalomalagi e na Yacana, ka saga mo bula me vakataki Koya.
Mo yaco mo dua na daukaulotu cecere e sega ni kena ibalebale mo kenadau e na vosa vei ira na tamata se me cavuqaqataki na ivolanikalou yadua (dina ga ni rawa ni o sasaga mo toroya cake na nomu kila-ka). Ni ko vakararavi vua na Turaga, vakabauti Koya, ka tuvakarau mo vakayacora na Nona cakacaka, e na vakalevuya o Koya na nomu sasaga ka vukei iko mo dua na daukaulotu mana.
Nomu Edaumeni ni Valetabu
“Au sa vakarau tu beka me’u gole ki na valetabu?”
Ni bera ni o lako i kaulotu, o na rawa ni ciqoma na nomu edaumeni e na valetabu kevaka o sa bera ni vakayacora vakakina.
Na veivakalougatataki ni valetabu e ra “sa ka bibi sara ka tikina dau guilecavi wasoma e na vakavakarau ki na kaci ni cakacaka.” Kei na “bula kilikili yadua sa ikoya na gagadre bibi duadua ni kena ciqomi na veivakalougatataki ni valetabu.”3 Ni ko sa vakavakarau ka bula kilikili mo lako ki na valetabu ka caka veiyalayalati tabu kei na Kalou, ko sa na vakarautaki iko talega mo dua na daukaulotu e na Vukuna (raica na Vunau kei na Veiyalayalati 105:33; 109:22).
E muri, e rawa ni o qai taura e dua na kalasi ni vakavakarau ki na valetabu. Ia e na gauna oqo, e rawa ni o cakava na nomu vuli vakai iko kei na vakavakarau. Sa vakatura o Peresitedi Nelson e so na ivolanikalou kei na ulutaga vakosipeli e so o rawa ni vulica me baleta na valetabu.4 E rawa talega ni o vulica e so tale na ka e na temples.ChurchofJesusChrist.org.
Kilikili ka Tu Vakarau
Vakadua tale, e vuqa tu na ivakarau ni vakavakarau ki na kaulotu. Io, e dodonu mo maroroi ilavo, maroroi iko vinaka tu vakayago, ka vulica na kila matau me vaka na botani isulu se vakasasaqa. E rawa tikoga ni tu vei iko na veilalawa oqori.
Ia kakua ni vakatara me rawai iko na kena matailalai. Na vakavakarau bibi duadua o rawa ni vakayacora sa ikoya na kena ka na rawa kina vei iko mo dua na liga ni cakacaka kilikili ka mana ni Turaga.
Kevaka o vakila ni o sega ni se vakarau vinaka, lomaocaoca, se o sega ni vakadeitaka ni o na rawa na veiqaravi, oqori e dau kena i vakarau ga. Nanuma tiko ni Turaga e vinakata mo qaqa! Ni ko vakararavi Vua ka muria na veidusimaki ni Yalotabu, e na vukei iko o Koya mo vakavakarau mo rawa ni daukaulotu vinaka.