Au sa rawata Na Ka Kecega e na Vuku i Karisito

E ra wasea na itabagone na sala sa vakaqaqacotaki ira kina na Karisito me ra vakayacora na veika dredre (raica na Filipai 4:13).

E Rawa Ni Da Veivutuni

cauravou

E dina ga ni’u a papitaiso ni’u se yabaki walu, au a sega ni dau cakava e veigauna na veika dodonu. Ni’u sa yabaki tinivakacaca, sa tekivu me’u muri ira e dua na ilawalawa tagane, ka tekivu me keimami vakayacora e so na ka sega ni vinaka.

Ni oti na vakamau nei ganequ, a vukei au o koya meu lesu tale mai ki na Lotu. Au a vulica me baleta na bibi ni Vosa ni Vuku kei na rokovi ni yagoqu.

Ia e na dua na siga, au a vakayacora e dua tale na ivalavala ca bibi. Au vakila ni na sega ni rawa me tiko kei au na Yalo se na kaukauwa ni matabete. Au vakila niu sa tawakilikili kau sega ni nanuma niu na rawa ni vakayacora na noqu itavi e na lotu, me vaka na masulaki kei na votai ni sakaramede.

Ia e vakavulica vei au na kosipeli ni rawa me da veivutuni tikoga. E a dredre meu lako i raici noqu bisopi ka vakatusa na noqu ivalavala ca. Au madua niu kila ni tamata e rawa ni ra raici au niu curu yani ki na valenivolavola nei bisopi. Ia au a vinakata na vakacegu ni Turaga, kau a vinakata meu veivutuni.

A masu vata kei au na noqu bisopi ka kaya vei au ni sa dau yalololoma na Turaga vei ira e ra vakasaqara me ra veivutuni ka na rawa meu vakabulai mai na noqu cala. Au sa tekivu oqo meu wilika na ivolanikalou ka masu, kau vakila ni vukei au meu vorata rawa na veitemaki.

Kevaka e dredre vei iko na cakacakataki ni veivutuni, e dodonu mo dau nanuma tikoga na isolisoli i Jisu Karisito kei na Nona Veisorovaki veivakurabuitaki. O keda kece e da ivalavala ca ka caka cala, ka da na sega ni yacova na bula e taucoko sara e na bula oqo. Ia mai na Veisorovaki i Jisu Karisito kei na dra a vakadavea o Koya e na vukuda, sa rawa me da veivutuni tikoga. E na veivuke ni Turaga, e da rawa ni toso yani ki liu ki na bula e taucoko sara.

Kenneth B., e Toga