“iVakavuvuli Raraba, Digidigi Vakatabakidua,” Me iSakisaki ni iTabagone, Maji 2023.
iVakavuvuli Raraba, Digidigi Vakatabakidua
O na vakayagataka vakacava na ivakavuvuli raraba e na veituvaki vakatabakidua e so e na nomu bula?
Droini mai vei Josh Talbot
Oqo e tolu na malanivosa mai na tolu na parofita duidui. Raica kevaka o rawa ni raica e dua na ulutaga e ratou veisemati kina:
“Mo dou yalomatua sara; a cava tale me’u kaya?”
“Me kena iotioti, sa sega ni rawa me’u tukuna vei kemuni na veika kece ko ni na rawa ni ivalavala ca kina.”
“Au vakavuvulitaka vei ira na ivakavuvuli dodonu, e ra qai liutaki ira ga.”
E vaka ni ra solia vei keda na parofita na ivakavuvuli ni kosipeli ni Turaga ka qai laiva vei keda me da bulataka. E ra sega ni solia vei keda na kena vakaimatailalai kece sara. Ia, me da ciqoma vakacava na nodra ivakavuvuli ka bulataka?
Me’u Na Bulataka Vakacava Na Nodra iVakavuvuli Na Parofita?
O ira na parofita e ra solia vei keda na ivakaro mai vua na Turaga. E ra vakavulica talega vei keda na ivakavuvuli kei na idusidusi e na vukei keda me da bulataka na dina tawamudu kei na ivakaro—me ivakaraitaki, e na idusidusi ni Me iSakisaki ni iTabagone.
Ia o ira na lewe ni Lotu i Jisu Karisito ni Yalododonu Edaidai e ra dau vakataroga e na so na gauna na veika matailalai—na veika vakatabakidua e dodonu me da vakayacora me da bulataka vakavinaka cake kina na ivakavuvuli ni kosipeli kei na ivakaro. Me ivakaraitaki, e ra na vakataroga beka na tamata se mataqali isulusulu cava e vakaraitaka na rokovi ni yagodra. Se e ra na vakataroga beka se cava sara mada e dodonu me ra vakayacora e na Siga ni Vakacecegu me ra vakatabuya kina.
E rawa ni vakayagataki na ivakavuvuli raraba e na veisala duidui e so mai vei ira na tamata duidui, ia e rawa ni da vakasaqara na veidusimaki ni Turaga ni da vakayacora na noda dui digidigi me rawa ni da toro voleka kina vua na Kalou.
E Dua na iVakarau Veivukei
O Peresitedi Russell M. Nelson a vakamacalataka e na dua na gauna na sala e dau vakayacora kina na digidigi me baleta na kena vakatabui na Siga ni Vakacecegu:
“Au vulica mai na ivolanikalou ni noqu cakacaka kei na itovo e na Siga ni Vakacecegu sa vakaraitaki ni veimaliwai e na keirau maliwa o au kei na Tamaqu Vakalomalagi. E na kila-ka oqori, au sa sega tale ni gadreva kina e dua na lisi ni veika me caka se me kakua ni caka. Ni gauna me’u vakatulewataka kina se vinaka se ca e dua na itavi e na Siga ni Vakacecegu, au tarogi au ga, ‘Na ivakatakilakila cava au vinakata me’u vakaraitaka vua na Kalou?’ Na taro o ya a vakamatatataka vakavinaka na noqu digidigi me baleta na Siga ni Vakacecegu” (Koniferedi raraba ni Epe. 2015 [Ensign se Liaona, Me 2015, 130]).
Na sala a torova kina o Peresitedi Nelson na taro vakatabakidua oqo e rawa ni vakaraitaka vei keda e dua na ivakarau raraba ni caka digidigi me baleta na ivakaro kei na idusidusi. Oqo e dua na sala o rawa ni vakadewataka kina:
E rawa ni o vakayagataka na ituvatuva oqo e na dua ga na ivakaro se idusidusi—na Vosa ni Vuku, na itukutuku raraba kei na veivakamarautaki, ivakatagi, savasava ni veiyacovi, kei na ikatini sara mada ga. E na e dua na gauna me na vakayacori, ia e yaga sara.
Ni o vulica na veika oqo, e rawa ni o wilika na veika e ra tukuna na ivolanikalou kei ira na parofita ni gauna oqo me baleti ira, vakasamataka vakatitobu, ka masu vua na Tamada Vakalomalagi. E na qai rawa ni vukei iko na Yalo Tabu ka vakauqeti iko mo vakayaco digidigi vinaka.
Vakacava na Nodra Digidigi na Tani?
Raica ni sega ni tukuna vei keda o Peresitedi Nelson na digidigi vakatabakidua cava a vakayacora me baleta na Siga ni Vakacecegu. A vakaraitaka vei keda o Koya na sala me da digidigi ga kina vakai keda. O na vakayacora beka e vuqa na digidigi me vata ga a vakayacora o koya. Ia na kena iusutu ga sa ikoya me da toro voleka yani vua na Tamada Vakalomalagi kei Jisu Karisito e na noda digidigi.
Kevaka o raica e dua tale e na Lotu ka sega ni cakava vakadodonu tiko na veika taucoko o vakayacori voli, mo kakua ni leqataka na nodra vakadodonutaki. Me vaka a kaya o Reyna I. Aburto, na iKarua ni Daunivakasala e liu e na Mataveiliutaki Raraba ni iSoqosoqo ni Veivukei, e na dua na gauna e liu, “Me da muria na salatu ni iVakabula ka me da yalololoma vakalevu cake, vakaotia na noda dauvakalelewa, ka kakua ni vakadikeva na nodra bula vakayalo eso.” (Koniferedi raraba ni Okot. 2019 [Ensign se Liaona, Nove. 2019, 58]).
Sa rawa mo ciqoma na ivakavuvuli dodonu e ra vakavulica na parofita. E rawa ni o dusimaki ira na tani vua na iVakabula, Nona loloma, Nona yalololoma, kei na Nona ivakaro. Sa rawa mo wilika na idusidusi ni Me iSakisaki ni iTabagone. E rawa ni o tovolea mo bulataka e dua na bula yalodina vakatisaipeli i Jisu Karisito, mo ivakaraitaki vinaka, ka wasea na veika vakayalo o sotava.
Kevaka o vakanamata e na lomana na Kalou ka lomani ira na tani, o na dusimaki mo vakayaco digidigi ka na vukei iko kei ira tale e so mo ni marau.