“Na Sala e Dau Qaravi Ira kina na Marama na iVakabula,” Me iSakisaki ni iTabagone, Maji 2023.
Na Sala e dau Qaravi ira kina na Marama na iVakabula
E rawa ni da muria na ivakaraitaki nei Jisu Karisito e na noda vakaraitaka na yalovinaka kei na veidokai vei ira na marama e na noda bula.
Droini mai vei Rose Datoc Dall
E na Veiyalayalati Vou, e dau vakatavulica wasoma kina o Jisu Karisito na veika sega ni dau namaki. (Me vaka oqo: e dodonu me da lomani ira na keda meca ka masulaki ira e ra vakacacani keda?1)
E so vei ira na ivakavuvuli oqo e veisaqasaqa kei na itovo ni gauna oya. Ia a sega ni tovolea tiko na iVakabula me okati vata kei ira. A saga tiko o koya me vakavulica e dua na lawa cecere ka vakaraitaka vei keda na sala me da veiqaravi kina vakaikeda. E a biuta tiko e dua na ivakaraitaki ni loloma ka sega ni yalani ki na dua na yabaki ni bula, tagane se yalewa, se vanua.
E na gauna i Jisu, e ra dau raici vakararaba na marama ni ra lolovira. E na so na itovo vakavanua nikua, e ra sega ni dau rokovi wasoma na marama. E rairai o vakaitikotiko beka e na dua na vanua vaka oya. Ke vakakina, sa rawa mo ivakaraitaki vakarisito e na nomu itikotiko e na nomu dau yalovinaka ka veidokai vei ira na tamata kecega—oka kina o ira na goneyalewa kei na marama e na nomu bula.
A Kauwaitaki Tinana o Jisu
Na imatai ni cakamana i Jisu Karisito e a veivuke kina vei tinana. A itavi nei tinana me veivuke e na nodra vakani o ira na tamata e na dua na vakamau. Ni sa oti na gunu, a vukica o Jisu na wai me waini me rauti ira na vulagi sureti.
Na vosa nei Jisu vei tinana e na veivosaki o ya e na voravora beka ki na daligada nikua: “Yalewa, a cava vei iko kei au?” (Joni 2:4). Ia o Josefa Simici a vakamatatataka ni a tarogi tinana tiko o Jisu e na ka e gadreva: “Yalewa, a cava ko ni sa vinakata me‘u cakava e na vukumu?”2. Na nona kacivi e dua e na “yalewa” e na gauna oya e i vakaraitaki ni veidokai. E a tukuna tiko o koya, “Noqu marama, se cava ga o kerea vei au e na vakabauta, au na solia vei iko.”3
Toso ki liu e na tolu na yabaki. Ni se bera mada ga ni mate o Koya e na kauveilatai, e dua na iotioti ni ka a cakava o Jisu o ya me vakadeitaka ni o tinana e na maroroi.
“A kaya vei tinana, Yalewa, raica na luvemu! Sa qai kaya vua na tisaipeli, Raici tinamu! Ia mai na tiki ni siga ko ya sa kauti koya na tisaipeli ko ya ki nona vale” (Joni 19:26-27).
O Jisu e Dau Veiqaravi e na Veidokai Vei Ira na Marama e ra Biligi Tani Tu
E tiko e rua na ivakaraitaki ni iVakabula e na nona qaravi ira e na veidokai na marama ka ra biligi tani tu mai vei ira na tamata.
E na gauna ni iVakabula, e vuqa vei ira na Jiu e ra raici ira sobu na kai Samaria. Ia ni sotava o Jisu Karisito e dua na marama ni Samaria e na dua na ikeli-wai, a raici koya e na yalololoma kei na veidokai. Sega wale oya, e na gauna e rau a veivosaki tiko kina e a vakaraitaki Koya e na imatai ni gauna ni sa iKoya na iVakabula yalataki!4 (Raica na Joni 4.)
E na dua tale na ituvaki, a rawai e dua na marama e na dua na ivalavala ca bibi. E na lawa vaka-Jiu, e dodonu me na vakaviriki me mate. Ni ra kauta mai na iliuliu na marama oqo vua na iVakabula, a tarogi ira o Koya e na dua na taro ka vakavuna me ra tu vakadua ka vakasama. E ra a sega ni vakaviriki koya. Sa qai sureti koya na marama oya na iVakabula me veivutuni, ka kaya, “Mo lako, ka mo kakua ni valavala ca tale” (Joni 8:11).
A Rairai vei ira na Marama o Jisu ni oti na Nona Tucaketale
Ni sa tucaketale o Jisu, a rairai taumada vei Meri Makitala, ka a tagi tiko e na Nona ibulubulu (raica na Joni 20:11–18). E so tale na marama—o Joana, ka vakakina o Meri na tinai Jemesa—e ratou a maliwai ira na imatai me kila ni Turaga sa vakaturi cake tale. E ra sureti mai vei ira na agilosi me ra wasea na nodra ivakadinadina e na veika e ra sa raica. (Raica na Luke 24:1–10.)
E Rawa ni da Muria na Nona iVakaraitaki
Na cava e rawa ni da vakayacora me da muria kina na ivakaraitaki ni veidokai ni iVakabula vei ira na marama?
Na noda parofita, o Peresitedi Russell M. Nelson, e dau vakatovotovotaka vakalevu na veika oqo. A susuga cake o koya vata kei na watina o Dantzel e ciwa na luvena yalewa kei na dua na luvena tagane. Ni oti na nona mate o watina, a vakamautaki Wendy Nelson.
“Me da dokai ira na marama—sega walega e na noda matavuvale voleka ia o ira kece sara na marama taleitaki e na noda bula,” a vakavulica o koya.5
Me da cakava na vula oqo me vula ni loloma qaqa Vakarisito kei na yalovinaka ve ira na marama e na noda bula. E tiko vei iko na kaukauwa mo veisautaka kina na vuravura, dua na veimaliwai e na dua na gauna!