“Jisu Karisito: Vakacegu e na Maliwa ni Cava,” Me iSakisaki ni iTabagone, Maji 2023.
Lako mai, Mo Muri Au
Jisu Karisito: Vakacegu e na Maliwa ni Cava
E na so na siga, o na vakila beka ni o biliraki voli e na cava ni bula. Ia o Jisu Karisito e tu vua na kaukauwa me kauta mai vei iko na vakacegu o na sega ni kunea rawa tale e na dua na vanua.
Mo Cegu, Mo Maravu, mai vei Yong Sung Kim
Ni’u yacova na veimama ni gauna ni noqu vuli e na koronivuli torocake, au a ciqoma e dua na ka ni veivakidacalataki levu. E rau a kacivi na noqu itubutubu me rau vakatulewa e na tabana ni kaulotu na Uruguay Montevideo Mission, ka kena ibalebale ni rau na toki tiko ki na dua tale na mua ivuravura kei iratou na taciqu gone e va. Au sa lomaocaocataka tu mada ga na noqu na rawata na vuli torocake, ia oqo au sa na vuli duadua tiko mai e na koliji, ka ratou na tiko tani mai na dua tale na vanua na noqu matavuvale. Au a taqaya dina.
Na noqu toso mai na vuli torocake ki na koliji e a dredre vakalevu sara vei au. Dina ga ni‘u vakavolivoliti mai vei ira na lewe ni noqu rumu yalovinaka kei ira e udolu na gonevuli, ia au a vakila tu ga na galili levu. Na icolavola ni veika vakavuli sa veirawai dina. Au a sega ni kila na ka au vinakata me’u vulica ka‘u kunea na kalasi ni veibolei. Au a coko tale tu ga e na dua na veimaliwai ka veivakacacani vakayalo, ka vakaleqa vakalevu na ituvaki ni noqu vakasama. Na noqu taqayataka na veisiga ni mataka e a bikai au sara vakalevu.
Sega ni dede na lomabibi, na rere, kei na galili sa vakavuna me’u sega ni bula vakavinaka. Na ivakarau tudei mada ga e vakilai ni sa sega ni rawa. Dua na mataka, au a kerea tiko vua na Tamada Vakalomalagi me solia vei au na kaukauwa me’u lako curuma rawa na siga ko ya. “Au sa sega ni rawa ni cakava duadua tiko na ka oqo,” au a kaya e na masu. E na dua na gauna vakavudua sara ni makare ni vakasama kei na yalo, a votu mai ki na noqu vakasama na vosa “E sega ni dodonu me vakakina.” E a drodrova na noqu vakasama na vakacegu. Na cava e na noqu vakasama sa maravu mai.
Na vica na vula ka tarava (kei na yabaki) e a sega ni rawarawa. Na lomabibi kei na galili e a sega ni takali vakasauri. Ia e na imatai ni gauna, au sa qai kila vakai au se cava na ibalebale ni tiko e dua na iVakabula. Au kila ni kila vinaka tu o Koya na noqu bolebole eso kei na mosi. Au kila ni sa iKoya duadua ga e na rawa ni vukei au, a mani vakayacora vakakina o Koya.
E na vica na yabaki ki muri, au sa lesu mai na kaulotu, au sa taurivola mai na koliji, ka‘u sa marautaka tiko na bula vakawati. Ka’u kila ni‘u na sega ni rawata e dua vei ira na takete oqori kevaka au a sega ni vakararavi vua na Turaga.
iTaba mai na Getty Images
Mo Cegu, Mo Maravu Mai
A moce toka o Jisu e waqa vata kei iratou na Nona iApositolo ka donuya ni tubu e dua na cava levu. E ratou vakayadrati Jisu na iApositolo, ka kaya, “Vakavuvuli, ko sa wele beka ga ni da sa mate?” (Marika 4:38). E na gauna sara ga e ratou nanuma kina ni ratou sa na mate e na cagilaba, a tucake na Turaga ka “vunauca na cagi, ka kaya ki na wasawasa, Mo cegu, mo maravu mai. A sa ruru sara na cagi, a sa maravu levu mai” (Marika 4:39).
Sa vakavica beka na nomu vakananuma e na nomu bula, “Ko sa wele beka ga ni da sa mate?” E na so na gauna, ni o bula curuma tiko na veibolebole dredre, e na rawarawa sara na nomu na vakila na galili kei na sega ni kauwaitaki. O na vakataroga beka na vuna e sega ni vakamaravutaka kina na nomu cava na Turaga. E na vaka beka ni na sega ni yacova na nomu bula na “maravu levu” e tukuna tiko na tikina e 39.
Ia, e dua na tiki bibi ni italanoa oqo sa ikoya na ivakavuvuli a qai vakatavulica na iVakabula. E kaya kina: “Dou sa rere ena vuku ni cava? e vakaevei sa sega na nomudou vakabauta?” (Marika 4:40). E na gauna ni nodratou rere kei na lomataqaya, e ratou a guilecava na iApositolo se o cei e ratou a tiko kaya. Na Luve ni Kalou, o koya ka bulia na vuravura, sa moce toka e na nodratou waqa. E cava beka me ratou rere kina?
Sa vakakina, sa tu vua na iVakabula na kaukauwa me vakamaravutaka na cava cava ga e na nomu bula. E rawa ni vakabulai iko mai na nomu mosi, vakamamadataka na nomu icolacola, ka vakarautaka na rarama ni ko tiko e na butobuto. Na nomu itavi e na ituvaki oqo o ya mo cakacakataka na vakabauta e levu cake vei Jisu Karisito.
Kunea na Kaukauwa mai vua na Turaga
Na bula e na vakabauta torocake e na rawa ni vakaikuritaka na kaukauwa i Karisito ki na nomu bula. Ni vakarau vakacavara tiko o Razafimalaza mai Madagascar e dua na nona yabaki dredre ni vuli, a mate o nona nei. Sa dua na ka na nona rarawa. A yaco me dau dredre na nona vakanamata e na gauna ni vuli. A vakavakarau tiko o koya me dabeca na iotioti ni veitarogi ni yabaki. A masu ka kaya, “Yalovinaka kauta tani na noqu rarawa ka solia vei au na kaukauwa me‘u gole ki veitarogi ni mataka.” Ni oti na masu, a vakila o Razafimalaza ni a vakaukauwataki. “Au vakila ni vaka me’u sa guilecava na noqu rarawa,” a kaya o koya. “Na Kalou sa solia vei au na kaukauwa me’u cakava kina na cava ga.”
E bibi me da nanuma tiko ni so na gauna e dau vakamaravutaka na cava e na nomu bula na Turaga, ka so na gauna e dau vakamaravutaka ka vakacegui iko ni liwa tiko na cagi. Ni o vakabauti Koya, o na nuitaka talega na Nona lewa kei na gauna. O vakabauta ni na vukei iko o Koya, veitalia se gauna cava e na qai yaco mai kina na vakacegu kei na maravu ni bula.
Nuitaka na Nona Gauna
Sa kila vinaka tu e dua na goneyalewa na yacana o Ann na vakilai ni yalo ni rere. “Au sotava tiko na nuiqawaqawa bibi kei na ADHD [bula yavalavala ka dredre na vakanamata ki na dua na ka],” e kaya o koya. “E na so na gauna e dau vakavuna oqo me ra dau nanumi au cala o ira na tani, ka dau dredre me’u maroroya e dua na rai tawamudu. Wale toka ga oqo au a wilika e Nai Vakatekivu me baleti Sera, ka a wawa tu mai e na vicasagavulu na yabaki ni bera ni mai vakaluveni. Au a qai kila ni’u na wawa tale toka ga vakabalavu me’u na qai vakabulai. Au kila ni na sega ni biuti au na Karisito ni’u sotava tiko na nuiqawaqawa. Sa tiko o Koya me vukei au me’u lako curuma na ka oqo.”
Na nomu digitaka mo vakararavi vua na Turaga e sega ni kena ibalebale mo sega ni kauwaitaka na veibolebole lelevu e na nomu bula. Ia, e kena ibalebale mo “raicamatua tiko na kaukauwa, cecere tawamudu, ka taucoko ni [nomu] Kalou, ka nuitaki Koya … e na yalo marau.”1 Ni ko galili, rarawa, nuiqawaqawa, se waraka tiko na veivakalougatataki yalataki, nanuma na taro oqo: O waraka tiko beka na “vakacegu levu” e na yalo rere se e na yalo sinaiti e na vakabauta?