“Fakafehokotaki,” Ki Hono Fakamālohia ʻo e Toʻutupú, Māʻasi 2023.
Fakafehokotaki
Likuto I.,
16, Siapani
Faitaaʻi ʻe Sayaka Okubo
Ko hoku hingoá ko Likuto, pea ko ʻeku haʻu mei Metisuto Siti, Siapani.
Lolotonga ha ʻekitivitī ʻi he efiafi fakafāmili ʻi ʻapí, naʻá ku fakaʻaongaʻi ʻa e polokalama Fuʻu ʻAkau Fakafāmilí ke ʻiloʻi pe ko hai ʻeku ngaahi kuí pea ne fefē ʻenau moʻuí. Naʻá ku ʻohovale ʻi heʻeku ʻiloʻi ne hoko ha taha ʻo ʻeku ngaahi kuí ko ha sōtia heka hoosi naʻá ne leʻohi ha ʻemipola Siapani ne moʻui ʻi he kuonga muʻá.
ʻOku ou manako he vaʻinga soká, ka koeʻuhí ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻe ʻikai ke u fie vaʻinga ʻi he ngaahi ʻaho Sāpaté. Naʻe faingataʻa kiate au ke u talaange ki heʻeku faiakó he ʻikai ke u lava ʻo ako vaʻinga he Sāpaté, ka ʻi heʻeku fakamatalaʻi ange ʻoku ou ʻalu ki he lotú, naʻá ne kei tuku pē ke u kau ki he timí.
Naʻe ʻikai ke faʻa falala hoku kaungāvaʻingá ki heʻeku pōtoʻi vaʻingá, koeʻuhí ko ʻeku liʻaki e ngaahi ako vaʻinga ʻi he Sāpaté. Naʻá ku lotu ke tukutaha ʻeku tokangá mo vaʻinga lelei lolotonga e ako vaʻingá, he naʻe ʻikai lahi ʻeku taimi ako vaʻingá ʻo hangē ko e toenga ʻo e timí. ʻI he aʻu ki he feʻauhi fakaʻosí, naʻe fakaafeʻi au ke u kau ʻi he vaʻingá. ʻOku ou ʻilo naʻe tokoniʻi au ʻe he ʻOtuá ke u aʻusia ʻa e taumuʻa ko iá.